പുതിയ മുഖ്യമന്ത്രിയുടെ സത്യപ്രതിജ്ഞ 9ന്

കൊൽക്കത്ത: പശ്ചിമ ബംഗാളിൽ ഭരണ മാറ്റത്തിന് പിന്നാലെ രാഷ്ട്രീയ സംഘർഷം രൂക്ഷമാകുന്നതിനിടെ നിയുക്ത മുഖ്യമന്ത്രിയെന്ന നിലയിൽ പരിഗണിക്കപ്പെടുന്ന ബി.ജെ.പി നേതാവ് സുവേന്ദു അധികാരിയുടെ അടുത്ത സഹായി കൂടിയായിരുന്ന ചന്ദ്രനാഥ് റാത്ത് വെടിയേറ്റ് മരിച്ചു. ഉത്തര 24 പരഗണാസിലെ മധ്യമഗ്രാമിൽ നടന്ന ആക്രമണം മുൻകൂട്ടി ആസൂത്രണം ചെയ്തതാണെന്ന സൂചനകളാണ് അന്വേഷണത്തിൽ പുറത്തുവരുന്നത്.

അതേസമയം, പശ്ചിമ ബംഗാളിൽ അധികാരത്തിലെത്തുന്ന ബി.ജെ.പി സർക്കാരിന്റെ സത്യപ്രതിജ്ഞ ചടങ്ങ് മെയ് 9 ശനിയാഴ്ച കൊൽക്കത്തയിലെ ബ്രിഗേഡ് പരേഡ് ഗ്രൗണ്ടിൽ നടക്കും. പ്രധാനമന്ത്രി നരേന്ദ്ര മോദിയും കേന്ദ്ര ആഭ്യന്തര മന്ത്രി അമിത് ഷായും ചടങ്ങിൽ പങ്കെടുക്കുമെന്ന് ബി.ജെ.പി സംസ്ഥാന അധ്യക്ഷൻ സമിക് ഭട്ടാചാര്യ അറിയിച്ചു. ബംഗാളി കലണ്ടർ പ്രകാരമുള്ള രവീന്ദ്രനാഥ ടാഗോറിന്റെ ജന്മദിനത്തോടനുബന്ധിച്ചാണ് ചടങ്ങ് നിശ്ചയിച്ചിരിക്കുന്നത്.

എന്നാൽ പുതിയ മുഖ്യമന്ത്രിയായി ആരെ തിരഞ്ഞെടുക്കുമെന്ന കാര്യത്തിൽ പാർട്ടി ഇതുവരെ ഔദ്യോഗിക പ്രഖ്യാപനം നടത്തിയിട്ടില്ല.

വ്യാജ നമ്പർ പ്ലേറ്റുള്ള ബൈക്ക് ഉപയോഗിച്ച് ആക്രമണം

ചന്ദ്രനാഥ് റാത്തിനെ ആക്രമിക്കാൻ ഉപയോഗിച്ച ബൈക്കിൽ വ്യാജ നമ്പർ പ്ലേറ്റ് ഉണ്ടായിരുന്നുവെന്ന് ബംഗാൾ ഡി.ജി.പി സിദ്ധ് നാഥ് ഗുപ്ത സ്ഥിരീകരിച്ചു. സംഭവസ്ഥലത്ത് നിന്ന് ഉപയോഗിച്ച വെടിയുണ്ടകളുടെ ഷെല്ലുകളും ഉപയോഗിക്കാത്ത കാർട്രിഡ്ജുകളും പൊലീസ് കണ്ടെത്തി.

സംഭവ ദിവസം രാത്രി 10.30നും 11നും ഇടയിലാണ് ആക്രമണം നടന്നത്. റാത്ത് സഞ്ചരിച്ച കാർ മധ്യമഗ്രാമിലെ ദോഹാരിയ ക്രോസിംഗിന് സമീപം എത്തിയപ്പോൾ മറ്റൊരു വാഹനം വഴി തടഞ്ഞതായും പിന്നാലെ ബൈക്കിലെത്തിയ അക്രമി അടുത്ത ദൂരത്തിൽ നിന്ന് വെടിയുതിർക്കുകയായിരുന്നുവെന്നും സാക്ഷികൾ പറയുന്നു. ആക്രമണം നടത്തിയയാൾ ഉടൻ രക്ഷപ്പെട്ടതായും ദൃക്‌സാക്ഷികൾ പറഞ്ഞു.

റാത്തിനൊപ്പമുണ്ടായിരുന്ന ബുദ്ധദേവ് ബേരയ്ക്കും വെടിയേറ്റു. ഗുരുതരാവസ്ഥയിൽ അദ്ദേഹം ആശുപത്രിയിൽ ചികിത്സയിലാണ്.

മുൻകൂട്ടി നിരീക്ഷിച്ച ശേഷമുള്ള ആക്രമണമെന്ന് സംശയം

റാത്തിന്റെ വാഹനത്തെ ദിവസങ്ങളായി പിന്തുടർന്നിരുന്നുവെന്ന സംശയവും പൊലീസിനുണ്ട്. ആക്രമണത്തിന് മുമ്പ് പ്രദേശം നിരീക്ഷിച്ച ശേഷമാണ് കൊലപാതകം നടത്തിയതെന്ന നിഗമനത്തിലേക്കാണ് അന്വേഷണം നീങ്ങുന്നത്. സിസിടിവി ദൃശ്യങ്ങളും സാക്ഷിമൊഴികളും പരിശോധിച്ചുവരികയാണ്.

