ന്യൂഡൽഹി  / 2026  / ഒക്ടോബർ 01

സിഎജിയുടെ ഔദ്യോഗിക രേഖകളും ഓഡിറ്റ് റിപ്പോർട്ടുകളും വിവിധ ഭാഷകളിലേക്ക് പരിഭാഷപ്പെടുത്താൻ നിർമിതബുദ്ധി അധിഷ്ഠിത സംവിധാനമായ ‘സിഎജി–ഭാഷിണി അനുവാദ്’ പുറത്തിറക്കി. സെപ്റ്റംബർ 30ന് ന്യൂഡൽഹിയിലെ സിഎജി ഓഫീസിൽ നടന്ന 74ാമത് ഹിന്ദി ദിവസ്, ഹിന്ദി പഖ്‌വാഡ സമാപനച്ചടങ്ങിലായിരുന്നു അവതരണം. കേന്ദ്ര ഇലക്ട്രോണിക്സ്, വിവരസാങ്കേതിക മന്ത്രാലയത്തിനു കീഴിലെ ഡിജിറ്റൽ ഇന്ത്യ കോർപ്പറേഷന്റെ ഭാഗമായ ഡിജിറ്റൽ ഇന്ത്യ ഭാഷിണി വിഭാഗവും കംപ്ട്രോളർ ആൻഡ് ഓഡിറ്റർ ജനറലിന്റെ ഓഫീസും ചേർന്നാണ് സംരംഭം നടപ്പാക്കുന്നത്. ഭാഷിണി വികസിപ്പിച്ച സംവിധാനം മനുഷ്യരുടെ മേൽനോട്ടത്തോടെ നിലവിലുള്ള പരിഭാഷാ നടപടികൾക്ക് പിന്തുണ നൽകും. ഔദ്യോഗിക വിവരങ്ങൾ ഇന്ത്യൻ ഭാഷകളിൽ കൂടുതൽ ആളുകളിലേക്ക് എത്തിക്കുകയാണ് ലക്ഷ്യം.

സിഎജിയുടെ ആവശ്യങ്ങൾക്ക് അനുസരിച്ചുള്ള പരിഭാഷ

കംപ്ട്രോളർ ആൻഡ് ഓഡിറ്റർ ജനറൽ കെ. സഞ്ജയ് മൂർത്തി ചടങ്ങിൽ പങ്കെടുത്തു. ഡെപ്യൂട്ടി കംപ്ട്രോളർ ആൻഡ് ഓഡിറ്റർ ജനറൽ എ. എം. ബജാജ്, അഡീഷണൽ ഡെപ്യൂട്ടി കംപ്ട്രോളർ ആൻഡ് ഓഡിറ്റർ ജനറൽ ഡോ. നീലോത്പൽ ഗോസ്വാമി, ഡയറക്ടർ ജനറൽ അതൂർവ സിൻഹ എന്നിവരും മറ്റു ഉദ്യോഗസ്ഥരും വിശിഷ്ടാതിഥികളും സന്നിഹിതരായിരുന്നു.

ഭാഷിണിയുടെ ബഹുഭാഷാ സാങ്കേതികവിദ്യയും സിഎജിയുടെ പ്രത്യേക ഭാഷാ ആവശ്യങ്ങളും കൂട്ടിച്ചേർത്താണ് സംവിധാനം ഒരുക്കിയത്. സ്ഥാപനങ്ങളുടെ പ്രവർത്തനക്രമത്തിലേക്ക് ഭാഷാ നിർമിതബുദ്ധി കൊണ്ടുവരുന്ന സുപ്രധാന നടപടിയാണിത്. ഔദ്യോഗിക രേഖകളും ഓഡിറ്റുമായി ബന്ധപ്പെട്ട റിപ്പോർട്ടുകളും പരിഭാഷപ്പെടുത്തുമ്പോൾ നിലവിലുള്ള നടപടിക്രമങ്ങൾക്കൊപ്പം ആവശ്യമായ മനുഷ്യ മേൽനോട്ടവും തുടരും.

