തിരുവനന്തപുരം:ജൂൺ 12
ചരിത്ര രേഖകളും സാംസ്കാരിക പൈതൃകങ്ങളും സംരക്ഷിക്കേണ്ടത് കാലഘട്ടത്തിന്റെ ആവശ്യമാണെന്നും ഇതിനായി സർക്കാർ പൂർണ്ണ പിന്തുണ നൽകുമെന്നും പുരാരേഖ വകുപ്പ് മന്ത്രി ഒ.ജെ ജനീഷ് പ്രസ്താവിച്ചു. കേരള സംസ്ഥാന പുരാരേഖ വകുപ്പിന്റെ നേതൃത്വത്തിൽ സംഘടിപ്പിച്ച അന്താരാഷ്ട്ര ആർക്കൈവ്സ് വാരാഘോഷങ്ങളുടെ സംസ്ഥാനതല ഉദ്ഘാടനം തിരുവനന്തപുരം സെന്റ് ജോസഫ്സ് ഹയർ സെക്കൻഡറി സ്കൂളിൽ നിർവഹിച്ചു സംസാരിക്കുകയായിരുന്നു മന്ത്രി.
ലിപികൾ, താളിയോലകൾ, ശിലായുഗ ലിഖിതങ്ങൾ, ശാസനങ്ങൾ മുതൽ ഡിജിറ്റൽ രേഖകളുടെ കാലഘട്ടം വരെ മനുഷ്യ സംസ്കാരത്തിന്റെ പരിണാമ ചരിത്രം വ്യക്തമാക്കുന്ന രേഖകളെ വരും തലമുറക്കായി സംരക്ഷിക്കേണ്ടതുണ്ട്. പഴയ തലമുറകളുടെ ജീവിതശൈലിയും സാമൂഹിക സാഹചര്യങ്ങളും വെളിപ്പെടുത്തുന്ന പ്രാചീന രേഖകൾ മനുഷ്യവംശത്തിന്റെ പരിണാമത്തിന്റെ നേർസാക്ഷ്യങ്ങളാണ്. ആശയവിനിമയത്തിന്റെ വളർച്ചയും സാംസ്കാരിക-ചരിത്ര പാരമ്പര്യവും പുരാരേഖകൾ വഴി തലമുറകളിലേക്ക് കൈമാറപ്പെടണം. ഡിജിറ്റൽ യുഗത്തിൽ രേഖസംരക്ഷണത്തിന് കൂടുതൽ പ്രാധാന്യമുണ്ടെന്നും ഉദ്ഘാടന പ്രസംഗത്തിൽ മന്ത്രി കൂട്ടിച്ചേർത്തു.
‘നീതിക്കായുള്ള പുരാരേഖകൾ : അവകാശങ്ങൾ, ഓർമ, ഭാവി’ എന്നതാണ് ഈ വർഷത്തെ ആർക്കൈവ്സ് വാരാഘോഷത്തിന്റെ ഔദ്യോഗിക പ്രമേയം. സാമൂഹിക വികാസത്തിന്റെ ഭാഗമായി എഴുത്തുകളുടെയും രേഖകളുടെയും ശേഖരണവും സംരക്ഷണവും ഉറപ്പാക്കുന്നതിനായാണ് ഈ ദിനാചരണം സംഘടിപ്പിക്കുന്നത്. ലോകമെമ്പാടുമുള്ള ആർക്കൈവുകളുടെ പ്രവർത്തനങ്ങളും അവയുടെ സാമൂഹിക പ്രസക്തിയും ജനങ്ങളിലേക്ക് എത്തിക്കുകയാണ് ഈ വാരാഘോഷം കൊണ്ട് ലക്ഷ്യമിടുന്നത്.
ചടങ്ങിൽ വാർഡ് കൗൺസിലർ ഷേർളി എസ് അധ്യക്ഷത വഹിച്ചു. സംസ്ഥാന പുരാരേഖ വകുപ്പ് ഡയറക്ടർ പാർവതി എസ് സ്വാഗതവും ആർക്കിവിസ്റ്റ് നിജ ആർ. നന്ദിയും രേഖപ്പെടുത്തി. സാംസ്കാരിക വകുപ്പ് ജോയിന്റ് സെക്രട്ടറി രജനി എം, സംസ്ഥാന പുരാവസ്തു വകുപ്പ് ഡയറക്ടർ ഇ. ദിനേശൻ, മ്യൂസിയം-മൃഗശാല വകുപ്പ് ഡയറക്ടർ പി. എൻ. മഞ്ജുളാദേവി, കെ സി എച്ച് ആർ ഡയറക്ടർ ആർ ചന്ദ്രൻ പിള്ള, സെൻറ് ജോസഫ്സ് ഹയർ സെക്കൻഡറി സ്കൂൾ മാനേജർ ഫാ. ജെറോം അൽഫോൻസ്, പ്രിൻസിപ്പൽ ഡോ. സുനിൽകുമാർ മോറായിസ് സി, ഹെഡ്മാസ്റ്റർ നിധീഷ് സെബാസ്റ്റ്യൻ എന്നിവർ ചടങ്ങിൽ ആശംസകളറിയിച്ചു.
വാരാഘോഷ പരിപാടിയുടെ ഭാഗമായി ആർക്കൈവ്സ് മേഖലയിലെ വിവിധ പ്രദർശനങ്ങളും ചർച്ചകളും സംഘടിപ്പിച്ചു. പരിപാടിയോടനുബന്ധിച്ച് നടന്ന ചരിത്ര ക്വിസ് മൽസരത്തിലെ വിജയികൾക്കുള്ള സമ്മാനദാനവും മന്ത്രി ഒ.ജെ ജനീഷ് ചടങ്ങിൽ നിർവ്വഹിച്ചു
