മധ്യപൂർവം |
ഇറാനും ഇസ്രയേലും അമേരിക്കയും തമ്മിലുള്ള സംഘർഷം കൂടുതൽ രൂക്ഷമാകുന്ന സാഹചര്യത്തിൽ ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിനെ “വേട്ടയാടി കൊല്ലും” എന്ന് ഇറാൻ വിപ്ലവ ഗാർഡ് മുന്നറിയിപ്പ് നൽകി. നെതന്യാഹുവിനെ “കുട്ടികളെ കൊല്ലുന്ന കുറ്റവാളി” എന്നാണ് അവർ വിശേഷിപ്പിച്ചത്. നെതന്യാഹു ജീവനോടെ തുടരുന്നിടത്തോളം ശക്തമായ ആക്രമണം തുടരുമെന്നും ഇറാൻ വിപ്ലവ ഗാർഡിന്റെ ഔദ്യോഗിക വെബ്സൈറ്റായ സെപാഹ് ന്യൂസ് റിപ്പോർട്ട് ചെയ്തതായി വാർത്താ ഏജൻസി എ.എഫ്.പി അറിയിച്ചു.
ഇസ്രയേൽ പ്രധാനമന്ത്രി ഇറാന്റെ പുതിയ സുപ്രീം നേതാവായ മൊജ്തബ ഖമേനെയിയെ കൊല്ലാമെന്ന സൂചനയുള്ള ഭീഷണി ഉന്നയിച്ചതിന് പിന്നാലെയാണ് ഇറാൻ ഭാഗത്ത് നിന്ന് കടുത്ത പ്രതികരണം വന്നത്. ഇതോടെ മധ്യപൂർവ മേഖലയിലെ സംഘർഷം കൂടുതൽ വ്യാപിക്കുമെന്ന ആശങ്ക ഉയർന്നിട്ടുണ്ട്.
ഇതിനിടെ ഇറാഖിലെ ബാഗ്ദാദിലുള്ള അമേരിക്കൻ എംബസിക്ക് സമീപം മിസൈൽ ആക്രമണം നടന്നതോടെ അമേരിക്കൻ പൗരന്മാർ ഉടൻ ഇറാഖ് വിട്ടുപോകണമെന്ന് യു.എസ് എംബസി മുന്നറിയിപ്പ് നൽകി. എംബസി സമുച്ചയത്തിനുള്ളിലെ ഹെലിപാഡിന് സമീപമാണ് മിസൈൽ പതിച്ചതെന്ന് റിപ്പോർട്ടുകൾ വ്യക്തമാക്കുന്നു.
സംഘർഷം ശക്തമാകുന്നതിനിടെ ഹോർമുസ് കടലിടുക്ക് സുരക്ഷിതമാക്കാൻ ലോക രാജ്യങ്ങളോട് അമേരിക്കൻ പ്രസിഡന്റ് ഡൊണാൾഡ് ട്രംപ് ആഹ്വാനം ചെയ്തു. ലോകത്തിലെ എണ്ണ വ്യാപാരത്തിന് അത്യന്താപേക്ഷിതമായ കടലിടുക്കാണ് ഹോർമുസ്. ദിവസേന ഏകദേശം 2 കോടി ബാരൽ എണ്ണയാണ് ഇവിടെകൂടി കടന്നുപോകുന്നത്. ഇത് ലോക എണ്ണ ഉപഭോഗത്തിന്റെ ഏകദേശം അഞ്ചിലൊന്നിനോട് തുല്യമാണ്.
ഹോർമുസ് കടലിടുക്കിലൂടെ എണ്ണ ലഭിക്കുന്ന രാജ്യങ്ങൾ തന്നെ ആ കടൽപാതയുടെ സുരക്ഷ ഉറപ്പാക്കണമെന്ന് ട്രംപ് വ്യക്തമാക്കി. അതിനായി അമേരിക്ക സഹായിക്കുമെന്നും അദ്ദേഹം പറഞ്ഞു. ഇറാനെതിരെ കടുത്ത മുന്നറിയിപ്പും ട്രംപ് നൽകി. ആവശ്യമായ വ്യവസ്ഥകൾ പാലിക്കാത്ത പക്ഷം ഇറാനിലെ ഖാർഗ് ദ്വീപ് വീണ്ടും ആക്രമിക്കാമെന്നും അദ്ദേഹം മുന്നറിയിപ്പ് നൽകി.
അതേസമയം ഹോർമുസ് കടലിടുക്ക് ഇറാന്റെ ശത്രുക്കൾക്കായി അടച്ചിട്ടിരിക്കുന്നുവെന്ന് ഇറാൻ വിദേശകാര്യ മന്ത്രി അബ്ബാസ് അറാഘ്ചി വ്യക്തമാക്കി. ഈ പ്രസ്താവനകൾ മേഖലയിൽ സംഘർഷം കൂടുതൽ വർധിപ്പിക്കുന്നതാണ്