സിഎജിക്കായി പ്രത്യേകം തയ്യാറാക്കിയ സംവിധാനത്തിൽ സാങ്കേതിക പദങ്ങളുടെ ഏകീകൃത ഉപയോഗം, സന്ദർഭത്തിന് അനുയോജ്യമായ പരിഭാഷ, പരിഭാഷയുടെ ഗുണനിലവാരം എന്നിവയ്ക്കാണ് മുൻഗണന. സുരക്ഷ, നിയന്ത്രിത പ്രവേശനം, വിവരങ്ങളുടെ നിയന്ത്രണത്തിലുള്ള രാജ്യത്തിന്റെ പരമാധികാരം എന്നീ സ്ഥാപന ആവശ്യങ്ങളും പരിഗണിച്ചിട്ടുണ്ട്. നിലവിലുള്ള പ്രവർത്തനക്രമവുമായി ബഹുഭാഷാ നിർമിതബുദ്ധിയെ ബന്ധിപ്പിച്ച് ഔദ്യോഗിക വിവരങ്ങൾ ഇന്ത്യൻ ഭാഷകളിൽ കൂടുതൽ വേഗത്തിലും കാര്യക്ഷമമായും ലഭ്യമാക്കാനാണ് ശ്രമം.

കൃഷി ഉപദേശം മുതൽ പരാതികൾ വരെ ഭാഷിണി

സർക്കാർ സംവിധാനങ്ങളിലും പൊതുജനങ്ങൾക്കുള്ള സേവനങ്ങളിലും ഭാഷിണിയുടെ ഭാഷാ നിർമിതബുദ്ധി എങ്ങനെ ഉപയോഗിക്കാമെന്ന് ചടങ്ങിൽ അവതരിപ്പിച്ചു. സിഎജി ഓഫീസിലെ ‘സിഎജി–ഭാഷിണി അനുവാദ്’ സംവിധാനത്തിന്റെ ഔദ്യോഗിക ഉദ്ഘാടനവും നടന്നു.

ഭാഷാ വിവരശേഖരങ്ങൾ, നിർമിതബുദ്ധി മാതൃകകൾ, ആപ്ലിക്കേഷനുകൾ, വിവിധ ഉപയോഗങ്ങൾ എന്നിവയിലൂടെ ഭാഷിണി വളർന്നുവന്ന വഴികൾ ഡിജിറ്റൽ ഇന്ത്യ ഭാഷിണി വിഭാഗം ചീഫ് എക്സിക്യൂട്ടീവ് ഓഫീസർ അമിതാഭ് നാഗ് വിശദീകരിച്ചു. ഇന്ത്യയുടെ ഭാഷാവൈവിധ്യത്തിന് അനുയോജ്യമായി സ്വന്തം നിയന്ത്രണത്തിലുള്ള ഭാഷാ നിർമിതബുദ്ധി സംവിധാനങ്ങളുടെ കൂട്ടായ്മ വികസിപ്പിക്കുന്നതിനെക്കുറിച്ചും അദ്ദേഹം സംസാരിച്ചു.

ഭാഷിണി നിലവിൽ 36 ഇന്ത്യൻ ഭാഷകളിൽ എഴുത്തിനും 23 ഇന്ത്യൻ ഭാഷകളിൽ ശബ്ദസേവനങ്ങൾക്കും പിന്തുണ നൽകുന്നു. 35 അന്താരാഷ്ട്ര ഭാഷകളും പിന്തുണയ്ക്കുന്നു. പൊതുസേവനങ്ങളിലെ ഉപയോഗം വർധിച്ചുവരികയാണ്. വിവിധ ഭാഷകളിലുള്ള കാർഷിക ഉപദേശങ്ങൾ, ശബ്ദത്തിലൂടെ പരാതി രജിസ്റ്റർ ചെയ്യലും തുടർനടപടികളും, ശബ്ദവും ടെലിഫോണും ഉപയോഗിച്ച് സംഭാഷണത്തിലൂടെ സേവനങ്ങൾ ലഭ്യമാക്കൽ എന്നിവ ഇതിൽ ഉൾപ്പെടുന്നു.

ജനങ്ങൾക്ക് മനസ്സിലാകുന്ന ഭാഷയിൽ ഓഡിറ്റ് വിവരങ്ങൾ

ഓഡിറ്റ് കണ്ടെത്തലുകളും റിപ്പോർട്ടുകളും ജനങ്ങൾക്ക് മനസ്സിലാകുന്ന ഭാഷകളിൽ എത്തണമെന്ന് കെ. സഞ്ജയ് മൂർത്തി പറഞ്ഞു. പ്രാദേശിക ഭാഷകളിൽ ഓഡിറ്റ് വിവരങ്ങൾ ലഭ്യമാക്കാൻ സാങ്കേതികവിദ്യ സഹായിക്കും. ഔദ്യോഗിക ജോലികളിൽ ഹിന്ദിയുടെയും മറ്റു ഇന്ത്യൻ ഭാഷകളുടെയും ഉപയോഗം ശക്തിപ്പെടുത്താനുള്ള ശ്രമങ്ങൾക്ക് ഇത് പിന്തുണ നൽകുമെന്നും അദ്ദേഹം ചൂണ്ടിക്കാട്ടി.

