ന്യൂഡൽഹി / 2026 / ഓഗസ്റ്റ് 22
57-ാമത് ഇന്ത്യയുടെ അന്താരാഷ്ട്ര ചലച്ചിത്രമേളയുടെ ഒരുക്കങ്ങൾ വിലയിരുത്താൻ ആദ്യ സ്റ്റിയറിങ് കമ്മിറ്റി യോഗം ന്യൂഡൽഹിയിലെ കർത്തവ്യ ഭവൻ-2ൽ ചേർന്നു. കേന്ദ്ര വാർത്താവിതരണ-പ്രക്ഷേപണ സഹമന്ത്രി ഡോ. എൽ. മുരുകന്റെ അധ്യക്ഷതയിൽ ഓഗസ്റ്റ് 21നായിരുന്നു യോഗം. നവംബർ 20 മുതൽ 28 വരെ ഗോവയിൽ നടക്കുന്ന മേളയെ ലോകോത്തര അന്താരാഷ്ട്ര ചലച്ചിത്രമേളയായി കൂടുതൽ ശക്തിപ്പെടുത്തുന്നതിനുള്ള നടപടികൾ യോഗം ചർച്ച ചെയ്തു. യുവാക്കൾക്കും വളർന്നുവരുന്ന ചലച്ചിത്ര പ്രവർത്തകർക്കും കൂടുതൽ അവസരം നൽകാനും അന്താരാഷ്ട്രതലത്തിലുള്ള പങ്കാളിത്തം വിപുലീകരിക്കാനും മുരുകൻ നിർദേശിച്ചു.
യുവപ്രതിഭകൾക്ക് ഐഎഫ്എഫ്ഐ വേദിയാകണം
യുവ വിദ്യാർഥികൾക്കും വളർന്നുവരുന്ന ചലച്ചിത്ര പ്രവർത്തകർക്കും ഇന്ത്യൻ സിനിമാരംഗത്ത് വേണ്ടത്ര അംഗീകാരം ലഭിക്കാത്ത പ്രതിഭകൾക്കും കൂടുതൽ അവസരം നൽകണമെന്നാണ് ഡോ. എൽ. മുരുകൻ ആവശ്യപ്പെട്ടത്. യുവപ്രതിഭകൾക്ക് അവരുടെ സർഗാത്മകത അവതരിപ്പിക്കാനും പ്രമുഖ ചലച്ചിത്ര പ്രവർത്തകരിൽ നിന്ന് പഠിക്കാനും ആഗോള ചലച്ചിത്ര സമൂഹവുമായി ബന്ധപ്പെടാനും ഐഎഫ്എഫ്ഐ വേദിയാകണം.
ലോകത്തിന്റെ വിവിധ ഭാഗങ്ങളിൽ നിന്നുള്ള മികച്ച സിനിമകളെയും പ്രമുഖ സർഗാത്മക പ്രതിഭകളെയും ഇന്ത്യയിലെത്തിച്ച് മേളയുടെ അന്താരാഷ്ട്ര സ്വാധീനം ശക്തിപ്പെടുത്തണമെന്നും അദ്ദേഹം പറഞ്ഞു. കേന്ദ്രമന്ത്രി അശ്വിനി വൈഷ്ണവിന്റെ നേതൃത്വത്തിൽ രാജ്യത്തിന്റെ ഓറഞ്ച് സമ്പദ്വ്യവസ്ഥയ്ക്ക് കരുത്തേകാനും സർഗാത്മക വ്യവസായങ്ങളെ ശക്തിപ്പെടുത്താനും മന്ത്രാലയം പുതിയ പദ്ധതികൾ നടപ്പാക്കുന്നുണ്ട്. പ്രതിഭകൾക്കും നൂതന ആശയങ്ങൾക്കും ആഗോള സഹകരണത്തിനും കൂടുതൽ അവസരങ്ങൾ സൃഷ്ടിക്കുകയാണ് ലക്ഷ്യം.
