എലോഹിം വർഷിപ്പ് സെന്റർ സംഘർഷം; ബിജെപി പഞ്ചായത്ത് പ്രസിഡന്റുൾപ്പെടെ നാലുപേർക്കെതിരെ കേസ്

പത്തനംതിട്ട: ഓമല്ലൂർ എലോഹിം ഗ്ലോബൽ വർഷിപ്പ് സെന്ററിൽ പ്രാർഥനയ്ക്കെത്തിയ വിശ്വാസികളെ തടഞ്ഞ സംഭവത്തിൽ ബിജെപി നേതാവും ഓമല്ലൂർ ഗ്രാമപഞ്ചായത്ത് പ്രസിഡന്റുമായ ആതിര ജോൺസൺ ഉൾപ്പെടെ നാലുപേർക്കെതിരെ പൊലീസ് കേസെടുത്തു. വിശ്വാസികളെ മർദിക്കൽ, തലമുടി പിടിച്ച് വലിക്കൽ, അസഭ്യം പറയൽ, ആരാധനയ്ക്ക് തടസ്സം സൃഷ്ടിക്കൽ തുടങ്ങിയ കുറ്റങ്ങൾ ചുമത്തിയാണ് നടപടി.

കഴിഞ്ഞ ദിവസമാണ് എലോഹിം ഗ്ലോബൽ വർഷിപ്പ് സെന്ററിന് മുന്നിൽ സംഘർഷാവസ്ഥ രൂപപ്പെട്ടത്. സെന്ററുമായി ബന്ധപ്പെട്ട് ഉയർന്ന പീഡനാരോപണങ്ങളുടെ പശ്ചാത്തലത്തിൽ ബിജെപിയുടെ നേതൃത്വത്തിൽ പ്രതിഷേധം സംഘടിപ്പിച്ചിരുന്നു. പാസ്റ്റർ ബിനു വാഴമുട്ടത്തിനെതിരെ നടപടി സ്വീകരിക്കണമെന്നും അറസ്റ്റ് ചെയ്യണമെന്നും ആവശ്യപ്പെട്ടായിരുന്നു പ്രതിഷേധം.

അതേസമയം, ആരാധനാ സ്വാതന്ത്ര്യം ഉറപ്പാക്കണമെന്നും പ്രാർഥന നടത്താൻ അനുവദിക്കണമെന്നും ആവശ്യപ്പെട്ട് വിശ്വാസികളും സ്ഥലത്തെത്തിയിരുന്നു. ഇരുവിഭാഗവും നേർക്കുനേർ വന്നതോടെയാണ് സംഘർഷാവസ്ഥ രൂപപ്പെട്ടത്. സ്ഥിതി നിയന്ത്രണവിധേയമാക്കാൻ വൻ പൊലീസ് സന്നാഹം പ്രദേശത്ത് വിന്യസിച്ചിരുന്നു.

എലോഹിം ഗ്ലോബൽ വർഷിപ്പ് സെന്ററിന്റെ സ്നേഹത്തണൽ വൃദ്ധസദനവുമായി ബന്ധപ്പെട്ടാണ് വിവാദങ്ങൾ ഉയർന്നത്. അണക്കര സ്വദേശിയായ 17കാരൻ സെന്ററിൽ നേരിട്ട പീഡനങ്ങൾ പുറത്തുവിട്ടതോടെയാണ് വിഷയത്തിന് വലിയ ശ്രദ്ധ ലഭിച്ചത്. മൂന്ന് മാസത്തോളം സെന്ററിൽ താമസിച്ചിരുന്ന കുട്ടിക്ക് പഠനവും ജോലിയും നൽകാമെന്ന് വാഗ്ദാനം ചെയ്തിരുന്നുവെന്നാണ് പരാതി. എന്നാൽ പഠനം മുടങ്ങുകയും സ്ഥാപനത്തിലെ ജോലികൾ ചെയ്യിക്കാൻ നിർബന്ധിക്കുകയും ചെയ്തതായി കുട്ടി ആരോപിച്ചു.

ഇതിനെ ചോദ്യം ചെയ്തതിനെ തുടർന്ന് മോഷണക്കുറ്റം ആരോപിച്ച് ചൂരൽ കൊണ്ട് മർദിച്ചുവെന്നാണ് 17കാരന്റെ പരാതി. വിഷയം പുറത്തുവന്നതോടെ മന്ത്രി ബിന്ദു കൃഷ്ണ ഇടപെട്ട് കർശന നടപടിക്ക് നിർദേശം നൽകിയിരുന്നു. ആദ്യം കട്ടപ്പന പൊലീസ് രജിസ്റ്റർ ചെയ്ത കേസ് പിന്നീട് ഇലവുംതിട്ട പൊലീസിന് കൈമാറുകയും അന്വേഷണം പുരോഗമിക്കുകയും ചെയ്യുകയാണ്.

സംഭവവുമായി ബന്ധപ്പെട്ട് കൂടുതൽ പരാതികളും മൊഴികളും പരിശോധിച്ച ശേഷമായിരിക്കും തുടർനടപടികൾ സ്വീകരിക്കുകയെന്ന് പൊലീസ് അറിയിച്ചു.