ന്യൂഡൽഹി  / 2026  / ഒക്ടോബർ 19 

പൊലീസ് സ്മൃതിദിനമായ ഒക്ടോബർ 21 ബുധനാഴ്ച കേന്ദ്ര ആഭ്യന്തര, സഹകരണ മന്ത്രി അമിത് ഷാ ന്യൂഡൽഹിയിലെ ദേശീയ പൊലീസ് സ്മാരകത്തിൽ രക്തസാക്ഷികൾക്ക് ആദരമർപ്പിക്കും. ചടങ്ങിൽ അധ്യക്ഷത വഹിക്കുന്ന അദ്ദേഹം ലഹരിക്കെതിരായ രാജ്യവ്യാപക മോട്ടോർസൈക്കിൾ റാലിയുടെ ഭാഗമായി തൊണ്ണൂറോളം പൊലീസ് റൈഡർമാരുടെ യാത്രയും ഫ്ലാഗ് ഓഫ് ചെയ്യും. 1959 ഒക്ടോബർ 21ന് ലഡാക്കിലെ ഹോട്ട് സ്പ്രിങ്സിൽ ചൈനീസ് സൈന്യത്തിന്റെ പതിയിരുന്നുള്ള ആക്രമണത്തിൽ ജീവൻ നഷ്ടപ്പെട്ട പത്ത് പൊലീസുകാരുടെയും കർത്തവ്യനിർവഹണത്തിനിടെ വീരമൃത്യു വരിച്ച മറ്റെല്ലാ പൊലീസ് ഉദ്യോഗസ്ഥരുടെയും ഓർമയ്ക്കാണ് ദിനാചരണം.

ലഹരിക്കെതിരായ യാത്ര ഏകതാ നഗറിലേക്ക്

‘ലഹരിക്കെതിരായ പോരാട്ടം’ എന്ന ആശയത്തിലാണ് രാജ്യവ്യാപക മോട്ടോർസൈക്കിൾ റാലി സംഘടിപ്പിക്കുന്നത്. അമിത് ഷാ ഫ്ലാഗ് ഓഫ് ചെയ്യുന്ന സംഘത്തിൽ ജമ്മു കശ്മീർ, ലഡാക്ക്, ഹിമാചൽ പ്രദേശ്, ഉത്തരാഖണ്ഡ്, ഉത്തർപ്രദേശ്, പഞ്ചാബ്, ഹരിയാന, ചണ്ഡീഗഢ്, ഡൽഹി എന്നിവിടങ്ങളിൽനിന്നുള്ള പൊലീസ് റൈഡർമാരുണ്ടാകും.

കേന്ദ്ര സായുധ പൊലീസ് സേനകളായ സി.ആർ.പി.എഫ്., സി.ഐ.എസ്.എഫ്., ബി.എസ്.എഫ്., എസ്.എസ്.ബി., ഐ.ടി.ബി.പി., എൻ.എസ്.ജി. എന്നിവയുടെ പ്രതിനിധികളും പങ്കെടുക്കും. കേന്ദ്ര പൊലീസ് സംഘടനകളായ ആർ.പി.എഫ്., എൻ.ഡി.ആർ.എഫ്., എൻ.ഐ.എ. എന്നിവയിൽനിന്നുള്ളവരും സംഘത്തിലുണ്ടാകും. രാജ്യത്തെ എല്ലാ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും കേന്ദ്രസേനകളിലെയും പൊലീസ് റൈഡർമാർ ഗുജറാത്തിലെ ഏകതാ നഗറിലെത്തും. ഒക്ടോബർ 31ന് നടക്കുന്ന ഏകതാ പരേഡിൽ ഇവർ അണിനിരക്കും.

പത്ത് ധീരരുടെ ഓർമയിൽ തുടങ്ങിയ ദിനാചരണം

1959 ഒക്ടോബർ 21ന് ലഡാക്കിലെ ഹോട്ട് സ്പ്രിങ്സിൽ കനത്ത ആയുധങ്ങളുമായി എത്തിയ ചൈനീസ് സൈന്യം പതിയിരുന്ന് നടത്തിയ ആക്രമണത്തിലാണ് പത്ത് ധീര പൊലീസുകാർ ജീവൻ ബലിയർപ്പിച്ചത്. അന്നുമുതൽ എല്ലാ വർഷവും ഒക്ടോബർ 21 പൊലീസ് സ്മൃതിദിനമായി ആചരിക്കുന്നു. രാജ്യത്തിനുവേണ്ടി കർത്തവ്യനിർവഹണത്തിനിടെ പരമത്യാഗം ചെയ്ത എല്ലാ പൊലീസ് രക്തസാക്ഷികളെയും ഈ ദിവസം അനുസ്മരിക്കുന്നു.

