ഇന്ത്യയുടെ മരുന്നും ഇന്ത്യൻ വംശജരായ ഡോക്ടർമാരും അമേരിക്കയെ താങ്ങി നിർത്തുമ്പോഴും നമ്മുടെ ഭരണാധികാരികൾ ചികിത്സയ്ക്ക് അതേ അമേരിക്കയെ തന്നെ ആശ്രയിക്കുന്ന വൈരുദ്ധ്യം.

മയോ ക്ലിനിക്കിലേക്ക് കേരളത്തിൽ നിന്ന് ഒരു യാത്ര

വിവരാവകാശ രേഖകൾ പ്രകാരം മുൻ മുഖ്യമന്ത്രി രണ്ടാം ഭരണകാലത്ത് മാത്രം ചികിത്സയ്ക്കായി സർക്കാർ ഖജനാവിൽ നിന്ന് ചെലവാക്കിയത് തൊണ്ണൂറ്റി മൂന്ന് ലക്ഷത്തി ഇരുപത്തിനാലായിരത്തി ഇരുന്നൂറ്റി എൺപത്തി രണ്ട് രൂപയാണ്. 2022 ജനുവരി പതിനൊന്നു മുതൽ ഇരുപത്തിയാറു വരെ മിനസോട്ടയിലെ മയോ ക്ലിനിക്കിൽ ചികിത്സയ്ക്ക് ഇരുപത്തി ഒമ്പതു ലക്ഷത്തി എൺപത്തി രണ്ടായിരത്തി മുപ്പത്തി ഒമ്പതു രൂപ. അതേ വർഷം ഏപ്രിൽ ഇരുപത്തിയാറു മുതൽ മേയ് ഒമ്പതു വരെ വീണ്ടും നാൽപ്പത്തി രണ്ടു ലക്ഷത്തി ഇരുപത്തി ഏഴായിരത്തി നാനൂറ്റി നാൽപ്പത്തി മൂന്നു രൂപ. ഇതിനു പുറമെ ഭാര്യയുടെ ചികിത്സയ്ക്കായി എഴുപത്തി നാലു ലക്ഷത്തി തൊണ്ണൂറ്റി ഒമ്പതിനായിരത്തി തൊള്ളായിരത്തി മുപ്പത്തി രണ്ടു രൂപയും സർക്കാർ ഉത്തരവിലൂടെ അനുവദിച്ചു. 2021 മുതൽ 2022 വരെയുള്ള കാലയളവിൽ മുഖ്യമന്ത്രിയും കുടുംബവും അമേരിക്കയിലും കേരളത്തിലുമായി നടത്തിയ ചികിത്സയുടെ തുകയാണിത്.

ദേശീയ തലത്തിൽ കണക്ക് ഇല്ലാത്ത ചെലവ്

കേന്ദ്ര തലത്തിൽ കഴിഞ്ഞ അഞ്ചു വർഷത്തിനിടെ ഭരണാധികാരികൾ അമേരിക്കയിൽ ചികിത്സയ്ക്ക് പോയതിന്റെ ആകെ ചെലവ് എത്രയെന്ന് കൃത്യമായ ഔദ്യോഗിക കണക്ക് പൊതുജനത്തിന് ലഭ്യമല്ല. മുൻ കാലത്ത് മുപ്പത്തി ഏഴു കേസുകൾക്ക് വിദേശ ചികിത്സയ്ക്കായി ഒരു കോടി മുപ്പത്തി എട്ടു ലക്ഷം രൂപയും എൺപത്തി നാലായിരം പൗണ്ടും അമ്പത്തി മൂവായിരം ഡോളറും ചെലവായതായി കേന്ദ്ര ആരോഗ്യ മന്ത്രാലയം തന്നെ കോടതിയിൽ നൽകിയ സത്യവാങ്മൂലത്തിൽ പറയുന്നു. എന്നാൽ ഇപ്പോൾ മുൻ ഉന്നത പദവി വഹിച്ചവർക്ക് വിദേശ ചികിത്സയ്ക്ക് സർക്കാർ പണം നൽകുന്നത് സുപ്രീം കോടതി റദ്ദാക്കിയിട്ടുണ്ട്. സേവനത്തിലുള്ള ഉന്നത ഉദ്യോഗസ്ഥർക്കും കുടുംബത്തിനും മാത്രമേ സങ്കീർണ്ണമായ ഹൃദയ ശസ്ത്രക്രിയ, മജ്ജ മാറ്റിവെക്കൽ തുടങ്ങിയവയ്ക്ക് വിദേശത്തേക്ക് പോകാൻ അനുമതിയുള്ളൂ.

