ന്യൂഡൽഹി  / 2026  / നവംബർ 04

യുവാക്കൾക്കിടയിൽ തിരഞ്ഞെടുപ്പ് അവബോധം വളർത്താനും ജനാധിപത്യത്തിൽ അറിവോടെയും ഉത്തരവാദിത്വത്തോടെയും പങ്കെടുക്കാൻ പ്രോത്സാഹിപ്പിക്കാനും മേരാ യുവ ഭാരത് നടത്തുന്ന യുവസംവാദം കൂടുതൽ ഇടങ്ങളിലേക്ക്. കേന്ദ്ര യുവജനകാര്യ കായിക മന്ത്രാലയത്തിനു കീഴിലുള്ള മൈ ഭാരത്, രാജ്യവ്യാപകമായ ‘വികസിത് ഭാരത് യുവ സംവാദ്: നോ യുവർ വോട്ട്’ പ്രചാരണത്തിന്റെ ഭാഗമായി നവംബർ മൂന്നിന് ചൊവ്വാഴ്ച 24 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി 91 യുവസംവാദങ്ങൾ സംഘടിപ്പിച്ചു. 15,453 യുവാക്കളും യുവാക്കൾക്ക് പ്രചോദനമായ 90 പ്രമുഖ വ്യക്തിത്വങ്ങളും ജനപ്രതിനിധികളും പരിപാടികളിൽ പങ്കെടുത്തു. വോട്ടവകാശം, ജനാധിപത്യ മൂല്യങ്ങൾ, പൗരന്മാരുടെ ഉത്തരവാദിത്വങ്ങൾ എന്നിവ ചർച്ചയായി.

വടക്കേ ഇന്ത്യയിൽ ജമ്മു കശ്മീർ, ഹിമാചൽ പ്രദേശ്, ഉത്തരാഖണ്ഡ്, ഡൽഹി, ഹരിയാന, ഉത്തർപ്രദേശ് എന്നിവിടങ്ങളിലും തെക്കേ ഇന്ത്യയിൽ തമിഴ്നാട്, കേരളം, കർണാടക, പുതുച്ചേരി എന്നിവിടങ്ങളിലും പരിപാടികൾ നടന്നു. വടക്കുകിഴക്കൻ മേഖലയിൽ അരുണാചൽ പ്രദേശ്, അസം, മിസോറം, സിക്കിം, ത്രിപുര എന്നിവിടങ്ങളും കിഴക്കൻ മേഖലയിൽ ബിഹാർ, ഝാർഖണ്ഡ്, ഒഡീഷ, പശ്ചിമ ബംഗാൾ എന്നിവിടങ്ങളും പരിപാടിയുടെ ഭാഗമായി. മധ്യേന്ത്യയിൽ ഛത്തീസ്ഗഢിലും മധ്യപ്രദേശിലും പടിഞ്ഞാറൻ മേഖലയിൽ ഗുജറാത്തിലും മഹാരാഷ്ട്രയിലും രാജസ്ഥാനിലും യുവസംവാദങ്ങൾ സംഘടിപ്പിച്ചു.

ജനാധിപത്യത്തെ അടുത്തറിയാൻ വിദ്യാർഥികൾക്ക് അവസരം

ചൊവ്വാഴ്ചത്തെ പരിപാടികൾ ഉൾപ്പെടെ ഇതുവരെ 30 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി 311 യുവസംവാദങ്ങളാണ് നടന്നത്. ആകെ 59,408 യുവാക്കളും യുവാക്കൾക്ക് പ്രചോദനമായ 310 പ്രമുഖ വ്യക്തിത്വങ്ങളും പങ്കെടുത്തു. ജനാധിപത്യ നടപടിക്രമങ്ങൾ മനസ്സിലാക്കാനും തിരഞ്ഞെടുക്കപ്പെട്ട ജനപ്രതിനിധികളുമായി നേരിട്ട് സംസാരിക്കാനും വിദ്യാർഥികൾക്ക് ഇതിലൂടെ അവസരം ലഭിക്കുന്നു. പൗരന്മാരെന്ന നിലയിലുള്ള അവകാശങ്ങളും ഉത്തരവാദിത്വങ്ങളും കൂടുതൽ വ്യക്തമായി അറിയാനും പരിപാടി സഹായിക്കുന്നു.

