കൊല്ലം: ശാസ്താംകോട്ട ശാസ്താംനടയില് യുവതിയെ ഭര്തൃഗൃഹത്തില് തൂങ്ങിമരിച്ച നിലയില് കണ്ടെത്തി. നിലമേല് കൈതോട് സ്വദേശിനി വിസ്മയ (24)യെ ആണ് 21/06/21 തിങ്കളാഴ്ച രാവിലെ മരിച്ച നിലയിൽ കണ്ടത്. സ്ത്രീധന പീഡനത്തെത്തുടര്ന്നുള്ള കൊലപാതകമാണെന്ന് ആരോപിച്ച് ബന്ധുക്കള് പൊലീസില് പരാതി നല്കി. സംഭവത്തില് വനിതാ കമ്മീഷന് സ്വമേധയാ കേസെടുത്തിട്ടുണ്ട്.
മോട്ടോര് വാഹന വകുപ്പ് ഉദ്യോഗസ്ഥനായ കിരണുമായി 2020 മാര്ച്ചിലായിരുന്നു വിസ്മയയുടെ വിവാഹം. ഭര്ത്താവ് നിരന്തരമായി തന്നെ മര്ദ്ദിച്ചിരുന്നെന്ന് നേരത്തെ വിസ്മയ ബന്ധുക്കള്ക്ക് സന്ദേശമയച്ചിരുന്നു. മര്ദ്ദനമേറ്റ ശരീരത്തിലെ മുറിവുകളുടെ ദൃശ്യങ്ങളും വിസ്മയ കൈമാറിയിരുന്നു.
ചിത്രങ്ങളില് വിസ്മയയുടെ കൈയ്യിലും കാലിലും അടക്കം അടി കൊണ്ട പാടുകളുണ്ട്. സ്ത്രീധനമായി കിട്ടിയ വണ്ടി കൊള്ളില്ലെന്ന് പറഞ്ഞ് ഭര്ത്താവ് മര്ദ്ദിച്ചെന്ന് വാട്സ്ആപ്പ് സന്ദേശത്തില് പറയുന്നു. ഈ സന്ദേശം ലഭിച്ച് മണിക്കൂറുകള്ക്ക് ശേഷമാണ് വിസ്മയയെ ഭര്തൃഗൃഹത്തില് തൂങ്ങി മരിച്ച നിലയില് കണ്ടെത്തിയത്. വിസ്മയയുടെ മരണത്തിന് പിന്നാലെ ഭര്ത്താവ് കിരണ്കുമാര് ഒളിവില് പോയിരിക്കുകയാണ്.
