ഹൈദരാബാദ്, 2026 ജൂൺ 24

യുവാക്കൾ നയിക്കുന്ന ആറു സംരംഭങ്ങൾ യുവ കോ-ലാബ് ദേശീയ നവീകരണ വെല്ലുവിളി 2026-ൽ ജേതാക്കളായി തിരഞ്ഞെടുക്കപ്പെട്ടു. സുസ്ഥിര വസ്ത്രനിർമാണം, ചാക്രിക സമ്പദ്‌വ്യവസ്ഥ, സുസ്ഥിര ഭക്ഷ്യസംവിധാനങ്ങൾ, ജലസംരക്ഷണം തുടങ്ങിയ മേഖലകളിലെ നവീന ആശയങ്ങൾക്കാണ് അംഗീകാരം ലഭിച്ചത്. 28 സംസ്ഥാനങ്ങളിൽ നിന്നായി ലഭിച്ച 350-ലധികം അപേക്ഷകളിൽ നിന്നാണ് ഇവരെ തെരഞ്ഞെടുത്തത്. ഹൈദരാബാദിലെ ടി-ഹബ്ബിൽ നടന്ന സമാപന പരിപാടിയിലാണ് വിജയികളെ പ്രഖ്യാപിച്ചത്.

ഐക്യരാഷ്ട്ര വികസന പദ്ധതി ഇന്ത്യയും സിറ്റി ഫൗണ്ടേഷനും ചേർന്ന്, അടൽ ഇന്നൊവേഷൻ മിഷന്റെ പങ്കാളിത്തത്തോടെയും ടി-ഹബ് ഫൗണ്ടേഷന്റെ നടപ്പാക്കലിലൂടെയുമാണ് ഈ സംരംഭം സംഘടിപ്പിച്ചത്. കർശനമായ തിരഞ്ഞെടുപ്പ് നടപടികൾക്ക് ശേഷം 50 സംരംഭങ്ങളെ മൂന്ന് മാസത്തെ ശേഷിവികസന പരിപാടിയിലേക്ക് ഉൾപ്പെടുത്തി. തുടർന്ന് ജൂൺ 15 മുതൽ 19 വരെ നടന്ന പ്രാദേശിക പരിശീലന ക്യാമ്പിൽ മുൻനിര 20 സംരംഭങ്ങൾ പങ്കെടുത്തു. അന്തിമ വിലയിരുത്തലിന് ശേഷം ആറു സംരംഭങ്ങളെയാണ് തിരഞ്ഞെടുത്തത്. നവപ്രയോഗ ലാബ്സ്, അൺബബിൾ, ഇക്കോറിനോവ സൊല്യൂഷൻസ് എന്നിവ ജേതാക്കളായപ്പോൾ ഇക്കോ കുഷൻ, വാസുദേവ ഇന്നൊവേഷൻസ്, വിമെനാസ്റ്റിക് കോ എന്നിവ റണ്ണറപ്പുകളായി.

2017-ൽ ആരംഭിച്ച യുവ കോ-ലാബ്, സുസ്ഥിര വികസന ലക്ഷ്യങ്ങൾ കൈവരിക്കാൻ യുവാക്കളുടെ നേതൃത്വവും സംരംഭകത്വവും പ്രോത്സാഹിപ്പിക്കുന്ന ഒരു വേദിയാണ്. ഈ വർഷം തിരഞ്ഞെടുക്കപ്പെട്ട സംരംഭങ്ങളിൽ 40 ശതമാനത്തിലധികവും വനിതകൾ നയിക്കുന്നവയാണെന്ന് സംഘാടകർ അറിയിച്ചു. ജേതാക്കൾക്ക് മൂന്നര ലക്ഷം രൂപ വീതം വിത്ത് ധനസഹായവും റണ്ണറപ്പുകൾക്ക് രണ്ട് ലക്ഷത്തി ഇരുപതിനായിരം രൂപ വീതം ധനസഹായവും നൽകും. ശേഷിവികസന അവസരങ്ങളും വിപുലമായ സഹകരണ ശൃംഖലയിലേക്കുള്ള പ്രവേശനവും ഇവർക്കു ലഭിക്കും.