ന്യൂഡൽഹി  / 2026  /  സെപ്റ്റംബർ 15

പ്രതിരോധ ഗവേഷണ വികസന സംഘടനയും വ്യവസായ മേഖലയുമായുള്ള സഹകരണം കൂടുതൽ ശക്തമാക്കാൻ കേന്ദ്ര സർക്കാർ പുതിയ നയങ്ങൾ പ്രഖ്യാപിച്ചു. ന്യൂഡൽഹിയിൽ സെപ്റ്റംബർ 15ന് നടന്ന ‘വിമർശ് 2026’ ഡി.ആർ.ഡി.ഒ–വ്യവസായ സഹകരണ യോഗത്തിലാണ് പ്രതിരോധമന്ത്രി രാജ്നാഥ് സിങ് പദ്ധതികൾ അവതരിപ്പിച്ചത്. ചെറുകിട, ഇടത്തരം സംരംഭങ്ങൾക്കും ഡീപ് ടെക് സ്റ്റാർട്ടപ്പുകൾക്കും പ്രതിരോധ ഗവേഷണ മേഖലയിലേക്ക് കടക്കാനുള്ള സാങ്കേതികവും സാമ്പത്തികവുമായ തടസ്സങ്ങൾ കുറയ്ക്കുകയാണ് പ്രധാന ലക്ഷ്യം.

സ്റ്റാർട്ടപ്പുകൾക്ക് പണവും പരീക്ഷണ സൗകര്യവും

പുതിയ സംവിധാനത്തിലൂടെ ചെറുകിട സംരംഭങ്ങൾക്കും സ്റ്റാർട്ടപ്പുകൾക്കും നേരിട്ടുള്ള ധനസഹായം, ഇൻക്യുബേഷൻ പിന്തുണ, ഡി.ആർ.ഡി.ഒയുടെ പരീക്ഷണ സൗകര്യങ്ങളിലേക്കുള്ള പ്രത്യേക പ്രവേശനം എന്നിവ ലഭിക്കും. ഡി.ആർ.ഡി.ഒ വികസിപ്പിച്ച സോഫ്റ്റ്‌വെയറുകളുടെ സോഴ്‌സ് കോഡുകൾ ലൈസൻസ് ലഭിച്ച വ്യവസായ സ്ഥാപനങ്ങളുമായി സുരക്ഷിതമായി പങ്കിടാനുള്ള ഏകീകൃത സംവിധാനവും ആരംഭിച്ചു. സോഫ്റ്റ്‌വെയർ അധിഷ്ഠിത പ്രതിരോധ ശേഷികൾ വേഗത്തിൽ വികസിപ്പിക്കാനും പഴയ സാങ്കേതികവിദ്യകൾ പുതുക്കാനും ഇത് സഹായിക്കുമെന്നാണ് വിലയിരുത്തൽ.

ഒമ്പത് സാങ്കേതിക കൈമാറ്റ കരാറുകൾ

അത്യാധുനിക പ്രതിരോധ സംവിധാനങ്ങളുടെ വാണിജ്യ ഉൽപ്പാദനത്തിന് ഒമ്പത് സാങ്കേതിക കൈമാറ്റ ലൈസൻസ് കരാറുകൾ 13 നിർമാണ പങ്കാളികൾക്ക് കൈമാറി. വ്യവസായ മേഖലയിലെ പങ്കാളിത്തം താഴെത്തട്ടിലേക്കും വ്യാപിപ്പിക്കാൻ സൊസൈറ്റി ഓഫ് ഇന്ത്യൻ ഡിഫൻസ് മാനുഫാക്ചറേഴ്സ്, ലഘു ഉദ്യോഗ് ഭാരതി എന്നിവയുമായി ധാരണാപത്രങ്ങളും കൈമാറി. ആഭ്യന്തര പ്രതിരോധ സ്ഥാപനങ്ങളുടെ നിർമാണ ശേഷി വിലയിരുത്താൻ ക്വാളിറ്റി കൗൺസിൽ ഓഫ് ഇന്ത്യയുമായി ‘സമർ 2.0’ സംവിധാനത്തിനുള്ള കരാറും ഡി.ആർ.ഡി.ഒ ഒപ്പുവച്ചു.