മരുന്നും ഡോക്ടർമാരും ഇന്ത്യയിൽ നിന്ന് തന്നെ

വിരോധാഭാസം എന്തെന്നാൽ അമേരിക്കക്കാരൻ കഴിക്കുന്ന മരുന്ന് തന്നെ ഇന്ത്യൻ ആണ്. 2024-25 ൽ ഇന്ത്യ ലോകത്തേക്ക് വിറ്റത് മൂവായിരത്തി നാൽപ്പത്തി ആറു കോടി ഡോളറിന്റെ മരുന്ന്. അതിൽ തൊള്ളായിരത്തി എൺപത് കോടി ഡോളറിന്റെ മരുന്ന് വാങ്ങിയത് അമേരിക്ക മാത്രം. അമേരിക്കയിൽ ഉപയോഗിക്കുന്ന പകർപ്പ് മരുന്നുകളുടെ നാൽപ്പത് ശതമാനവും ഇന്ത്യയിൽ നിന്നാണ്. ഈ മരുന്നുകൾ ഇല്ലാതായാൽ അമേരിക്കൻ ആരോഗ്യ ഇൻഷുറൻസ് തകരുമെന്നതിനാലാണ് അമേരിക്കൻ വാണിജ്യ വകുപ്പ് തന്നെ പകർപ്പ് മരുന്നുകൾക്ക് ചുങ്കം ഇല്ല എന്ന് പ്രഖ്യാപിച്ചത്. അത് ഇന്ത്യൻ മരുന്നിനെ ഒഴിവാക്കാനല്ല, അമേരിക്കയെ രക്ഷിക്കാനാണ്.

മരുന്ന് മാത്രമല്ല ഡോക്ടർമാരും. അമേരിക്കയിൽ ആകെ ഒമ്പതു ലക്ഷത്തി എൺപത്തി ഏഴായിരം ഡോക്ടർമാരിൽ അമ്പത്തി ഒമ്പതിനായിരം പേർ ഇന്ത്യക്കാരാണ്. ഇത് കുടിയേറ്റ ഡോക്ടർമാരിൽ ഇരുപത്തി രണ്ടു ശതമാനം. അതായത് അമേരിക്കയിൽ ഓരോ ഇരുപതു ഡോക്ടർമാരിൽ ഒരാൾ ഇന്ത്യൻ വംശജൻ.

കേരളം ആരോഗ്യത്തിൽ ഒന്നാമൻ എന്ന് പറയുമ്പോഴും ഭരണാധികാരി ചികിത്സയ്ക്ക് അമേരിക്കയിലേക്ക് പോകുന്നതും അമേരിക്ക ചികിത്സയ്ക്ക് ഇന്ത്യൻ മരുന്നിനെയും ഇന്ത്യൻ ഡോക്ടർമാരെയും ആശ്രയിക്കുന്നതും ഒരേ നാണയത്തിന്റെ രണ്ടു വശങ്ങളാണ്.

.

Sources

1. Government of Kerala – Finance Department Orders on Medical Reimbursement 2021-2022 and Right to Information Replies
2. Union Ministry of Health and Family Welfare – Affidavit on Expenditure for Treatment Abroad and All India Services Medical Rules
3. Pharmaceuticals Export Promotion Council of India – Export Performance Data FY25
4. US Department of Commerce Bureau of Industry and Security – Section 232 Notice on Pharmaceuticals Tariff Exemption for Generics
5. American Medical Association and Association of American Medical Colleges – Physician Workforce Data on International Medical Graduates