ന്യൂഡൽഹി  / 2026 /  നവംബർ 04

അരുണാചൽ പ്രദേശിലെ സിറോയിൽ നിന്ന് ഒന്നര മെട്രിക് ടൺ കിവി പഴം പരീക്ഷണാടിസ്ഥാനത്തിൽ ദുബായിലേക്ക് കയറ്റുമതി ചെയ്തു. കേന്ദ്ര വാണിജ്യ വ്യവസായ മന്ത്രാലയത്തിന് കീഴിലുള്ള കാർഷിക, സംസ്കരിച്ച ഭക്ഷ്യോൽപ്പന്ന കയറ്റുമതി വികസന അതോറിറ്റിയായ അപേഡയാണ് ഇതിന് സൗകര്യമൊരുക്കിയത്. നവംബർ മൂന്നിന് പുറത്തുവിട്ട അറിയിപ്പുപ്രകാരം, കിവി ദുബായിൽ വിജയകരമായി എത്തി. അൽ ഖുസൈസിലെ ലുലു ഹൈപ്പർമാർക്കറ്റിൽ പഴങ്ങൾ പ്രദർശിപ്പിക്കുകയും വിൽപ്പനയ്ക്കായി നിരത്തുകയും ചെയ്തു. അരുണാചലിലെ കിവിക്ക് അന്താരാഷ്ട്ര വിപണിയിലുള്ള സാധ്യത വിലയിരുത്താനും പ്രാദേശിക കർഷകർക്ക് കൂടുതൽ വിപണികൾ കണ്ടെത്താനുമാണ് ശ്രമം.

അരുണാചലിന്റെ പ്രത്യേകതയായി കിവി

വടക്കുകിഴക്കൻ മേഖലാ വികസന മന്ത്രാലയത്തിന് കീഴിലാണ് പദ്ധതി നടപ്പാക്കുന്നത്. ‘കിവി: അരുണാചൽ പ്രദേശിന്റെ സവിശേഷത’ എന്ന പേരിലുള്ള ബ്രാൻഡിങ് സംരംഭത്തിലൂടെ സംസ്ഥാനത്തെ കിവി മേഖലയെ പ്രോത്സാഹിപ്പിക്കുകയും ശക്തിപ്പെടുത്തുകയും ചെയ്യുകയാണ് ലക്ഷ്യം. അരുണാചൽ സർക്കാരിന്റെ വ്യാപാര വാണിജ്യ വകുപ്പും ഹോർട്ടികൾച്ചർ വകുപ്പും സഹകരിക്കുന്നു. സംസ്ഥാനത്തെ കിവി അന്താരാഷ്ട്ര വിപണികളിൽ പരിചയപ്പെടുത്തുക, ഉപഭോക്താക്കളുടെ പ്രതികരണം വിലയിരുത്തുക, പ്രാദേശിക കർഷകരുടെ കയറ്റുമതി അവസരങ്ങൾ വർധിപ്പിക്കാൻ വിപണിബന്ധങ്ങൾ ശക്തമാക്കുക എന്നിവയാണ് പ്രധാന ഉദ്ദേശ്യങ്ങൾ.

അരുണാചലിലെ ഉയർന്ന പ്രദേശങ്ങളിലെ കൃഷിസാഹചര്യങ്ങളും സ്വാഭാവിക പരിസ്ഥിതിയും പ്രത്യേക ഗുണനിലവാരവും രുചിയുമുള്ള കിവി ഉൽപ്പാദിപ്പിക്കാൻ സഹായിക്കുന്നു. ഉയർന്ന ഗുണമേന്മയുള്ള ഉൽപ്പന്നങ്ങൾക്കായുള്ള ആഭ്യന്തര വിപണിയിലും കയറ്റുമതിയിലും മൂല്യവർധിത ഉൽപ്പന്നങ്ങളുടെ നിർമാണത്തിലും ഇവയ്ക്ക് സാധ്യതയുണ്ട്. ഹേവാർഡ്, മോണ്ടി, അലിസൺ, ബ്രൂണോ എന്നിവയാണ് ഇവിടെ പ്രധാനമായി കൃഷിചെയ്യുന്ന ഇനങ്ങൾ. ഇതിൽ ഹേവാർഡ് ഇനത്തിന് അന്താരാഷ്ട്ര വിപണികളിൽ നല്ല ആവശ്യകതയുണ്ട്.

രുചിയും ഗുണനിലവാരവും ഉപഭോക്താക്കൾ വിലയിരുത്തും

കിവി ലുലു ഹൈപ്പർമാർക്കറ്റിലെ വിൽപ്പനശാലയിൽ എത്തിയതോടെ സംരംഭം കയറ്റുമതിയുടെ തുടക്കച്ചടങ്ങിനപ്പുറം ചില്ലറവിപണിയിലെ വിലയിരുത്തൽ ഘട്ടത്തിലേക്ക് കടന്നു. ഉപഭോക്താക്കൾക്ക് പഴം രുചിച്ചുനോക്കാനും അഭിപ്രായം അറിയിക്കാനും അവസരമൊരുക്കും. ഇതിലൂടെ പഴത്തിന്റെ സ്വീകാര്യതയും ആവശ്യകതയ്ക്കുള്ള സാധ്യതയും വിലയിരുത്താനാകും. ഉപഭോക്താക്കളുടെ ഇഷ്ടങ്ങൾ, അവർ പ്രതീക്ഷിക്കുന്ന ഗുണനിലവാരം, പൊതിയുന്ന രീതി, ഉൽപ്പന്നം അവതരിപ്പിക്കേണ്ട വിധം എന്നിവയെക്കുറിച്ചും വിവരം ലഭിക്കുമെന്നാണ് പ്രതീക്ഷ.