ഗവേഷണം മുതൽ നിർമാണം വരെ സ്വകാര്യ പങ്കാളിത്തം

ഡി.ആർ.ഡി.ഒ–വ്യവസായ സഹകരണം ഉൽപ്പാദനത്തിൽ മാത്രം ഒതുങ്ങരുതെന്ന് രാജ്നാഥ് സിങ് പറഞ്ഞു. ഗവേഷണം, രൂപകൽപ്പന, പരീക്ഷണം, സർട്ടിഫിക്കേഷൻ, നിർമാണം എന്നിവ ഉൾപ്പെടുന്ന മുഴുവൻ ഘട്ടങ്ങളിലും സ്വകാര്യ വ്യവസായം പങ്കാളിയാകണം. ഡി.ആർ.ഡി.ഒയുടെ സാങ്കേതിക അറിവും വ്യവസായത്തിന്റെ നിർമാണ ശേഷിയും സ്റ്റാർട്ടപ്പുകളുടെ നവീകരണ കഴിവും യുവാക്കളുടെ ആശയങ്ങളും ഒരുമിച്ചാൽ ഇന്ത്യയെ ആഗോള പ്രതിരോധ ഉൽപ്പാദന കേന്ദ്രമാക്കാനാകുമെന്നും അദ്ദേഹം പറഞ്ഞു.

2047 ലക്ഷ്യം സാങ്കേതിക സ്വയംപര്യാപ്തത

2047ഓടെ നിർണായക സാങ്കേതികവിദ്യകളിൽ ഇന്ത്യ സ്വയംപര്യാപ്തമാകണമെന്നും ആഭ്യന്തര ഘടകങ്ങളുടെ ഉപയോഗവും പ്രതിരോധ കയറ്റുമതിയും വലിയ തോതിൽ ഉയർത്തണമെന്നും പ്രതിരോധമന്ത്രി പറഞ്ഞു. ആർട്ടിഫിഷ്യൽ ഇന്റലിജൻസ്, ക്വാണ്ടം കംപ്യൂട്ടിങ്, ഹൈപ്പർസോണിക് സാങ്കേതികവിദ്യ, ഡയറക്ടഡ് എനർജി, ഡ്രോൺ സാങ്കേതികവിദ്യ, സൈബർ സുരക്ഷ തുടങ്ങിയ മേഖലകളിൽ ചെറുകിട സംരംഭങ്ങൾക്കും സ്റ്റാർട്ടപ്പുകൾക്കും വലിയ പങ്ക് വഹിക്കാനാകുമെന്ന് അദ്ദേഹം ചൂണ്ടിക്കാട്ടി.

2,300ലേറെ സാങ്കേതിക കൈമാറ്റങ്ങൾ

‘വാർത്താ സെ വികാസ്’ എന്ന ആശയത്തിലാണ് ‘വിമർശ് 2026’ സംഘടിപ്പിച്ചതെന്ന് പ്രതിരോധ ഗവേഷണ വികസന വകുപ്പ് സെക്രട്ടറിയും ഡി.ആർ.ഡി.ഒ ചെയർമാനുമായ രാജേഷ് കുമാർ സിങ് പറഞ്ഞു. ഇതുവരെ 1,100ലേറെ വ്യവസായ സ്ഥാപനങ്ങൾക്ക് 2,300ലധികം സാങ്കേതിക കൈമാറ്റങ്ങൾ നൽകിയിട്ടുണ്ട്. ഡി.ആർ.ഡി.ഒ വികസിപ്പിച്ച ഏകദേശം 50 മിസൈലുകളുമായി ബന്ധപ്പെട്ട സാങ്കേതികവിദ്യകളും വ്യവസായ മേഖലയ്ക്ക് ലഭ്യമാക്കിയിട്ടുണ്ട്. യോഗത്തിൽ 250ലേറെ പ്രതിരോധ വ്യവസായ പ്രതിനിധികളും മുതിർന്ന സിവിൽ, സൈനിക ഉദ്യോഗസ്ഥരും ഡി.ആർ.ഡി.ഒ ശാസ്ത്രജ്ഞരും പങ്കെടുത്തു.