തിരുവനന്തപുരം, 2026 ജൂൺ 20 –

മൈക്രോഫിനാൻസ് തട്ടിപ്പ് കേസിൽ എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശനെതിരായ ആദ്യ കുറ്റപത്രം തയ്യാറായി. വിജിലൻസ് ഡയറക്ടർ കുറ്റപത്രത്തിന് അംഗീകാരം നൽകി. ഇക്കാര്യം ഹൈക്കോടതിയെ അറിയിക്കുകയും ചെയ്തു. കുറ്റപത്രം കോടതിയിൽ സമർപ്പിക്കുന്നതുമായി ബന്ധപ്പെട്ട നടപടികളാണ് ഇനി പുരോഗമിക്കുന്നത്.

കുറ്റപത്രം ഇതുവരെ കോടതിയിൽ സമർപ്പിക്കാത്തതിനെതിരെ ഹൈക്കോടതി വിമർശനം ഉന്നയിച്ചിരുന്നു. ഇതോടെയാണ് നടപടികൾ വേഗത്തിലാക്കാൻ അധികൃതർ തീരുമാനിച്ചത്. കേസിലെ അന്വേഷണ പുരോഗതി സംബന്ധിച്ചും കോടതി അതൃപ്തി രേഖപ്പെടുത്തിയിരുന്നു.

അന്വേഷണ ഉദ്യോഗസ്ഥനായ എസ്.പി. എസ്. ശശിധരനെതിരെ ഹൈക്കോടതി രൂക്ഷ വിമർശനമാണ് നടത്തിയത്. അന്വേഷണ പുരോഗതി റിപ്പോർട്ട് മൂന്നാഴ്ചയ്ക്കകം സമർപ്പിക്കാത്ത പക്ഷം അന്വേഷണ ചുമതലയിൽ നിന്ന് മാറ്റുമെന്ന മുന്നറിയിപ്പും കോടതി നൽകി. പലതവണ നിർദേശം നൽകിയിട്ടും അന്വേഷണ പുരോഗതി റിപ്പോർട്ട് സമർപ്പിച്ചില്ലെന്നാണ് കോടതിയുടെ നിരീക്ഷണം.