ഈ കണ്ടെത്തലുകൾ ഭാവിയിലെ വാണിജ്യ കയറ്റുമതിക്ക് തയ്യാറെടുക്കാനും അനുയോജ്യമായ വിപണികൾ കണ്ടെത്താനും കർഷകർ, സഹകരണ സംഘങ്ങൾ, കയറ്റുമതിക്കാർ എന്നിവരെ സഹായിക്കും. പ്രാദേശിക കിവി കർഷകരെ വിദേശവിപണികളുമായി ബന്ധിപ്പിച്ച് കൂടുതൽ വിൽപ്പനമാർഗങ്ങൾ തുറക്കാനും പദ്ധതിയിലൂടെ ലക്ഷ്യമിടുന്നു. തുടർന്നുള്ള കയറ്റുമതികളിലൂടെ കർഷകർക്ക് മെച്ചപ്പെട്ട വരുമാനത്തിനുള്ള അവസരമൊരുക്കാനും ശ്രമിക്കും. അന്താരാഷ്ട്ര വിപണിയിൽ അരുണാചൽ കിവിയുടെ സാന്നിധ്യം വിപുലീകരിക്കാൻ ആവശ്യമായ കാര്യങ്ങൾ തിരിച്ചറിയുന്നതിനും ഈ പരീക്ഷണ കയറ്റുമതി അടിസ്ഥാനമാകും.

തുടക്കച്ചടങ്ങിൽ മന്ത്രിയും കർഷകപ്രതിനിധികളും

കയറ്റുമതിയുടെ തുടക്കച്ചടങ്ങിൽ അരുണാചൽ പ്രദേശ് കൃഷി, അനുബന്ധ വകുപ്പുകളുടെ മന്ത്രി ഗബ്രിയേൽ ഡി. വാങ്‌സു പങ്കെടുത്തു. വ്യാപാര വാണിജ്യ മന്ത്രിയുടെ ഉപദേഷ്ടാവും നിയമസഭാംഗവുമായ ഡോ. മൊഹേഷ് ചായ്, സിറോ നിയമസഭാംഗം ഹാഗെ അപ്പ എന്നിവരും ചടങ്ങിലുണ്ടായിരുന്നു. കൃഷി, ഹോർട്ടികൾച്ചർ വകുപ്പുകളുടെ സ്പെഷ്യൽ സെക്രട്ടറി റിഷിത ഗുപ്ത, വ്യാപാര വാണിജ്യ സെക്രട്ടറി ബുള്ളോ മാമു, ഹോർട്ടികൾച്ചർ സെക്രട്ടറി കോജ് റിന്യ, ഷില്ലോങ്ങിലെ ഐസിഇആർ ഡയറക്ടർ കർദിർവേൽ ഗോവിന്ദസാമി എന്നിവരും പങ്കെടുത്തു. ബുള്ളോ മാമു ഇന്ത്യൻ റവന്യൂ സർവീസ് ഉദ്യോഗസ്ഥയാണ്.

കിവി ഗ്രോവേഴ്‌സ് കോഓപ്പറേറ്റീവ് സൊസൈറ്റിയുടെയും ഫെയർ എക്സ്പോർട്സ് ഇന്ത്യ പ്രൈവറ്റ് ലിമിറ്റഡിന്റെയും പ്രതിനിധികളും ചടങ്ങിൽ പങ്കെടുത്തു. അപേഡ ഉദ്യോഗസ്ഥർ, വ്യാപാര വാണിജ്യ, ഹോർട്ടികൾച്ചർ, കൃഷി വകുപ്പുകളിലെ ഉദ്യോഗസ്ഥർ, കയറ്റുമതി ചരക്കിനൊപ്പം പോകുന്ന കിവി കർഷകർ, പരിപാടിയുടെ മറ്റു പ്രതിനിധികൾ എന്നിവരും സന്നിഹിതരായിരുന്നു.

വടക്കുകിഴക്കൻ ഉൽപ്പന്നങ്ങൾക്ക് വിദേശവിപണി

വടക്കുകിഴക്കൻ മേഖലയിലെ കാർഷിക, തോട്ടവിള ഉൽപ്പന്നങ്ങളെ പ്രോത്സാഹിപ്പിക്കാനും അവയ്ക്ക് അന്താരാഷ്ട്ര വിപണികളിൽ പ്രവേശനം ലഭ്യമാക്കാനുമുള്ള പിന്തുണ അപേഡ തുടരുകയാണ്. അരുണാചലിലെ കിവി ദുബായിൽ വിജയകരമായി എത്തുകയും ചില്ലറവിൽപ്പനയ്ക്കായി നിരത്തുകയും ചെയ്തത് വിദേശവിപണിയിലെ സാധ്യതകൾ വിലയിരുത്താനുള്ള അവസരമാണ്. അന്താരാഷ്ട്ര വ്യാപാരത്തിൽ പങ്കാളികളാകാൻ പ്രാദേശിക കർഷകരെ തയ്യാറാക്കാനും ഈ സംരംഭം സഹായിക്കും.

.