തിരുവനന്തപുരം, 2026 ജൂൺ 24 –

തിരുവനന്തപുരം നഗരസഭയിലെ 20 ബിജെപി കൗൺസിലർമാരുടെ സത്യപ്രതിജ്ഞ ഹൈക്കോടതി റദ്ദാക്കിയ സംഭവത്തിൽ ഇത് തിരിച്ചടിയല്ലെന്ന് മേയർ വി വി രാജേഷ് പ്രതികരിച്ചു. കോടതി ഒരു നിയമപരമായ നിരീക്ഷണം നടത്തി വിധി പറഞ്ഞതാണെന്നും കൗൺസിലർമാർ വിധി പൂർണമായും അനുസരിക്കുമെന്നും അദ്ദേഹം പറഞ്ഞു. വീണ്ടും സത്യപ്രതിജ്ഞ നടത്താൻ ഏത് സമയത്തും തയ്യാറാണെന്നും റിപ്പോർട്ടറിനോട് സംസാരിക്കവെ വ്യക്തമാക്കി.

മുൻപും സമാന രീതിയിൽ പലരും വിവിധ ദൈവങ്ങളുടെ പേരിൽ സത്യപ്രതിജ്ഞ ചെയ്തിട്ടുണ്ടെന്നും എന്നാൽ അത്തരം വിഷയങ്ങളിൽ ബിജെപി പരാതി നൽകിയിട്ടില്ലെന്നും അദ്ദേഹം പറഞ്ഞു. ഹൈക്കോടതി 24 മണിക്കൂറിനകം സത്യപ്രതിജ്ഞ ചെയ്യാൻ നിർദേശിച്ചാലും അത് പാലിക്കുമെന്നും ഭരണസമിതി കൂടുതൽ കരുത്തോടെ മുന്നോട്ട് പോകുമെന്നും കൂട്ടിച്ചേർത്തു. വധശ്രമക്കേസിൽ അറസ്റ്റിലായ കൗൺസിലർ സുഗതന്റെ സത്യപ്രതിജ്ഞയും ഇതോടൊപ്പം നടത്തുമെന്നും അദ്ദേഹം അറിയിച്ചു.

നാലാഴ്ചയ്ക്കകം വീണ്ടും സത്യപ്രതിജ്ഞ നടത്തണമെന്നാണ് കോടതി നിർദേശിച്ചിരിക്കുന്നതെന്നും കൗൺസിലർമാർ അയോഗ്യരാണെന്ന് വിധിയിൽ എവിടെയും പറയുന്നില്ലെന്നും മേയർ ചൂണ്ടിക്കാട്ടി. അതേസമയം, കൗൺസിലർമാർ മതനിരപേക്ഷത ഉയർത്തിപ്പിടിക്കേണ്ടതായിരുന്നുവെന്നും അന്ന് അതല്ല നടന്നതെന്നും ഹർജിക്കാരനായ സിപിഐഎം നേതാവ് എസ് പി ദീപക് പ്രതികരിച്ചു. ദൈവങ്ങളുടെയും ബലിദാനികളുടെയും പേരിൽ നടത്തിയ സത്യപ്രതിജ്ഞ കേരള മുനിസിപ്പാലിറ്റി നിയമത്തിന് വിരുദ്ധമാണെന്ന നിരീക്ഷണത്തിന്റെ അടിസ്ഥാനത്തിലായിരുന്നു ഹൈക്കോടതി നടപടി.