മുക്കം, 2026 ജൂൺ 26 –

തിരുവമ്പാടി മണ്ഡലത്തിൽ അടുത്ത അഞ്ച് വർഷത്തിനുള്ളിൽ വിദ്യാഭ്യാസ രംഗത്ത് സമഗ്ര മാറ്റം ലക്ഷ്യമിട്ട് വിവിധ പദ്ധതികൾ നടപ്പാക്കുമെന്ന് സി. കെ. കാസിം എം.എൽ.എ അറിയിച്ചു. യുവാക്കൾക്ക് ആർട്ടിഫിഷ്യൽ ഇന്റലിജൻസ് സാക്ഷരത ഉൾപ്പെടെയുള്ള പരിശീലനം നൽകുന്ന നൈപുണ്യ വികസന കേന്ദ്രം, വിദ്യാർഥികളുടെ അഭിരുചിയും താൽപര്യവും ശാസ്ത്രീയമായി കണ്ടെത്തുന്ന കരിയർ അസസ്മെന്റ് സെന്റർ, സംസ്ഥാന, ദേശീയ മത്സരപരീക്ഷകൾക്കുള്ള പരിശീലന കേന്ദ്രം, സംരംഭകത്വ പരിശീലനം, തൊഴിൽ അന്വേഷകരെ തൊഴിൽദാതാക്കളുമായി ബന്ധിപ്പിക്കുന്ന ഓട്ടോമേറ്റഡ് എക്സ്ചേഞ്ച് പോർട്ടൽ എന്നിവ പദ്ധതിയുടെ ഭാഗമാകും.

പദ്ധതിയുടെ ആദ്യഘട്ടമായി എസ്.എസ്.എൽ.സി, പ്ലസ് ടു പരീക്ഷകളിൽ മുഴുവൻ എ പ്ലസ് നേടിയവരെയും എൽ.എസ്.എസ്, യു.എസ്.എസ്, എൻ.എം.എം.എസ് തുടങ്ങിയ സ്കോളർഷിപ്പുകൾ നേടിയവരെയും ആദരിക്കുന്ന ചടങ്ങ് ഞായറാഴ്ച മുക്കം ഓർഫനേജ് ഓഡിറ്റോറിയത്തിൽ നടക്കും.

ഉച്ചയ്ക്ക് രണ്ടിന് നടക്കുന്ന ചടങ്ങിൽ പ്രിയങ്ക ഗാന്ധി എം.പി വിദ്യാഭ്യാസ പദ്ധതിയുടെ ഉദ്ഘാടനവും പദ്ധതി പ്രഖ്യാപനവും നിർവഹിക്കും. വിദ്യാഭ്യാസ മേഖലയിലെ പുതിയ സംരംഭങ്ങൾക്ക് ഇതോടെ തുടക്കമാകുമെന്നാണ് സംഘാടകർ പ്രതീക്ഷിക്കുന്നത്.