തെരുവുനായയെ കണ്ട് ഭയന്ന് സ്കൂട്ടർ നിയന്ത്രണം വിട്ടു; വയോധിക മരിച്ചു

തൃശൂർ, 2026 ജൂൺ 17 –

തെരുവുനായ പിന്തുടർന്നതിനെ തുടർന്ന് നിയന്ത്രണം വിട്ട സ്കൂട്ടർ മറിഞ്ഞ് പരിക്കേറ്റ വയോധിക മരിച്ചു. തൃശൂർ മുറ്റിച്ചൂരിലാണ് അപകടം ഉണ്ടായത്. മുറ്റിച്ചൂർ സ്വദേശിനിയായ 75 വയസുകാരി സുഹ്റയാണ് മരിച്ചത്. ഇന്ന് ഉച്ചയോടെ മുറ്റിച്ചൂർ പാലത്തിന് സമീപത്ത് വച്ചാണ് സംഭവം നടന്നത്. ബന്ധുവിനൊപ്പം സ്കൂട്ടറിന്റെ പിൻസീറ്റിലിരുന്ന് യാത്ര ചെയ്യുന്നതിനിടെയായിരുന്നു അപകടം.

സ്കൂട്ടറിനടുത്തേക്ക് തെരുവുനായ്ക്കൾ ഓടിയെത്തിയതോടെ നായയെ കണ്ട് ഭയന്ന ബന്ധു വാഹനത്തിന്റെ വേഗത കൂട്ടി. ഇതോടെ സ്കൂട്ടറിന്റെ നിയന്ത്രണം നഷ്ടപ്പെടുകയും സുഹ്റ താഴെ വീഴുകയും ചെയ്തു. അപകടത്തിൽ തലയ്ക്ക് ഗുരുതരമായി പരിക്കേറ്റ സുഹ്റയെ ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

അതേസമയം, പാലക്കാട് ഷൊർണൂരിൽ മൂന്ന് പേരെ കടിച്ച തെരുവുനായയ്ക്ക് പേവിഷബാധ സ്ഥിരീകരിച്ചു. മലമ്പുഴയിലെ മൃഗസംരക്ഷണ വകുപ്പിന്റെ ലബോറട്ടറിയിൽ നടത്തിയ പരിശോധനയിലാണ് രോഗബാധ കണ്ടെത്തിയത്. വാർഡ് കൗൺസിലറുടെ ഭർത്താവ് ഉൾപ്പെടെ ശശികല, മണികണ്ഠൻ, കൃഷ്ണരാജ് എന്നിവർക്കാണ് നായയുടെ കടിയേറ്റത്. കഴിഞ്ഞ ഞായറാഴ്ച ഷൊർണൂർ മുതലിയാർ തെരുവിൽ നടന്ന സംഭവത്തിന് ശേഷം നായയെ ചത്ത നിലയിൽ കണ്ടെത്തിയിരുന്നു.