തിരുവനന്തപുരം, 2026 ജൂൺ 17 –

പിഎം ശ്രീ പദ്ധതിയുമായി ബന്ധപ്പെട്ട നിലവിലെ പ്രതിസന്ധിക്ക് കാരണം കഴിഞ്ഞ സർക്കാരിന്റെ നടപടികളാണെന്ന് വിദ്യാഭ്യാസ മന്ത്രി എൻ ഷംസുദ്ദീൻ പറഞ്ഞു. പദ്ധതിയിൽ ഒപ്പുവെച്ചതോടെയാണ് ഇപ്പോഴത്തെ സാഹചര്യം ഉണ്ടായതെന്നും അദ്ദേഹം വ്യക്തമാക്കി. വിഷയം പഠിക്കാൻ സർക്കാർ മന്ത്രിസഭാ ഉപസമിതി രൂപീകരിച്ചിട്ടുണ്ടെന്നും എല്ലാ വശങ്ങളും പരിശോധിച്ച ശേഷമാകും അന്തിമ നിലപാട് സ്വീകരിക്കുകയെന്നും മന്ത്രി അറിയിച്ചു.

പദ്ധതിയിൽ ഒപ്പുവെച്ചതിനെ തുടർന്ന് മുമ്പ് തടഞ്ഞുവെച്ചിരുന്ന ഫണ്ടുകൾ കേന്ദ്ര സർക്കാർ അനുവദിച്ചുവെന്ന് മന്ത്രി പറഞ്ഞു. എന്നാൽ പദ്ധതിയിൽ ഒപ്പുവെച്ചതിന് ശേഷമാണ് സർക്കാർ തന്നെ വിവിധ തടസങ്ങൾ ചൂണ്ടിക്കാട്ടിയതെന്നും അദ്ദേഹം ആരോപിച്ചു. വിഷയത്തിൽ മുന്നണിക്കുള്ളിലും അഭിപ്രായഭിന്നതകൾ ഉയർന്നിരുന്നു. മന്ത്രിസഭയെയും സഖ്യകക്ഷികളെയും അറിയിക്കാതെയായിരുന്നു പദ്ധതിയിൽ ഒപ്പിടാനുള്ള തീരുമാനമെടുത്തതെന്നും ഷംസുദ്ദീൻ വിമർശിച്ചു.

അതേസമയം, കഴിഞ്ഞ സർക്കാർ പിഎം ശ്രീ പദ്ധതിയിൽ ഒപ്പുവെച്ചതിനാൽ കേരളം നിലവിൽ പദ്ധതിയുടെ ഭാഗമാണെന്ന് മുഖ്യമന്ത്രി വി ഡി സതീശൻ വ്യക്തമാക്കിയിരുന്നു. പദ്ധതിയുമായി ബന്ധപ്പെട്ട് 99 കോടിയിലധികം രൂപ ലഭിച്ചിട്ടുണ്ടെന്നും 106 കോടി രൂപ കേന്ദ്രം അനുവദിച്ചിട്ടുണ്ടെന്നും അദ്ദേഹം പറഞ്ഞു. കരിക്കുലം സ്വാതന്ത്ര്യത്തിൽ കേന്ദ്ര സർക്കാർ ഇടപെടരുതെന്നും പദ്ധതി നടപ്പാക്കുന്ന സ്കൂളുകൾ തിരഞ്ഞെടുക്കാനുള്ള അധികാരം സംസ്ഥാന സർക്കാരിന് ലഭിക്കണമെന്നുമാണ് സംസ്ഥാനത്തിന്റെ പ്രധാന നിബന്ധനകൾ. പദ്ധതിയുമായി ബന്ധപ്പെട്ട സംസ്ഥാനത്തിന്റെ നിലപാട് ഉപസമിതി കേന്ദ്ര സർക്കാരിനെ അറിയിക്കുമെന്നും മുഖ്യമന്ത്രി വ്യക്തമാക്കിയിരുന്നു.