തിരുവനന്തപുരം, 2026 ജൂൺ 20 –

എൻഎസ്എസ് ഡയറക്ടർ ബോർഡിൽ നിന്ന് മുൻ ഗതാഗത മന്ത്രി കെ.ബി. ഗണേഷ് കുമാറിനെ ഒഴിവാക്കി. ഡയറക്ടർ ബോർഡ് അംഗത്വം പുതുക്കി നൽകാതെയാണ് നടപടി. പകരം ബി.ആർ.കെ. ബാബുവിനെ ഉൾപ്പെടുത്തി. ഒമ്പതംഗ ഡയറക്ടർ ബോർഡിൽ നിന്നാണ് ഗണേഷ് കുമാറിനെ മാറ്റിയത്. നിലവിലെ കാലാവധി അവസാനിച്ചതാണ് തീരുമാനത്തിന് കാരണമായി ചൂണ്ടിക്കാട്ടുന്നത്.

ഗണേഷ് കുമാറും എൻഎസ്എസ് ജനറൽ സെക്രട്ടറി ജി. സുകുമാരൻ നായരും തമ്മിലുള്ള ഭിന്നതയാണ് നടപടിക്ക് പിന്നിലെന്ന സൂചനകളും ഉയരുന്നുണ്ട്. പത്തനാപുരം താലൂക്ക് യൂണിയനിലെ ‘പത്മ കഫേ’ വിവാദം ഇരുവരും തമ്മിലുള്ള തർക്കം രൂക്ഷമാക്കിയിരുന്നു. പത്മ കഫേ നിർമാണവുമായി ബന്ധപ്പെട്ട സാമ്പത്തിക ക്രമക്കേട് ആരോപണങ്ങൾ വലിയ വിവാദത്തിന് വഴിവെച്ചിരുന്നു. തുടർന്ന് ഭരണസമിതിയിലെ 19 അംഗങ്ങളിൽ 11 പേർ രാജിവെച്ചതോടെ പത്തനാപുരം താലൂക്ക് യൂണിയൻ പിരിച്ചുവിടുകയും ചെയ്തിരുന്നു.

തീരുമാനം ജനാധിപത്യ മര്യാദകൾ പാലിച്ചാണെന്ന് ജി. സുകുമാരൻ നായർ പ്രതികരിച്ചു. വർഷങ്ങളായി പദവി ലഭിക്കാത്തവർക്ക് അവസരം നൽകേണ്ടതുണ്ടെന്നും പ്രവർത്തനത്തിന്റെ അടിസ്ഥാനത്തിലാണ് മാറ്റങ്ങൾ വരുത്തുന്നതെന്നും പറഞ്ഞു. അതേസമയം, ജനാധിപത്യത്തെ മാനിക്കുന്നില്ലെന്നും തന്നെ ഒഴിവാക്കിയ തീരുമാനം തെറ്റാണെന്നും കെ.ബി. ഗണേഷ് കുമാർ പ്രതികരിച്ചു.