പൊലീസുകാരുടെ ത്യാഗത്തിനും രാജ്യസുരക്ഷയും അഖണ്ഡതയും കാത്തുസൂക്ഷിക്കുന്നതിലുള്ള അവരുടെ നിർണായക പങ്കിനുമുള്ള അംഗീകാരമായാണ് ദേശീയ പൊലീസ് സ്മാരകം ഒരുക്കിയത്. ന്യൂഡൽഹിയിലെ ചാണക്യപുരിയിലുള്ള സ്മാരകം 2018ലെ പൊലീസ് സ്മൃതിദിനത്തിൽ പ്രധാനമന്ത്രി നരേന്ദ്ര മോദി രാജ്യത്തിന് സമർപ്പിച്ചു. ദേശീയമായ സ്വത്വബോധവും അഭിമാനവും ഒരേ ലക്ഷ്യത്തിനായുള്ള ഐക്യവും പൊതുവായ ചരിത്രത്തെയും ഭാവിയെയും കുറിച്ചുള്ള ബോധവും സ്മാരകം പൊലീസ് സേനകൾക്ക് നൽകുന്നു. സ്വന്തം ജീവൻ നൽകിയും രാജ്യത്തെ സംരക്ഷിക്കുമെന്ന പ്രതിബദ്ധതയും ഇത് ശക്തിപ്പെടുത്തുന്നു.

ത്യാഗത്തിന്റെ കഥ പറയുന്ന സ്മാരകം

കേന്ദ്ര ശിൽപം, ‘ധീരതയുടെ മതിൽ’, മ്യൂസിയം എന്നിവയാണ് സ്മാരകത്തിലെ പ്രധാന ഭാഗങ്ങൾ. ഒറ്റക്കൽ കരിങ്കല്ലിൽ തീർത്ത 30 അടി ഉയരമുള്ള കേന്ദ്ര സ്മൃതിശിൽപം പൊലീസുകാരുടെ കരുത്തിന്റെയും പ്രതിസന്ധികളെ അതിജീവിക്കാനുള്ള ശേഷിയുടെയും നിസ്വാർഥ സേവനത്തിന്റെയും പ്രതീകമാണ്. സ്വാതന്ത്ര്യത്തിനുശേഷം കർത്തവ്യനിർവഹണത്തിനിടെ ജീവൻ നഷ്ടപ്പെട്ട പൊലീസുകാരുടെ പേരുകളാണ് ധീരതയുടെ മതിലിൽ കൊത്തിവച്ചിരിക്കുന്നത്. അവരുടെ ധീരതയ്ക്കും ത്യാഗത്തിനുമുള്ള ശാശ്വത അംഗീകാരമാണിത്. ഇന്ത്യയിലെ പൊലീസ് പ്രവർത്തനത്തിന്റെ ചരിത്രവും കാലാനുസൃതമായ മാറ്റങ്ങളും അവതരിപ്പിക്കുന്ന പ്രദർശനമായാണ് മ്യൂസിയം വിഭാവനം ചെയ്തിരിക്കുന്നത്.

പൊലീസുകാർക്കും പൊതുജനങ്ങൾക്കും ഒരുപോലെ ആദരവോടെ സന്ദർശിക്കാവുന്ന തീർഥാടനകേന്ദ്രം കൂടിയാണ് സ്മാരകം. തിങ്കളാഴ്ച ഒഴികെയുള്ള എല്ലാ ദിവസവും പൊതുജനങ്ങൾക്ക് പ്രവേശനമുണ്ട്. എല്ലാ ശനി, ഞായർ ദിവസങ്ങളിലും വൈകുന്നേരം സൂര്യാസ്തമയത്തിന് ഒരു മണിക്കൂർ മുമ്പ് ആരംഭിക്കുന്ന ബാൻഡ് പ്രദർശനം, പരേഡ്, റിട്രീറ്റ് ചടങ്ങ് എന്നിവ കേന്ദ്ര സായുധ പൊലീസ് സേനകൾ ഇവിടെ സംഘടിപ്പിക്കുന്നു.

