പഞ്ചാബിൽ ലഹരിവിരുദ്ധ പ്രവർത്തകൻ പർവീന്ദർ സിങ് ജോട്ട വെടിയേറ്റ് കൊല്ലപ്പെട്ട സംഭവത്തിൽ നിർണായക വിവരങ്ങൾ പുറത്തുവിട്ട് പൊലീസ്. ഒക്ടോബർ 13ന് മാൻസയിലെ മരുന്നുകടയിൽ നടന്ന വാക്കുതർക്കത്തിനിടെയാണ് 45 വയസ്സുകാരനായ പർവീന്ദർ കൊല്ലപ്പെട്ടത്. മരുന്നുകട ഉടമ അശ്വനി കുമാറാണ് വെടിയുതിർത്തതെന്ന് പൊലീസ് പറയുന്നു. ലഹരിക്കായി ദുരുപയോഗം ചെയ്യപ്പെടുന്ന മരുന്നുകൾ അനധികൃതമായി വിൽക്കുന്നുവെന്ന ആരോപണത്തെച്ചൊല്ലി കടയുടമയെ ചോദ്യം ചെയ്യുന്നതിനിടെയായിരുന്നു സംഭവം. പർവീന്ദർ ഫേസ്ബുക്കിൽ തത്സമയ സംപ്രേഷണം നടത്തുന്നതിനിടെയാണ് വെടിവയ്പുണ്ടായത്. സംഭവത്തിന് പിന്നാലെ പഞ്ചാബിൽ വലിയ പ്രതിഷേധമാണ് ഉയർന്നത്. കൊലപാതകത്തിൽ പ്രതിഷേധിച്ച് ഒക്ടോബർ 15ന് പഞ്ചാബിൽ ബന്ദും ആചരിക്കുന്നു.

കൊലപാതകത്തിന് മുമ്പ് അഞ്ച് ഫോൺവിളികൾ

പർവീന്ദറുമായുള്ള തർക്കത്തിനിടെ അശ്വനി കുമാർ അഞ്ച് ഫോൺവിളികൾ നടത്തിയെന്നാണ് പൊലീസ് കണ്ടെത്തൽ. ഇതിൽ നാലെണ്ണം മകനെയും ഒരെണ്ണം പിതൃസഹോദരനെയുമാണ് വിളിച്ചത്. സംഭവത്തിന്റെ അഞ്ച് മിനിറ്റും 38 സെക്കൻഡും ദൈർഘ്യമുള്ള ഫേസ്ബുക്ക് ലൈവ് ദൃശ്യങ്ങളിൽ ഈ ഫോൺവിളികൾ കാണാം. മകൻ കുളിക്കുകയായിരുന്നതിനാൽ ആദ്യത്തെ മൂന്ന് കോളുകളും എടുത്തില്ല. നാലാമത്തെ കോളാണ് സ്വീകരിച്ചത്. പിതൃസഹോദരൻ ആദ്യ കോളിൽ തന്നെ പ്രതികരിച്ചു. സഹായം തേടാനാണ് അശ്വനി ഇവരെ വിളിച്ചതെന്നാണ് പൊലീസിന്റെ വിശദീകരണം. എന്നാൽ ലഹരിമരുന്ന് കടത്തുകാരെയോ സ്വാധീനമുള്ള മറ്റാരെയെങ്കിലുമോ വിളിച്ചിരുന്നോ എന്ന സംശയവും ഉയർന്നിട്ടുണ്ട്.

അഞ്ച് കോളുകളും സാധാരണ മൊബൈൽ നെറ്റ്‌വർക്ക് വഴിയുള്ളതാണെന്ന് പൊലീസ് സ്ഥിരീകരിച്ചു. അതേസമയം, സംഭവസമയത്ത് വാട്സ്ആപ്പ് കോളുകളോ സന്ദേശങ്ങളോ അയച്ചിട്ടുണ്ടോ എന്നും പരിശോധിക്കുന്നുണ്ട്. ഇതുസംബന്ധിച്ച കൂടുതൽ വിവരങ്ങൾ പൊലീസ് പുറത്തുവിട്ടിട്ടില്ല. സുരക്ഷാ കാരണങ്ങളാൽ അശ്വനിയുടെ മകന്റെയും പിതൃസഹോദരന്റെയും പേരുകളും വെളിപ്പെടുത്തിയിട്ടില്ല. കൊലപാതകത്തിന് പിന്നാലെ രോഷാകുലരായ പർവീന്ദറിന്റെ അനുയായികൾ അശ്വനിയുടെ മരുന്നുകടയുടെ ഒരു ഭാഗം തകർക്കുകയും തീയിടുകയും ചെയ്തു. ഭരണകൂടത്തിന്റെ ജെസിബി ഉപയോഗിച്ച് കടയുടെ ഭാഗം പൊളിച്ചുതുടങ്ങിയതിന് പിന്നാലെയായിരുന്നു പ്രതിഷേധക്കാരുടെ നടപടി.