ഡൽഹിയിൽ നടന്ന പരിപാടിയിൽ വിരമിച്ച ഐപിഎസ് ഉദ്യോഗസ്ഥൻ ഡോ. സത്യപാൽ സിങ് ജീവിതകാലം മുഴുവൻ പഠനം തുടരേണ്ടതിന്റെ പ്രാധാന്യം വിശദീകരിച്ചു. ജനാധിപത്യത്തെ രൂപപ്പെടുത്തുന്നതിൽ വോട്ടവകാശത്തിനുള്ള ശക്തിയും അദ്ദേഹം ചൂണ്ടിക്കാട്ടി. ഹിമാചൽ പ്രദേശിലെ മണ്ഡിയിൽ പ്രതിപക്ഷ നേതാവ് ജയറാം ഠാക്കൂറും നിയമസഭാംഗം പൂരൺ ചന്ദ് ഠാക്കൂറും വിദ്യാർഥികളുമായി സംസാരിച്ചു. സമകാലിക സംഭവങ്ങൾ അറിഞ്ഞിരിക്കണമെന്നും കാര്യങ്ങൾ വിമർശനാത്മകമായി വിലയിരുത്തണമെന്നും അവർ ആവശ്യപ്പെട്ടു. വസ്തുതകളെ അഭ്യൂഹങ്ങളിൽനിന്നും തെറ്റായ വിവരങ്ങളിൽനിന്നും വേർതിരിച്ചറിയണമെന്നും പറഞ്ഞു. ധരംശാലയിൽ നടന്ന സംവാദത്തിൽ കാംഗ്ര, ചമ്പ മേഖലകളിൽനിന്നുള്ള ലോക്സഭാംഗം ഡോ. രാജീവ് ഭരദ്വാജ് വിദ്യാർഥികളുടെ ചോദ്യങ്ങൾക്ക് മറുപടി നൽകി.

ആദ്യമായി വോട്ടുചെയ്യുന്നവരുടെ സംശയങ്ങൾക്ക് മറുപടി

ഗുജറാത്തിലെ ഭാവ്നഗർ, പാട്ടൺ, സൂറത്ത് എന്നിവിടങ്ങളിൽ നടന്ന പരിപാടികൾ വിദ്യാർഥികൾക്ക് വോട്ടവകാശത്തെയും തിരഞ്ഞെടുപ്പ് നടപടിക്രമങ്ങളെയും കുറിച്ചുള്ള സംശയങ്ങൾ തീർക്കാൻ അവസരമായി. ആദ്യമായി വോട്ടുചെയ്യാനൊരുങ്ങുന്ന വിദ്യാർഥികൾക്ക് ഇത് പ്രത്യേകിച്ച് സഹായകമായി. രാജസ്ഥാനിലെ ഹനുമാൻഗഢ്, പാലി, സീക്കർ എന്നിവിടങ്ങളിൽ പ്രാദേശിക ജനപ്രതിനിധികളും യുവാക്കൾക്ക് പ്രചോദനമായ പ്രമുഖ വ്യക്തിത്വങ്ങളും വിദ്യാർഥികളുമായി സംവദിച്ചു. ഹനുമാൻഗഢിൽ സ്വതന്ത്രവും നീതിപൂർവവുമായ വോട്ടെടുപ്പിനെക്കുറിച്ചുള്ള ചർച്ചയും ചോദ്യോത്തരവേളയും നടന്നു. ജനാധിപത്യ പ്രതിജ്ഞയും ചൊല്ലി.

ഉത്തർപ്രദേശിലെ ബല്ലിയയിൽ മൈ ഭാരതിന്റെ പ്രവർത്തനങ്ങൾ പരിചയപ്പെടുത്തുന്നതിനൊപ്പം ‘നോ യുവർ വോട്ട്’ വിഷയത്തിൽ ചർച്ചയും ജനാധിപത്യ പ്രതിജ്ഞയും നടന്നു. വികസിത് ഭാരത് യങ് ലീഡേഴ്സ് ഡയലോഗ് 2027, വികസിത് ഭാരത് യങ് പ്രൊഫഷണൽസ് എന്നീ പരിപാടികളും പരിചയപ്പെടുത്തി. ബിഹാറിലെ പരിപാടികളിൽ ജനാധിപത്യ പങ്കാളിത്തത്തെക്കുറിച്ചുള്ള അവതരണങ്ങളും ചർച്ചകളും നടന്നു. ഖഗരിയയിലും പൂർണിയയിലും അറിവുള്ള വോട്ടർമാരാകാനും ജനാധിപത്യം ശക്തിപ്പെടുത്തുന്നതിൽ പങ്കുവഹിക്കാനും ജനപ്രതിനിധികൾ യുവാക്കളെ പ്രോത്സാഹിപ്പിച്ചു. ബെഗുസരായ്, പട്ന, സഹർസ എന്നിവിടങ്ങളിൽ പങ്കെടുത്തവർ ജനാധിപത്യ പ്രതിജ്ഞയെടുത്തു. ഉത്തരവാദിത്വമുള്ള പൗരന്മാരായി പ്രവർത്തിക്കാനുള്ള പ്രതിബദ്ധതയും അവർ പുതുക്കി.

