തിരുവനന്തപുരം:
മുഖ്യമന്ത്രിയുടെ ദുരിതാശ്വാസ നിധിയിൽ നിന്ന് 262 കോടി രൂപ വകമാറ്റിയെന്ന തരത്തിൽ പ്രചരിക്കുന്ന വാർത്തകൾ വസ്തുതാവിരുദ്ധമാണെന്ന് പ്രതിപക്ഷ നേതാവ്   വിജയൻ. 2024-25 സാമ്പത്തിക വർഷത്തെ സിഎജി റിപ്പോർട്ട് തെറ്റായി വ്യാഖ്യാനിച്ചാണ് പ്രചാരണമെന്നും അദ്ദേഹം ഫേസ്ബുക്ക് കുറിപ്പിലൂടെ വ്യക്തമാക്കി.

സിഎജി റിപ്പോർട്ടിലെ പരാമർശം മുഖ്യമന്ത്രിയുടെ ദുരിതാശ്വാസ നിധിയുമായി ബന്ധപ്പെട്ട തുക സ്റ്റേറ്റ് ട്രഷറി സേവിംഗ്സ് ബാങ്ക് (എസ്.ടി.എസ്.ബി) അക്കൗണ്ടിൽ നിന്ന് സംസ്ഥാനത്തിന്റെ സഞ്ചിത നിധിയിലേക്ക് വർഷാവസാന ക്രമീകരണത്തിന്റെ ഭാഗമായി മാറ്റിയതിനെക്കുറിച്ചാണെന്ന് പിണറായി വിശദീകരിച്ചു. 262.06 കോടി രൂപ ഇത്തരത്തിൽ മാറ്റിയെങ്കിലും അടുത്ത സാമ്പത്തിക വർഷത്തിന്റെ ആദ്യവാരത്തിൽ തന്നെ അതേ അക്കൗണ്ടിലേക്ക് തിരിച്ചുനൽകിയതായും റിപ്പോർട്ടിൽ തന്നെ രേഖപ്പെടുത്തിയിട്ടുണ്ടെന്ന് അദ്ദേഹം ചൂണ്ടിക്കാട്ടി.

എന്താണ് സിഎജി റിപ്പോർട്ടിലെ പരാമർശം?

2024-25 സാമ്പത്തിക വർഷത്തിൽ അഞ്ച് എസ്.ടി.എസ്.ബി അക്കൗണ്ടുകളിലുണ്ടായിരുന്ന മുഖ്യമന്ത്രിയുടെ ദുരിതാശ്വാസ നിധിയുമായി ബന്ധപ്പെട്ട 262.06 കോടി രൂപയുടെ പൊതുസംഭാവനകൾ സംസ്ഥാനത്തിന്റെ സഞ്ചിത നിധിയിലേക്ക് തിരിച്ചെടുത്തുവെന്നാണ് റിപ്പോർട്ടിലെ കണ്ടെത്തൽ. ഇത്തരം സർക്കാരിതര ഫണ്ടുകൾ സഞ്ചിത നിധിയിലേക്ക് മാറ്റിയത് ക്രമരഹിതമാണെന്നാണ് സിഎജി നിരീക്ഷിച്ചത്.

എന്നാൽ ഇത് എല്ലാ വർഷവും നടപ്പാക്കുന്ന അക്കൗണ്ടിംഗ് നടപടിക്രമത്തിന്റെ ഭാഗമാണെന്നാണ് സർക്കാർ വിശദീകരിച്ചിരുന്നത്. സാമ്പത്തിക വർഷാവസാനത്തിൽ ചെലവഴിക്കാതെ കിടക്കുന്ന തുക കൺസോളിഡേറ്റഡ് ഫണ്ടിലേക്ക് മാറ്റുകയും പുതിയ സാമ്പത്തിക വർഷം ആരംഭിക്കുമ്പോൾ തിരിച്ചുനൽകുകയും ചെയ്യുന്ന രീതിയാണ് നിലവിലുള്ളതെന്നും പിണറായി വിജയൻ പറഞ്ഞു.

പണം നഷ്ടമായിട്ടില്ലെന്ന് വിശദീകരണം

ദുരിതാശ്വാസ നിധിയിലെ ഒരു രൂപ പോലും മറ്റാവശ്യങ്ങൾക്ക് വിനിയോഗിച്ചിട്ടില്ലെന്നും പണം മുഴുവൻ സുരക്ഷിതമായി ട്രഷറി അക്കൗണ്ടിൽ തന്നെ നിലനിന്നിരുന്നുവെന്നും അദ്ദേഹം വ്യക്തമാക്കി.

“സിഎജി റിപ്പോർട്ട് ചൂണ്ടിക്കാട്ടുന്നത് നടപടിക്രമത്തിലെ ക്രമരഹിതത്വം മാത്രമാണ്. സാമ്പത്തിക ദുരുപയോഗമോ പണം നഷ്ടപ്പെട്ടതോ റിപ്പോർട്ടിൽ എവിടെയും പറയുന്നില്ല. ദുരിതാശ്വാസ നിധിയുടെ വിശ്വാസ്യത തകർക്കാനാണ് ചിലർ റിപ്പോർട്ടിനെ രാഷ്ട്രീയ ആയുധമാക്കുന്നത്,” എന്നാണ് പിണറായി വിജയന്റെ പ്രതികരണം.

വിവാദത്തിന് പിന്നിൽ രാഷ്ട്രീയം?

ലക്ഷക്കണക്കിന് ആളുകൾക്ക് ആശ്വാസം നൽകുന്ന മുഖ്യമന്ത്രിയുടെ ദുരിതാശ്വാസ നിധിയെ സംശയത്തിന്റെ നിഴലിലാക്കാനും, കഴിഞ്ഞ എൽഡിഎഫ് സർക്കാരിന്റെ കാലത്ത് ഗുരുതരമായ സാമ്പത്തിക ക്രമക്കേട് നടന്നെന്ന പ്രതീതി സൃഷ്ടിക്കാനുമാണ് ചില രാഷ്ട്രീയ കേന്ദ്രങ്ങൾ ശ്രമിക്കുന്നതെന്ന് പിണറായി ആരോപിച്ചു.

അതേസമയം, ദുരിതാശ്വാസ നിധിയിൽ നിന്നുള്ള തുക സഞ്ചിത നിധിയിലേക്ക് മാറ്റിയത് “ക്രമരഹിതം” ആണെന്ന സിഎജി നിരീക്ഷണവും, അത് സാധാരണ അക്കൗണ്ടിംഗ് നടപടിക്രമമാണെന്ന സർക്കാരിന്റെ വിശദീകരണവും തമ്മിലുള്ള വ്യത്യാസമാണ് ഇപ്പോൾ രാഷ്ട്രീയ വിവാദത്തിന് വഴിവെച്ചിരിക്കുന്നത്.