കുളുവിലെ സിന്ദൂരി മാതളം ദുബായിലേക്ക്; കർഷകർക്ക് ആഭ്യന്തര വിപണിയേക്കാൾ 50 ശതമാനം അധിക വില

കുളു, //2026/  നവംബർ 04

ഹിമാചൽ പ്രദേശിലെ കുളു ജില്ലയിൽനിന്ന് 1.3 മെട്രിക് ടൺ സിന്ദൂരി ഇനം മാതളം യുണൈറ്റഡ് അറബ് എമിറേറ്റ്സിലെ ദുബായിലേക്ക് കയറ്റുമതി ചെയ്തു. കേന്ദ്ര വാണിജ്യ വ്യവസായ മന്ത്രാലയത്തിന് കീഴിലുള്ള കാർഷിക, സംസ്കരിച്ച ഭക്ഷ്യോൽപ്പന്ന കയറ്റുമതി വികസന അതോറിറ്റിയായ അപേഡയാണ് ഇതിന് സൗകര്യമൊരുക്കിയത്. ഏകദേശം 600 കർഷകർ അംഗങ്ങളായ ഭുന്തർ കർഷക ഉൽപ്പാദക സംഘടനയെയും പ്രാദേശിക കർഷകരെയും കയറ്റുമതിക്കാരുമായി ബന്ധിപ്പിച്ചാണ് പദ്ധതി നടപ്പാക്കിയത്. പങ്കെടുത്ത കർഷകർക്ക് നിലവിലെ ആഭ്യന്തര വിപണി വിലയേക്കാൾ 50 ശതമാനം അധിക വില ലഭിച്ചു.

രണ്ടുകിലോ വീതമുള്ള 650 പെട്ടികൾ

ഉത്തർപ്രദേശ് ആസ്ഥാനമായ അമാമ എക്സ്പോർട്സാണ് മാതളം കയറ്റുമതി ചെയ്തത്. രണ്ടുകിലോ വീതമുള്ള 650 പെട്ടികളിലായാണ് ചരക്ക് അയച്ചത്. പ്രാദേശിക കർഷകരിൽനിന്നും ഭുന്തർ കർഷക ഉൽപ്പാദക സംഘടനയിൽനിന്നും നേരിട്ടാണ് മാതളം ശേഖരിച്ചത്. സംഭരണത്തിനും വിവിധ വിഭാഗങ്ങൾ തമ്മിലുള്ള ഏകോപനത്തിനും കുളു ജില്ലാ ഉദ്യാനകൃഷി ഭരണവിഭാഗം പിന്തുണ നൽകി. ഹിമാചലിലെ ഉദ്യാനകൃഷി ഉൽപ്പന്നങ്ങൾക്ക് രാജ്യാന്തര വിപണിയിലെത്താനുള്ള അവസരമാണ് ഈ കൂട്ടായ്മ ഒരുക്കുന്നത്.

ചുവന്ന തൊലിയും മധുരവും പുളിയും ചേർന്ന രുചിയും

ഹിമാചൽ പ്രദേശിൽ കൃഷിചെയ്യുന്ന മാതള ഇനങ്ങളിൽ ഒന്നാണ് സിന്ദൂരി. ഭഗവ, കാണ്ഡാരി എന്നിവയും സംസ്ഥാനത്ത് കൃഷിചെയ്യുന്നുണ്ട്. ആകർഷകമായ ചുവന്ന തൊലി, നീരുനിറഞ്ഞ മണികൾ, മധുരവും പുളിയും ചേർന്ന രുചി എന്നിവയാണ് സിന്ദൂരിയുടെ പ്രത്യേകതകൾ. നേരിട്ട് കഴിക്കാൻ അനുയോജ്യമായ ഈ ഇനത്തിന് കയറ്റുമതി വിപണിയിലും സാധ്യതയുണ്ട്. കർഷകരിൽനിന്നുള്ള നേരിട്ടുള്ള സംഭരണവും ഉൽപ്പാദക സംഘടനകൾ വഴിയുള്ള കൂട്ടായ പങ്കാളിത്തവും വിപണിബന്ധം ശക്തമാക്കുന്നതിൽ വഹിക്കുന്ന പങ്കും ഈ സംരംഭം വ്യക്തമാക്കുന്നു. ഇത്തരം കയറ്റുമതി ബന്ധങ്ങൾ കർഷകർക്ക് കൂടുതൽ വിൽപ്പനാവസരങ്ങൾ നൽകുകയും ഗുണമേന്മയ്ക്ക് പ്രാധാന്യം നൽകിയുള്ള ഉൽപ്പാദനത്തെ പ്രോത്സാഹിപ്പിക്കുകയും ചെയ്യും. കാർഷിക കയറ്റുമതിയിൽ ഉൽപ്പാദക സംഘടനകളുടെ പങ്കാളിത്തം വർധിപ്പിക്കാനും ഇവ സഹായിക്കും.

