പാലക്കാട്, 2026 ജൂൺ 20 –

വീര്യം കുറഞ്ഞ മദ്യത്തിന് നികുതി കുറച്ച സർക്കാർ തീരുമാനത്തിനെതിരെ മുൻ മന്ത്രി എം.ബി. രാജേഷ് രംഗത്തെത്തി. ഈ തീരുമാനത്തിലൂടെ സംസ്ഥാനത്ത് മദ്യം കൂടുതൽ സുലഭമാക്കാനാണ് യുഡിഎഫ് സർക്കാർ ശ്രമിക്കുന്നതെന്ന് അദ്ദേഹം ആരോപിച്ചു. ഇതിന് പിന്നിൽ കർണാടക മദ്യലോബിയാണെന്നും ഇക്കാര്യത്തിൽ മുഖ്യമന്ത്രി വി.ഡി. സതീശൻ വിശദീകരണം നൽകണമെന്നും ആവശ്യപ്പെട്ടു.

വാർത്താസമ്മേളനത്തിലാണ് എം.ബി. രാജേഷ് ആരോപണങ്ങൾ ഉന്നയിച്ചത്. എൽഡിഎഫ് സർക്കാർ പഴവർഗങ്ങളും പച്ചക്കറികളും ഉപയോഗിച്ച് വീര്യം കുറഞ്ഞ മദ്യം നിർമ്മിക്കാൻ നൽകിയ അനുമതി കർഷകരെ സഹായിക്കാനായിരുന്നുവെന്ന് അദ്ദേഹം പറഞ്ഞു. എന്നാൽ യുഡിഎഫ് സർക്കാർ സ്പിരിറ്റ് ഉപയോഗിച്ച് നിർമ്മിക്കുന്ന മദ്യത്തിന് നികുതിയിളവ് നൽകിയതിലൂടെ കോർപ്പറേറ്റ് കമ്പനികൾക്ക് നേട്ടമുണ്ടാക്കുകയാണെന്നാണ് ആരോപണം. പത്ത് ശതമാനം വരെ വീര്യമുള്ള മദ്യത്തിന്റെയും ഇരുപത് ശതമാനം വരെ വീര്യമുള്ള മദ്യത്തിന്റെയും നികുതി കുറച്ചതിലൂടെ വലിയ വരുമാനനഷ്ടം സംസ്ഥാനത്തിനുണ്ടാകുമെന്നും അദ്ദേഹം പറഞ്ഞു.

ഈ തീരുമാനം അഴിമതിക്കും സമൂഹത്തോടുള്ള അനീതിക്കും വഴിയൊരുക്കുന്നതാണെന്നും എം.ബി. രാജേഷ് ആരോപിച്ചു. ശീതളപാനീയം പോലെ ഉപയോഗിക്കാവുന്ന റെഡി ടു ഡ്രിങ്ക് മദ്യങ്ങളുടെ വിപണി വികസിപ്പിക്കുന്ന നടപടിയാണിതെന്നും വിമർശിച്ചു. എൽഡിഎഫ് സർക്കാർ നിഷേധിച്ച നികുതിയിളവാണ് ഇപ്പോൾ അനുവദിച്ചതെന്നും അദ്ദേഹം കൂട്ടിച്ചേർത്തു.