നിർമിതബുദ്ധിയും ആശയവിനിമയവും ഒന്നിക്കുമ്പോൾ വിവിധ പ്രദേശങ്ങളിലെ ഭാഷാതടസ്സങ്ങൾ മറികടക്കാനാകുമെന്ന് സിഎജി ഓഫീസിലെ ഔദ്യോഗിക ഭാഷാ ചുമതലയുള്ള അഡീഷണൽ ഡെപ്യൂട്ടി കംപ്ട്രോളർ ആൻഡ് ഓഡിറ്റർ ജനറൽ നീലോത്പൽ ഗോസ്വാമി പറഞ്ഞു. സ്ഥാപനങ്ങളുടെ പ്രവർത്തനക്രമത്തിൽ ഭാഷാ സാങ്കേതികവിദ്യ ഉൾപ്പെടുത്തുന്നത് ആശയവിനിമയം കൂടുതൽ ആളുകൾക്ക് ലഭ്യമാക്കും. സമയബന്ധിതവും ഫലപ്രദവുമാക്കാനും സഹായിക്കും. ഭരണത്തിലും ഔദ്യോഗിക ജോലികളിലും ഇന്ത്യൻ ഭാഷകളുടെ ഉപയോഗം ശക്തിപ്പെടുത്താനും കഴിയും. ഭാഷയും സാങ്കേതികവിദ്യയും കൂട്ടിച്ചേർത്ത് പ്രായോഗികമായി ഉപയോഗിക്കുന്നതിലെ പ്രധാന ചുവടുവെപ്പാണ് സിഎജി–ഭാഷിണി സംരംഭമെന്നും അദ്ദേഹം പറഞ്ഞു.

ഹിന്ദി പഖ്‌വാഡയിൽ സാങ്കേതികവിദ്യയും ഭാഷാ മത്സരങ്ങളും

സെപ്റ്റംബർ 14 മുതൽ 29 വരെ നടന്ന ഹിന്ദി പഖ്‌വാഡ പരിപാടിയിലും സിഎജിയും ഭാഷിണിയും സഹകരിച്ചു. പതിവ് ഹിന്ദി ഭാഷാ പരിപാടികൾക്കൊപ്പം ഭാഷിണിയുടെ സഹായത്തോടെ വികസിപ്പിച്ച സാങ്കേതികവിദ്യ അധിഷ്ഠിത ഭാഷാ പ്രവർത്തനങ്ങളും കളികളും ഉൾപ്പെടുത്തി. ഉദ്യോഗസ്ഥർക്കും ജീവനക്കാർക്കും നേരിട്ട് പങ്കെടുത്ത് ഭാഷാ സാങ്കേതികവിദ്യ പരിചയപ്പെടാൻ ഇതിലൂടെ അവസരം ലഭിച്ചു.

നിരവധി ഉദ്യോഗസ്ഥരും ജീവനക്കാരും മത്സരങ്ങളിലും മറ്റു പരിപാടികളിലും പങ്കെടുത്തു. ഔദ്യോഗിക ഭാഷയുടെ ഉപയോഗം, ഹിന്ദിയിൽ കുറിപ്പുകളും കരടുകളും തയ്യാറാക്കൽ, പരിഭാഷ, ടൈപ്പിങ്, മറ്റു ഭാഷാ നൈപുണ്യങ്ങൾ എന്നിവയുമായി ബന്ധപ്പെട്ട പ്രവർത്തനങ്ങൾ നടന്നു. ഭാഷിണിയുടെ സഹായത്തോടെയുള്ള പരിപാടികളും ഇതിലുണ്ടായിരുന്നു. വിജയികളെ സമാപനച്ചടങ്ങിൽ ആദരിച്ചു. പങ്കാളിത്തവും പ്രകടനവും പരിഗണിച്ച് സമ്മാനങ്ങളും സർട്ടിഫിക്കറ്റുകളും നൽകി.

