ന്യൂഡല്ഹി ജനുവരി 14: നിര്ഭയ കേസിലെ നാല് പ്രതികളില് രണ്ട് പ്രതികള് സമര്പ്പിച്ച തിരുത്തല് ഹര്ജികള് സുപ്രീംകോടതി തള്ളി. വധശിക്ഷയ്ക്ക് വിധിക്കപ്പെട്ട വിനയ് ശര്മ്മ, മുകേഷ് എന്നിവരാണ് വധശിക്ഷയ്ക്കെതിരെ തിരുത്തല് ഹര്ജിയുമായി കോടതിയെ സമീപിച്ചിരുന്നത്. അക്ഷയ് കുമാര് സിങ്, പവന് ഗുപ്ത എന്നിവരാണ് വധശിക്ഷയ്ക്ക് വിധിക്കപ്പെട്ട മറ്റുപ്രതികള്.
ജസ്റ്റിസുമാരായ എന്വി രമണ, അരുണ് മിശ്ര, ആര് എഫ് നരിമാന്, ആര് ഭാനുമതി, അശോക് ഭൂഷണ്, എന്നിവരടങ്ങിയ ബഞ്ചാണ് ഹര്ജി പരിഗണിച്ചത്.
2012 ഡിസംബര് 16നാണ് ഡല്ഹിയില് വെച്ച് 23 വയസ്സുള്ള പാരാമെഡിക്കല് വിദ്യാര്ത്ഥിനി കൂട്ടബലാത്സംഗത്തിന് ഇരയാകുന്നത്. പ്രായപൂര്ത്തിയാകാത്ത ഒരാള് ഉള്പ്പടെ ആറ് പ്രതികളാണ് കേസിലുണ്ടായിരുന്നത്. ഒന്നാംപ്രതി രാം സിങ് തീഹാര് ജയിലില് തടവില് കഴിയവെ തൂങ്ങിമരിച്ചു. പ്രായപൂര്ത്തിയാകാത്ത പ്രതിയെ ജൂവനൈല് നിയമപ്രകാരം മൂന്നുവര്ഷത്തെ തടവിന് ശിക്ഷിച്ചു. ശിക്ഷാ കാലാവധി പൂര്ത്തിയാക്കി ഇയാള് പുറത്തിറങ്ങി. മറ്റ് നാല് പേര്ക്കുള്ള മരണ വാറന്റ് ഡല്ഹി അഡീഷണല് കോടതി ജനുവരി 7ന് പുറപ്പെടുവിച്ചു. ജനുവരി 22ന് രാവിലെ 7 മണിക്ക് തീഹാര് ജയിലില് വധശിക്ഷ നടപ്പാക്കണമെന്നാണ് വാറന്റില് പറയുന്നത്.