രാഷ്ട്രീയ കൊലപാതകമെന്ന് ബിജെപി

സുവേന്ദു അധികാരി ഇത് ആസൂത്രിത കൊലപാതകമാണെന്ന് ആരോപിച്ചു. തെരഞ്ഞെടുപ്പ് ഫലത്തിന് പിന്നാലെ സംസ്ഥാനത്ത് ബി.ജെ.പി പ്രവർത്തകരെ ലക്ഷ്യമിട്ട് ആക്രമണങ്ങൾ നടക്കുകയാണെന്നും അദ്ദേഹം പറഞ്ഞു.

സംസ്ഥാന അധ്യക്ഷൻ സമിക് ഭട്ടാചാര്യയും സംഭവത്തെ രാഷ്ട്രീയ ഭീഷണി സൃഷ്ടിക്കാനുള്ള ശ്രമമായി വിശേഷിപ്പിച്ചു. തെരഞ്ഞെടുപ്പ് ഫലപ്രഖ്യാപനത്തിനും പുതിയ മന്ത്രിസഭ അധികാരമേൽക്കുന്നതിനുമിടയിലെ കാലയളവിൽ സമാധാനം ഉറപ്പാക്കേണ്ട ഉത്തരവാദിത്വം തിരഞ്ഞെടുപ്പ് കമ്മീഷനുണ്ടെന്നും അദ്ദേഹം പറഞ്ഞു.

തൃണമൂൽ സി.ബി.ഐ അന്വേഷണം ആവശ്യപ്പെട്ടു

അതേസമയം, തൃണമൂൽ കോൺഗ്രസ് സംഭവത്തെ ശക്തമായി അപലപിക്കുകയും കോടതി മേൽനോട്ടത്തിലുള്ള സി.ബി.ഐ അന്വേഷണം ആവശ്യപ്പെടുകയും ചെയ്തു. തെരഞ്ഞെടുപ്പിന് ശേഷമുള്ള അക്രമങ്ങളിൽ തങ്ങളുടെ പ്രവർത്തകരും കൊല്ലപ്പെട്ടിട്ടുണ്ടെന്ന് പാർട്ടി ആരോപിച്ചു.

സത്യപ്രതിജ്ഞയ്ക്ക് മുന്നോടിയായി കടുത്ത ജാഗ്രത

15 വർഷം നീണ്ട മമത ബാനർജി സർക്കാരിന്റെ ഭരണത്തിന് വിരാമമിട്ടാണ് ബി.ജെ.പി ബംഗാളിൽ അധികാരത്തിലെത്തുന്നത്.

സത്യപ്രതിജ്ഞാ ചടങ്ങിനുള്ള ഒരുക്കങ്ങൾ വിലയിരുത്താൻ സമിക് ഭട്ടാചാര്യ, ബി.ജെ.പി കേന്ദ്ര നിരീക്ഷകൻ സുനിൽ ബൻസൽ, ലോക്സഭാംഗങ്ങളായ ജ്യോതിര്മോയ് മഹതോ, സൗമിത്ര ഖാൻ എന്നിവർ സംസ്ഥാന സെക്രട്ടേറിയറ്റായ നബന്നയിലെത്തി ചീഫ് സെക്രട്ടറി ദുഷ്യന്ത് നാരായലയുമായി ചർച്ച നടത്തി.

പുതിയ മന്ത്രിസഭയുടെ സത്യപ്രതിജ്ഞാ ഒരുക്കങ്ങളും തെരഞ്ഞെടുപ്പിന് ശേഷമുള്ള അക്രമങ്ങൾ തടയാനുള്ള നടപടികളും യോഗത്തിൽ ചർച്ചയായി.

പ്രതികാര രാഷ്ട്രീയം അനുവദിക്കില്ലെന്ന് ബിജെപി

ഭരണമാറ്റത്തിന് പിന്നാലെ പ്രതികാര രാഷ്ട്രീയം അനുവദിക്കില്ലെന്ന് സമിക് ഭട്ടാചാര്യ പാർട്ടി പ്രവർത്തകർക്ക് മുന്നറിയിപ്പ് നൽകി.

മറ്റ് പാർട്ടികളുടെ ഓഫീസുകൾ കൈയ്യേറുകയോ ബി.ജെ.പി പതാക ഉയർത്തുകയോ ചെയ്താൽ കടുത്ത നടപടിയുണ്ടാകുമെന്ന് അദ്ദേഹം വ്യക്തമാക്കി.

ഇതിനിടെ സംസ്ഥാനത്ത് അക്രമസാധ്യത കണക്കിലെടുത്ത് ചീഫ് സെക്രട്ടറി, ഡി.ജി.പി, കേന്ദ്ര സായുധ സേനകൾ എന്നിവർക്ക് തിരഞ്ഞെടുപ്പ് കമ്മീഷൻ ജാഗ്രതാ നിർദേശം നൽകിയിട്ടുണ്ട്.