സംയുക്ത പരേഡും പുഷ്പചക്രാർപ്പണവും

മുൻവർഷങ്ങളിലേതുപോലെ ഇത്തവണയും രാജ്യത്തുടനീളം പൊലീസ് രക്തസാക്ഷികൾക്ക് ആദരമർപ്പിച്ച് സ്മൃതിദിനം ആചരിക്കും. ദേശീയ പൊലീസ് സ്മാരകത്തിലെ പ്രധാന ചടങ്ങിൽ കേന്ദ്ര സായുധ പൊലീസ് സേനകളും ഡൽഹി പൊലീസും ചേർന്ന് സംയുക്ത പരേഡ് നടത്തും. പതിവനുസരിച്ച് കേന്ദ്ര ആഭ്യന്തര മന്ത്രി അധ്യക്ഷത വഹിക്കും. കേന്ദ്ര ആഭ്യന്തര സഹമന്ത്രിമാർ, പൊലീസ് സേവന പശ്ചാത്തലമുള്ള പാർലമെന്റ് അംഗങ്ങൾ, കേന്ദ്ര സായുധ പൊലീസ് സേനകളുടെയും കേന്ദ്ര പൊലീസ് സംഘടനകളുടെയും മേധാവികൾ തുടങ്ങിയവർ പുഷ്പചക്രം അർപ്പിക്കും. വിരമിച്ച ഡയറക്ടർ ജനറൽമാർ, പൊലീസ് ഉദ്യോഗസ്ഥർ, മറ്റു വിശിഷ്ടാതിഥികൾ എന്നിവരും പങ്കെടുക്കും.

രക്തസാക്ഷികൾക്ക് ആദരമർപ്പിക്കുന്നതിനൊപ്പം അമിത് ഷാ സദസ്സിനെ അഭിസംബോധന ചെയ്യും. ഹോട്ട് സ്പ്രിങ്സിലെ രക്തസാക്ഷികൾക്കായി സമർപ്പിച്ച ബലിപീഠത്തിൽ അദ്ദേഹം പുഷ്പചക്രം അർപ്പിക്കുന്നതോടെ പരിപാടി സമാപിക്കും. ദൂരദർശൻ ചടങ്ങ് തത്സമയം സംപ്രേഷണം ചെയ്യും. പൊലീസ് വെബ്സൈറ്റുകളിലും തത്സമയ സംപ്രേഷണമുണ്ടാകും. ആകാശവാണിയും മറ്റ് മാധ്യമങ്ങളും പരിപാടി റിപ്പോർട്ട് ചെയ്യും.

ഒക്ടോബർ മുപ്പതുവരെ അനുസ്മരണ പരിപാടികൾ

അനുസ്മരണത്തിന്റെ ഭാഗമായി ഒക്ടോബർ 22 മുതൽ 30 വരെ കേന്ദ്ര സായുധ പൊലീസ് സേനകളും കേന്ദ്ര പൊലീസ് സംഘടനകളും ദേശീയ പൊലീസ് സ്മാരകത്തിൽ വിവിധ പരിപാടികൾ സംഘടിപ്പിക്കും. രക്തസാക്ഷികളുടെ കുടുംബാംഗങ്ങളുടെ സന്ദർശനം, പൊലീസ് ബാൻഡ് പ്രദർശനം, മോട്ടോർസൈക്കിൾ റാലികൾ, രക്തസാക്ഷികളുടെ ഓർമയ്ക്കായുള്ള ഓട്ടം, രക്തദാന ക്യാമ്പുകൾ എന്നിവ ഇതിലുണ്ടാകും.

കുട്ടികൾക്കായി ഉപന്യാസ, ചിത്രരചനാ മത്സരങ്ങളും നടത്തും. പൊലീസുകാരുടെ ത്യാഗവും ധീരതയും സേവനവും അവതരിപ്പിക്കുന്ന വീഡിയോ ചിത്രങ്ങളും പ്രദർശിപ്പിക്കും. ഇതേ കാലയളവിൽ രാജ്യത്തുടനീളമുള്ള എല്ലാ പൊലീസ് സേനകളും സമാനമായ പരിപാടികൾ സംഘടിപ്പിക്കും.