നേഹ ഷോറിയുടെ കൊലപാതകം വീണ്ടും ചർച്ചയിൽ

പർവീന്ദറിന്റെ കൊലപാതകം 2019ൽ പഞ്ചാബിൽ നടന്ന ഡ്രഗ് ഇൻസ്പെക്ടർ നേഹ ഷോറിയുടെ കൊലപാതകവും വീണ്ടും ചർച്ചയാക്കിയിരിക്കുകയാണ്. അന്ന് ഖരാറിലെ ഓഫീസിൽവച്ചാണ് മുതിർന്ന ഡ്രഗ് ഇൻസ്പെക്ടറായ നേഹ ഷോറിയെ മരുന്നുകട ഉടമ ബൽവീന്ദർ സിങ് വെടിവച്ചുകൊന്നത്. നേഹ നേരത്തെ ഇയാളുടെ മരുന്നുകടയുടെ ലൈസൻസ് റദ്ദാക്കിയിരുന്നു. ഭാര്യയ്ക്ക് പുതിയ മരുന്നുകട തുടങ്ങാനുള്ള ലൈസൻസും ലഭിച്ചിരുന്നില്ല. ഇതിലുള്ള വൈരാഗ്യമാണ് കൊലപാതകത്തിന് കാരണമെന്നായിരുന്നു പൊലീസിന്റെ കണ്ടെത്തൽ. നേഹയെ വെടിവച്ചതിന് പിന്നാലെ ബൽവീന്ദർ സ്വയം വെടിവച്ച് ജീവനൊടുക്കുകയും ചെയ്തു. എന്നാൽ നേഹ നടപടി സ്വീകരിച്ചിരുന്ന മരുന്നുവിതരണക്കാരും കൊലപാതകത്തിന് പിന്നിലുണ്ടെന്നായിരുന്നു കുടുംബത്തിന്റെ ആരോപണം.

രണ്ട് കൊലപാതകങ്ങളുടെയും സാഹചര്യങ്ങൾ വ്യത്യസ്തമാണെങ്കിലും ലഹരിക്കായി ദുരുപയോഗം ചെയ്യുന്ന മരുന്നുകളുടെ അനധികൃത വിൽപ്പനയാണ് വീണ്ടും ചർച്ചയാകുന്നത്. ലഹരിവിരുദ്ധ പ്രവർത്തകരുടെയും നിയമനടപടി സ്വീകരിക്കുന്ന ഉദ്യോഗസ്ഥരുടെയും സുരക്ഷയെക്കുറിച്ചും ആശങ്ക ഉയർന്നിട്ടുണ്ട്.

ലഹരിക്കായി മരുന്നുകളുടെ ദുരുപയോഗം

പഞ്ചാബിൽ ലഹരിമരുന്നുകൾക്കെതിരായ നടപടികൾ പ്രധാനമായും മയക്കുമരുന്നുകളെയും സിന്തറ്റിക് ലഹരിവസ്തുക്കളെയുമാണ് കേന്ദ്രീകരിച്ചിരുന്നത്. എന്നാൽ ഡോക്ടറുടെ കുറിപ്പടിയോടെ മാത്രം നൽകേണ്ട ചില മരുന്നുകൾ ലഹരിക്കായി ഉപയോഗിക്കുന്ന പ്രവണതയും വലിയ പ്രശ്നമായി മാറിയിരിക്കുകയാണ്.

നാഡീവേദന ഉൾപ്പെടെയുള്ള ആരോഗ്യപ്രശ്നങ്ങൾക്ക് ഉപയോഗിക്കുന്ന പ്രെഗബാലിൻ ഗുളികകളുടെ ദുരുപയോഗമാണ് പ്രധാന ആശങ്കകളിലൊന്ന്. പഞ്ചാബിലെ മാൽവ മേഖലയിൽ ഈ ഗുളികകൾ ‘ഘോഡെ വാലെ ക്യാപ്സ്യൂൾസ്’ എന്ന പേരിലും അറിയപ്പെടുന്നു. 2021ൽ മാൻസ ഭരണകൂടം ഡോക്ടറുടെ കുറിപ്പടിയില്ലാതെ 75 മില്ലിഗ്രാമിന് മുകളിലുള്ള പ്രെഗബാലിൻ ക്യാപ്സ്യൂളുകൾ വിൽക്കുന്നത് നിരോധിച്ചിരുന്നു. 2023ൽ ലഹരിക്ക് അടിമകളായ ചിലർ ഇത്തരം ഗുളികകളിലേക്ക് തിരിയുന്നതായി റിപ്പോർട്ടുകൾ പുറത്തുവന്നതോടെ വിഷയം വീണ്ടും ശ്രദ്ധിക്കപ്പെട്ടു.

സംസ്ഥാനത്ത് ‘സോംബി ഡ്രഗ്’ ഉപയോഗിക്കുന്നുവെന്ന തരത്തിലുള്ള പ്രചാരണങ്ങളും അടുത്തിടെ ഉയർന്നിരുന്നു. എന്നാൽ ഈ ആരോപണം പഞ്ചാബ് പൊലീസ് നിഷേധിച്ചിട്ടുണ്ട്. മരുന്നുകടകൾ വഴി ലഹരിക്കായി ഉപയോഗിക്കുന്ന മരുന്നുകൾ അനധികൃതമായി വിൽക്കുന്നുവെന്ന ആരോപണം പർവീന്ദർ നിരന്തരം ഉന്നയിച്ചിരുന്നു. ഇത്തരം സംഭവങ്ങൾ നേരിട്ട് ചോദ്യം ചെയ്യുകയും ദൃശ്യങ്ങൾ സമൂഹമാധ്യമങ്ങളിൽ പങ്കുവയ്ക്കുകയും ചെയ്തിരുന്നു. അദ്ദേഹത്തിന്റെ കൊലപാതകത്തോടെ അനധികൃത മരുന്നുവിൽപ്പന തടയുന്നതിൽ അധികൃതർ സ്വീകരിക്കുന്ന നടപടികളും ലഹരിവിരുദ്ധ പ്രവർത്തകരുടെ സുരക്ഷയും വീണ്ടും ചർച്ചയായിരിക്കുകയാണ്.