ഇന്ത്യൻ നാവികസേനയുടെ സ്റ്റെൽത്ത് ഫ്രിഗേറ്റായ തർക്കാഷ് സീഷെൽസിലെ പോർട്ട് വിക്ടോറിയയിലെ സന്ദർശനം പൂർത്തിയാക്കി ജൂൺ 15ന് തുടർ വിന്യാസത്തിനായി പുറപ്പെട്ടു. സന്ദർശനത്തിന്റെ ഭാഗമായി ജൂൺ 13ന് കപ്പൽ പൊതുജനങ്ങൾക്കായി തുറന്നുകൊടുത്തിരുന്നു. ഇന്ത്യൻ വംശജരും പ്രാദേശിക സമൂഹാംഗങ്ങളും വലിയ ആവേശത്തോടെയാണ് കപ്പൽ സന്ദർശിച്ചത്. ഇതിലൂടെ ഇന്ത്യൻ നാവികസേനയുടെ പ്രവർത്തനങ്ങളെയും ശേഷികളെയും കുറിച്ച് കൂടുതൽ അറിയാൻ അവർക്ക് അവസരം ലഭിച്ചു.

സീഷെൽസുമായുള്ള ദീർഘകാല സൗഹൃദവും സമുദ്ര സഹകരണവും കൂടുതൽ ശക്തിപ്പെടുത്തുക എന്ന ലക്ഷ്യത്തോടെയാണ് കപ്പൽ വിവിധ പ്രൊഫഷണൽ ആശയവിനിമയങ്ങളും സാമൂഹിക സേവന പ്രവർത്തനങ്ങളും നയതന്ത്ര ഇടപെടലുകളും നടത്തിയത്. കപ്പലിലെ മെഡിക്കൽ സംഘം പ്രാദേശിക സമൂഹത്തിലെ മുതിർന്നവർക്കായി മാനുഷിക സഹായ പരിപാടിയും സംഘടിപ്പിച്ചു. പ്രാഥമിക ചികിത്സയും അടിസ്ഥാന ആരോഗ്യപരിശോധനയും നൽകി. ആവശ്യമായ മരുന്നുകളും ഭക്ഷ്യസാധനങ്ങളും വിതരണം ചെയ്തു. കപ്പലിൽ നടന്ന സാംസ്കാരിക സായാഹ്നത്തിൽ സീഷെൽസ് ഉപരാഷ്ട്രപതി അലിക്സ് സെബാസ്റ്റ്യൻ പിള്ളൈയും നയതന്ത്ര പ്രതിനിധികളും ഇന്ത്യൻ ഹൈക്കമ്മിഷൻ പ്രതിനിധികളും പങ്കെടുത്തു.

ഈ സന്ദർശനം ഇന്ത്യയും സീഷെൽസും തമ്മിലുള്ള അടുത്ത ബന്ധം വീണ്ടും ഉറപ്പിച്ചതായി പ്രതിരോധ മന്ത്രാലയം അറിയിച്ചു. സമുദ്ര സഹകരണം, പ്രാദേശിക സുരക്ഷ, മേഖലകളിലെ സുരക്ഷയ്ക്കും വളർച്ചയ്ക്കുമായുള്ള പരസ്പരവും സമഗ്രവുമായ പുരോഗതി എന്ന ദർശനത്തോടുള്ള ഇന്ത്യയുടെ പ്രതിബദ്ധതയും സന്ദർശനം അടിവരയിടുന്നതായി വിലയിരുത്തപ്പെടുന്നു.