ന്യൂഡൽഹി  /  2026  / ഒക്ടോബർ 27 

കേന്ദ്ര ആരോഗ്യ കുടുംബക്ഷേമ മന്ത്രാലയത്തിൽ ജാഗ്രതാ ബോധവത്കരണ വാരാചരണത്തിന് സത്യനിഷ്ഠാ പ്രതിജ്ഞയോടെ തുടക്കം. ഒക്ടോബർ 26ന് ന്യൂഡൽഹിയിലെ കർത്തവ്യഭവൻ ഒന്നിൽ നടന്ന ചടങ്ങിൽ കേന്ദ്ര ആരോഗ്യ കുടുംബക്ഷേമ മന്ത്രി ജെ. പി. നഡ്ഡ മുതിർന്ന ഉദ്യോഗസ്ഥർക്ക് പ്രതിജ്ഞ ചൊല്ലിക്കൊടുത്തു. പൊതുഭരണത്തിൽ സത്യസന്ധതയും സുതാര്യതയും ഉത്തരവാദിത്തവും ധാർമിക പെരുമാറ്റവും ഉറപ്പാക്കാനും അഴിമതിരഹിത പൊതുസേവനത്തിനുമുള്ള പ്രതിബദ്ധത മന്ത്രാലയം ആവർത്തിച്ചു.

നഡ്ഡയുടെ നേതൃത്വത്തിൽ പ്രതിജ്ഞ

കേന്ദ്ര ആരോഗ്യ കുടുംബക്ഷേമ സഹമന്ത്രിയും ആയുഷ് വകുപ്പിന്റെ സ്വതന്ത്ര ചുമതലയുള്ള മന്ത്രിയുമായ പ്രതാപ്‌റാവു ജാധവ്, കേന്ദ്ര ആരോഗ്യ കുടുംബക്ഷേമ സഹമന്ത്രി അനുപ്രിയ പട്ടേൽ എന്നിവരുടെ സാന്നിധ്യത്തിലായിരുന്നു പ്രതിജ്ഞാചടങ്ങ്. മന്ത്രാലയത്തിലെ മറ്റ് ഉദ്യോഗസ്ഥരും ജീവനക്കാരും അതത് ഓഫീസുകളിൽനിന്ന് ഓൺലൈനായി പങ്കെടുത്തു.

സത്യനിഷ്ഠയിലൂടെ സമൃദ്ധി എന്ന സന്ദേശം

സർദാർ വല്ലഭ്‌ഭായി പട്ടേലിന്റെ ജന്മവാർഷികമായ ഒക്ടോബർ 31 ഉൾപ്പെടുന്ന ആഴ്ചയിലാണ് എല്ലാ വർഷവും ജാഗ്രതാ ബോധവത്കരണ വാരം ആചരിക്കുന്നത്. ഇത്തവണ ഒക്ടോബർ 26 മുതൽ നവംബർ ഒന്നുവരെയാണ് വാരാചരണം. ‘സത്യനിഷ്ഠയിലൂടെ സമൃദ്ധി’ എന്നതാണ് പ്രമേയം.

നല്ല ഭരണത്തിനും പൊതുസ്ഥാപനങ്ങളിലുള്ള ജനവിശ്വാസത്തിനും സത്യസന്ധതയും സത്യനിഷ്ഠയും സുതാര്യതയും അനിവാര്യമായ അടിത്തൂണുകളാണെന്ന് ഈ പ്രമേയം ഓർമിപ്പിക്കുന്നു.