ഡിജിറ്റൽ ഭാഷാ സാങ്കേതികവിദ്യയുടെ ഉപയോഗത്തെക്കുറിച്ചുള്ള അവതരണവും പ്രദർശനങ്ങളും പ്രവർത്തനങ്ങളും പരിപാടിയിൽ ഉൾപ്പെടുത്തി. ഹിന്ദിയുടെയും മറ്റു ഇന്ത്യൻ ഭാഷകളുടെയും ഉപയോഗത്തിൽ സാങ്കേതികവിദ്യയുടെ വർധിച്ചുവരുന്ന പങ്ക് ഉദ്യോഗസ്ഥരെ പരിചയപ്പെടുത്തുകയായിരുന്നു ലക്ഷ്യം. പരിഭാഷയ്ക്കും ഔദ്യോഗിക ജോലികൾക്കും പുറമേ, സർക്കാർ സ്ഥാപനങ്ങളിൽ ജീവനക്കാരുടെ പങ്കാളിത്തത്തോടെയുള്ള ഭാഷാ പ്രവർത്തനങ്ങൾക്കും നിർമിതബുദ്ധി സഹായിക്കുമെന്ന് ഈ സഹകരണം കാണിച്ചു.

‘സിഎജി–ഭാഷിണി അനുവാദ്’ സംവിധാനവും ഹിന്ദി പഖ്‌വാഡയിലെ സാങ്കേതികവിദ്യ അധിഷ്ഠിത പ്രവർത്തനങ്ങളും സ്ഥാപനങ്ങളിൽ ഭാഷാ നിർമിതബുദ്ധിയുടെ പ്രായോഗിക ഉപയോഗങ്ങൾ കണ്ടെത്താനുള്ള വിപുലമായ സഹകരണത്തിന്റെ ഭാഗമാണ്. ഭാഷാ സാങ്കേതികവിദ്യ, മനുഷ്യരുടെ വൈദഗ്ധ്യം, സ്ഥാപനങ്ങളുടെ ആവശ്യങ്ങൾ എന്നിവ കൂട്ടിച്ചേർത്ത് ഔദ്യോഗിക വിവരങ്ങൾ കൂടുതൽ ഭാഷകളിൽ ലഭ്യമാക്കാനാണ് ശ്രമം.

800ലധികം സർക്കാർ വെബ്സൈറ്റുകളിൽ ഭാഷിണി

നിർമിതബുദ്ധിയുടെ സഹായത്തോടെ വിവിധ ഭാഷകളിൽ ഡിജിറ്റൽ സേവനങ്ങൾ എല്ലാവർക്കും ലഭ്യമാക്കാനുള്ള ഇന്ത്യയുടെ ദേശീയ വേദിയാണ് ഡിജിറ്റൽ ഇന്ത്യ ഭാഷിണി വിഭാഗം. കേന്ദ്ര ഇലക്ട്രോണിക്സ്, വിവരസാങ്കേതിക മന്ത്രാലയത്തിനു കീഴിലെ ഡിജിറ്റൽ ഇന്ത്യ കോർപ്പറേഷന്റെ ഭാഗമാണിത്.

800ലധികം സർക്കാർ വെബ്സൈറ്റുകൾക്ക് ഭാഷിണി സാങ്കേതിക പിന്തുണ നൽകുന്നു. ഇതുവരെ 900 കോടിയിലധികം തവണ നിർമിതബുദ്ധി ഉപയോഗിച്ചുള്ള ഫലനിർണയങ്ങൾ നടത്തിയിട്ടുണ്ട്. ദിവസേന 2.4 കോടിയിലധികം ഇത്തരം പ്രവർത്തനങ്ങൾ കൈകാര്യം ചെയ്യുന്നു. 36 ഇന്ത്യൻ എഴുത്തുഭാഷകൾക്കും 23 ഇന്ത്യൻ ശബ്ദഭാഷകൾക്കും 35 അന്താരാഷ്ട്ര ഭാഷകൾക്കും പിന്തുണ നൽകുന്നതിലൂടെ ഡിജിറ്റൽ പൊതുസേവന അടിസ്ഥാനസൗകര്യങ്ങൾ കൂടുതൽ ആളുകൾക്ക് പ്രാപ്യമാക്കുന്നു.