ന്യൂഡൽഹി, 2026 ജൂൺ 20

സ്ത്രീസുരക്ഷയും ലിംഗസമത്വവും സംബന്ധിച്ച വിഷയങ്ങളിൽ ഗ്രാമതലത്തിൽ ബോധവൽക്കരണം ശക്തമാക്കാൻ കേന്ദ്ര പഞ്ചായത്തിരാജ് മന്ത്രാലയം ‘നിർഭയ ചേതന’ പദ്ധതി ആരംഭിച്ചു. നിർഭയ നിധി പദ്ധതിയുടെ ഭാഗമായി ജൂൺ പതിനേഴ് മുതൽ പത്തൊൻപത് വരെ ന്യൂഡൽഹിയിൽ മൂന്ന് ദിവസത്തെ പരിശീലക പരിശീലന പരിപാടി സംഘടിപ്പിച്ചു. രാജ്യത്തെ പതിനേഴര ലക്ഷത്തിലധികം പുരുഷ ജനപ്രതിനിധികളെ ഈ പദ്ധതിയിലൂടെ ബോധവൽക്കരിക്കുകയാണ് ലക്ഷ്യം.

പഞ്ചായത്തിരാജ് മന്ത്രാലയമാണ് പദ്ധതി നടപ്പാക്കുന്നത്. സ്ത്രീകളുടെ സുരക്ഷ, അവകാശങ്ങൾ, നേതൃത്വപങ്കാളിത്തം, ലിംഗസമത്വം തുടങ്ങിയ വിഷയങ്ങളിൽ പുരുഷ ജനപ്രതിനിധികൾക്ക് അവബോധം നൽകാനാണ് പദ്ധതി. ഇതിനായി ഇരുപത്തെണ്ണായിരത്തി അഞ്ഞൂറ് മുഖ്യ പരിശീലകരെ സംസ്ഥാന, ജില്ല, ബ്ലോക്ക് തലങ്ങളിൽ സജ്ജമാക്കും. അസം, ഛത്തീസ്ഗഢ്, ഹിമാചൽ പ്രദേശ്, മഹാരാഷ്ട്ര, ഒഡീഷ, ഉത്തരാഖണ്ഡ് എന്നീ ആറു സംസ്ഥാനങ്ങളിൽ നിന്നുള്ള നാല്പതോളം പരിശീലകരാണ് ആദ്യഘട്ടത്തിൽ പങ്കെടുത്തത്. വിദഗ്ധ ക്ലാസുകൾ, ചർച്ചകൾ, അനുഭവപഠനം എന്നിവയും പരിപാടിയുടെ ഭാഗമായി നടന്നു.

ഇത് മാർച്ച് പതിനൊന്നിന് ആരംഭിച്ച ‘നിർഭയ രഹോ’ പദ്ധതിയുടെ പ്രധാന ഘടകമാണ്. ‘നിർഭയ നേത്രി’, ‘നിർഭയ ചേതന’, ‘നിർഭയ ദൃഷ്ടി’ എന്നീ മൂന്ന് ഭാഗങ്ങളാണ് പദ്ധതിക്കുള്ളത്. തെരഞ്ഞെടുക്കപ്പെട്ട വനിതാ ജനപ്രതിനിധികളുടെ ശേഷിവികസനവും നിയമബോധവൽക്കരണവും, പുരുഷ ജനപ്രതിനിധികളുടെ ബോധവൽക്കരണവും, ഗ്രാമപ്രദേശങ്ങളിൽ നിരീക്ഷണ ക്യാമറകൾ സ്ഥാപിക്കുന്നതുമാണ് പദ്ധതിയുടെ വിവിധ ലക്ഷ്യങ്ങൾ. ഭാവിയിൽ എല്ലാ സംസ്ഥാനങ്ങളിലേക്കും കേന്ദ്രഭരണ പ്രദേശങ്ങളിലേക്കും പരിശീലന മാതൃക വ്യാപിപ്പിക്കാനാണ് തീരുമാനം.