ഓഫീസുകളിൽ ബോധവത്കരണ പ്രവർത്തനങ്ങൾ

പ്രമേയത്തിന് അനുസൃതമായി ആരോഗ്യ കുടുംബക്ഷേമ വകുപ്പിന്റെ ജാഗ്രതാ വിഭാഗം വിവിധ പ്രവർത്തനങ്ങൾ നടത്തിവരികയാണ്. ജാഗ്രതാ ബോധവത്കരണ പ്രചാരണം 2026ന്റെ ഭാഗമായാണ് ഇവ സംഘടിപ്പിക്കുന്നത്. മന്ത്രാലയത്തിലെയും കീഴിലുള്ള ഓഫീസുകളിലെയും സ്ഥാപനങ്ങളിലെയും സംഘടനകളിലെയും ഉദ്യോഗസ്ഥർക്കും ജീവനക്കാർക്കും ജാഗ്രതാബോധം വളർത്തുകയും ധാർമിക പെരുമാറ്റം പ്രോത്സാഹിപ്പിക്കുകയുമാണ് ലക്ഷ്യം.

സ്ഥാപനങ്ങളുടെ ഉത്തരവാദിത്തം കൂടുതൽ ശക്തമാക്കാനും ഈ പ്രവർത്തനങ്ങൾ ലക്ഷ്യമിടുന്നു. സുതാര്യതയും ഉത്തരവാദിത്തവും നിലവിലുള്ള ചട്ടങ്ങൾ പാലിക്കുന്ന രീതിയും അടിസ്ഥാനമാക്കിയുള്ള തൊഴിൽ അന്തരീക്ഷം വളർത്താനാണ് ശ്രമം.

അഴിമതി ശ്രദ്ധയിൽപ്പെട്ടാൽ അറിയിക്കണം

നിയമവാഴ്ച ഉയർത്തിപ്പിടിക്കുമെന്നും ചുമതലകൾ നിർവഹിക്കുമ്പോൾ സത്യനിഷ്ഠയുടെയും സുതാര്യതയുടെയും ഉന്നത നിലവാരം പാലിക്കുമെന്നും ഉദ്യോഗസ്ഥരും ജീവനക്കാരും പ്രതിജ്ഞയെടുത്തു. പൊതുതാൽപര്യം മുൻനിർത്തി പ്രവർത്തിക്കണം, സ്വന്തം പെരുമാറ്റത്തിലൂടെ സത്യനിഷ്ഠ തെളിയിക്കണം, അഴിമതി ശ്രദ്ധയിൽപ്പെട്ടാൽ ബന്ധപ്പെട്ട അധികാരികളെ അറിയിക്കണം എന്നീ കാര്യങ്ങൾക്കും പ്രതിജ്ഞയിൽ ഊന്നൽ നൽകി.

അഴിമതിക്കെതിരായ പോരാട്ടം കൂട്ടുത്തരവാദിത്തം

അഴിമതി തടയുന്നതിൽ സർക്കാരിനും പൗരന്മാർക്കും സ്വകാര്യ മേഖലയ്ക്കും കൂട്ടുത്തരവാദിത്തമുണ്ടെന്ന് പ്രതിജ്ഞ ഓർമിപ്പിച്ചു. പൊതുജീവിതത്തിന്റെ എല്ലാ മേഖലകളിലും നിരന്തര ജാഗ്രത പുലർത്താനും സത്യസന്ധതയുടെയും സത്യനിഷ്ഠയുടെയും ഏറ്റവും ഉയർന്ന നിലവാരം പാലിക്കാനും ആഹ്വാനം ചെയ്തു.

സുതാര്യവും ഉത്തരവാദിത്തമുള്ളതും ഫലപ്രദവുമായ പൊതുഭരണത്തിന്റെ തത്വങ്ങൾക്ക് അനുസൃതമായി പ്രവർത്തിക്കുമെന്ന നിലപാടും മന്ത്രാലയം ആവർത്തിച്ചു. ഔദ്യോഗിക ചുമതലകൾ നിർവഹിക്കുമ്പോൾ ധാർമിക പെരുമാറ്റത്തിന്റെയും ഉത്തരവാദിത്തത്തിന്റെയും ഉയർന്ന നിലവാരം നിലനിർത്തുമെന്ന പ്രതിബദ്ധതയാണ് വാരാചരണത്തിലൂടെ വ്യക്തമാക്കിയത്.

.