വ്യാജവാർത്തകളിൽ ജാഗ്രത വേണമെന്ന് യുവാക്കളോട് ആഹ്വാനം

ഛത്തീസ്ഗഢിലെ ദന്തേവാഡയിലും ജഷ്പുരിലും നടന്ന പരിപാടികൾ ജനാധിപത്യത്തിലും രാഷ്ട്രനിർമാണത്തിലും യുവാക്കൾക്കുള്ള പങ്ക് എടുത്തുപറഞ്ഞു. ദന്തേവാഡയിൽ നിയമസഭാംഗം ചൈത്രം അടാമി പങ്കെടുത്തു. യുവാക്കൾക്ക് പ്രചോദനമായ വ്യക്തിത്വമായി പങ്കെടുത്ത നന്ദനി ദീക്ഷിത് വോട്ടവകാശത്തെയും ഉത്തരവാദിത്വമുള്ള പൗരത്വത്തെയും കുറിച്ച് അവതരണം നടത്തി. ജഷ്പുരിൽ നിയമസഭാംഗം റായ്മുനി ഭഗത് വികസിത ഭാരതം കെട്ടിപ്പടുക്കുന്നതിൽ പങ്കാളികളാകാൻ യുവാക്കളോട് ആവശ്യപ്പെട്ടു. സ്വതന്ത്രമായി കാര്യങ്ങൾ വിലയിരുത്തണമെന്നും വ്യാജവാർത്തകൾക്കും തെറ്റായ വിവരങ്ങൾക്കും എതിരെ ജാഗ്രത പാലിക്കണമെന്നും അവർ പറഞ്ഞു.

മധ്യപ്രദേശിലെ അശോക്നഗർ, ദേവാസ്, ധാർ, ഇൻഡോർ, രാജ്ഗഢ്, സത്ന, ഷഹ്ഡോൾ, ടികംഗഢ്, ഉമരിയ ജില്ലകളിലും യുവസംവാദങ്ങൾ നടന്നു. ദേവാസിൽ യുവാക്കൾക്ക് പ്രചോദനമായ വ്യക്തിത്വമായി പങ്കെടുത്ത മുസ്കാൻ ഖരേ വിദ്യാർഥികളുമായുള്ള സംവാദത്തിന് നേതൃത്വം നൽകി. കായികരംഗത്തെ നേട്ടങ്ങൾക്ക് മാഹി വർമയെയും അദ്നാൻ മുഹമ്മദ് ബാദ്ഷായെയും ആദരിച്ചു. രാജ്ഗഢിൽ ലോക്സഭാംഗം റോഡ്മൽ സിങ് നഗർ പങ്കെടുത്തവരുമായി സംവദിച്ചു. ധാറിലെ പരിപാടിയിൽ നിയമസഭാംഗം നീന വിക്രം വർമ പങ്കെടുത്തു.

കർണാടകയിൽ സംവാദത്തിനൊപ്പം മൈ ഭാരത് രജിസ്ട്രേഷനും

കർണാടകയിലെ ബെംഗളൂരു റൂറലിൽ നടന്ന പരിപാടിയിൽ സംസ്ഥാന നിയമനിർമാണ കൗൺസിൽ അംഗം സി. ടി. രവി പങ്കെടുത്തു. വിദ്യാർഥികളുടെ ചോദ്യങ്ങൾക്ക് അദ്ദേഹം മറുപടി നൽകി. പങ്കെടുത്തവർ ജനാധിപത്യ പ്രതിജ്ഞയെടുക്കുകയും മൈ ഭാരത് പോർട്ടലിൽ രജിസ്റ്റർ ചെയ്യുകയും ചെയ്തു.

കോലാറിലെ പരിപാടിയിൽ മൈ ഭാരതിന്റെ പ്രവർത്തനങ്ങൾ പരിചയപ്പെടുത്തി. യുവാക്കൾക്ക് പ്രചോദനമായ വ്യക്തിത്വത്തിന്റെ അവതരണവും പ്രതിജ്ഞയെടുക്കലും പരിപാടിയുടെ ഭാഗമായി നടന്നു.

.