എമിറേറ്റ്സിലേക്ക് 259 കോടി ഡോളറിന്റെ കയറ്റുമതി

2025–26 സാമ്പത്തികവർഷത്തിൽ അപേഡയുടെ പട്ടികയിൽ ഉൾപ്പെടുന്ന ഏകദേശം 259 കോടി ഡോളർ മൂല്യമുള്ള കാർഷിക, സംസ്കരിച്ച ഭക്ഷ്യോൽപ്പന്നങ്ങൾ ഇന്ത്യ എമിറേറ്റ്സിലേക്ക് കയറ്റുമതി ചെയ്തു. ഏകദേശം 38.1 ലക്ഷം മെട്രിക് ടണ്ണായിരുന്നു ആകെ അളവ്. വാങ്ങുന്നവരുടെ ആവശ്യകത, ഗുണനിലവാര നിബന്ധനകൾ, ബാധകമായ ഇറക്കുമതി ചട്ടങ്ങൾ എന്നിവയ്ക്ക് വിധേയമായി ഹിമാചലിലെ ഉദ്യാനകൃഷി ഉൽപ്പന്നങ്ങൾക്കും ഈ വിപണിയിൽ അവസരമുണ്ട്. അപേഡ ചെയർമാൻ അഭിഷേക് ദേവ് മാതളത്തിന്റെ കയറ്റുമതി ഔദ്യോഗികമായി ഫ്ലാഗ് ഓഫ് ചെയ്തു. അപേഡ ഉദ്യോഗസ്ഥർ, ഉദ്യാനകൃഷി വകുപ്പ് പ്രതിനിധികൾ, കയറ്റുമതിക്കാർ, കർഷക ഉൽപ്പാദക സംഘടനകൾ, പങ്കാളികളായ കർഷകർ എന്നിവർ ചടങ്ങിൽ പങ്കെടുത്തു. പ്രാദേശിക ഉദ്യാനകൃഷി ഉൽപ്പന്നങ്ങൾക്ക് കയറ്റുമതി അവസരങ്ങൾ ഒരുക്കുന്നതിൽ ഇവരും സർക്കാർ ഏജൻസികളും തമ്മിലുള്ള ഏകോപനത്തിന്റെ പ്രാധാന്യം പരിപാടി ചൂണ്ടിക്കാട്ടി.

ആപ്പിളിനപ്പുറം കൂടുതൽ ഉൽപ്പന്നങ്ങൾക്ക് സാധ്യത

നിലവിലുള്ള ആപ്പിൾ വ്യാപാരത്തിനപ്പുറം ഹിമാചലിന്റെ കാർഷിക കയറ്റുമതിയിൽ കൂടുതൽ ഉൽപ്പന്നങ്ങൾ ഉൾപ്പെടുത്താനുള്ള ശ്രമങ്ങൾക്ക് കുളുവിലെ മാതളത്തിന്റെ ദുബായ് കയറ്റുമതി കരുത്തേകുന്നു. മാതളം, പെർസിമൺ പഴം, കുരുവുള്ള പഴവർഗങ്ങൾ, പഴച്ചാറുകൾ, നേരിട്ട് കഴിക്കാവുന്ന ഭക്ഷ്യോൽപ്പന്നങ്ങൾ എന്നിവയ്ക്ക് വിദേശവിപണി കണ്ടെത്താനുള്ള സാധ്യത സംസ്ഥാനത്തിനുണ്ട്. ഗുണനിലവാര പരിപാലനം, വിപണിബന്ധങ്ങൾ, കയറ്റുമതി നിബന്ധനകൾ പാലിക്കൽ എന്നിവയിൽ തുടർച്ചയായി ശ്രദ്ധ നൽകുന്നത് പ്രാദേശിക കർഷകരുടെ അവസരങ്ങൾ വർധിപ്പിക്കും. രാജ്യാന്തര കാർഷിക വ്യാപാരത്തിൽ സംസ്ഥാനത്തിന്റെ പങ്കാളിത്തം ശക്തമാക്കാനും ഇത് സഹായിക്കും. ഇന്ത്യൻ കയറ്റുമതിക്കാർക്കും കർഷകർക്കും ഉൽപ്പാദക സംഘടനകൾക്കും രാജ്യാന്തര വിപണികളിലെത്താനും ഇന്ത്യയുടെ കാർഷിക, സംസ്കരിച്ച ഭക്ഷ്യോൽപ്പന്നങ്ങളുടെ ആഗോള വിപണി വിപുലീകരിക്കാനും അപേഡ കയറ്റുമതി സഹായപദ്ധതികളിലൂടെ പിന്തുണ തുടരുന്നു.

.

.