മാസ്റ്റർക്ലാസുകളും മെന്റർഷിപ്പും വിപുലീകരിക്കും
മാസ്റ്റർക്ലാസുകൾ കൂടുതൽ വിപുലീകരിക്കണമെന്ന് മുരുകൻ ആവശ്യപ്പെട്ടു. പ്രമുഖ ചലച്ചിത്ര പ്രവർത്തകരുമായി ക്രമീകരിച്ച സംവാദങ്ങളും യുവപ്രതിഭകൾക്ക് പ്രയോജനപ്പെടുന്ന മെന്റർഷിപ്പ് അവസരങ്ങളും വർധിപ്പിക്കണം. ഇന്ത്യൻ സിനിമയുടെ വൈവിധ്യവും കരുത്തും ലോകത്തിന് മുന്നിൽ അവതരിപ്പിക്കുന്നതിനൊപ്പം അന്താരാഷ്ട്ര സഹകരണത്തിനും തൊഴിൽപരമായ ആശയവിനിമയത്തിനുമുള്ള വഴികൾ ശക്തിപ്പെടുത്തണമെന്നും അദ്ദേഹം പറഞ്ഞു.
ഐഎഫ്എഫ്ഐയുടെ വളർച്ചയിലും തുടർച്ചയായ വിജയത്തിലും ഗോവ സർക്കാരിന്റെ പങ്കും മുരുകൻ എടുത്തുപറഞ്ഞു. ഗോവയെ അന്താരാഷ്ട്ര സിനിമയുടെ ആഗോളതലത്തിൽ അറിയപ്പെടുന്ന കേന്ദ്രമാക്കി മാറ്റുന്നതിൽ നിർണായക പങ്കുവഹിച്ച മുൻ ഗോവ മുഖ്യമന്ത്രി അന്തരിച്ച മനോഹർ പരീക്കറിന്റെ സംഭാവനയും അദ്ദേഹം അനുസ്മരിച്ചു. ഐഎഫ്എഫ്ഐയെ ലോകോത്തര സാംസ്കാരിക പരിപാടിയാക്കാൻ നൽകുന്ന പിന്തുണയ്ക്ക് ഗോവ മുഖ്യമന്ത്രി പ്രമോദ് സാവന്തിനെയും അദ്ദേഹം അഭിനന്ദിച്ചു.
സർഗാത്മക സമ്പദ്വ്യവസ്ഥയ്ക്ക് പ്രധാന വേദി
വാർത്താവിതരണ-പ്രക്ഷേപണ മന്ത്രാലയം സെക്രട്ടറി ചഞ്ചൽ കുമാറും യോഗത്തിൽ സംസാരിച്ചു. ഇന്ത്യയുടെ വളർന്നുവരുന്ന സർഗാത്മക സമ്പദ്വ്യവസ്ഥയെ പ്രോത്സാഹിപ്പിക്കുന്ന പ്രധാന വേദിയായി ഐഎഫ്എഫ്ഐയെ ഉപയോഗിക്കണമെന്ന് അദ്ദേഹം പറഞ്ഞു. ഇന്ത്യൻ, അന്താരാഷ്ട്ര സർഗാത്മക സമൂഹങ്ങൾ തമ്മിലുള്ള സഹകരണവും കൂടുതൽ ആഴത്തിലാക്കണം.
ചലച്ചിത്ര പ്രവർത്തകർ, സിനിമാപ്രേമികൾ, പ്രതിനിധികൾ, അതിഥികൾ എന്നിവർക്കെല്ലാം ഉയർന്ന നിലവാരത്തിലുള്ള തടസ്സമില്ലാത്ത അനുഭവം ഉറപ്പാക്കണമെന്നും ചഞ്ചൽ കുമാർ ആവശ്യപ്പെട്ടു. ദേശീയ ചലച്ചിത്ര വികസന കോർപ്പറേഷൻ മാനേജിങ് ഡയറക്ടർ പ്രകാശ് മഗ്ദം 57-ാമത് ഐഎഫ്എഫ്ഐക്കായുള്ള ഒരുക്കങ്ങളും നടപ്പാക്കുന്ന വിവിധ പദ്ധതികളും യോഗത്തിൽ അവതരിപ്പിച്ചു.
ഐഎഫ്എഫ്ഐ ഫെസ്റ്റിവൽ ഡയറക്ടറും ചലച്ചിത്ര സംവിധായകനുമായ അശുതോഷ് ഗോവാരിക്കർ സ്റ്റിയറിങ് കമ്മിറ്റിയുടെ നിർദേശങ്ങളെ സ്വാഗതം ചെയ്തു. മാസ്റ്റർക്ലാസുകൾ ശക്തിപ്പെടുത്തുക, യുവ ചലച്ചിത്ര പ്രവർത്തകർക്ക് കൂടുതൽ അവസരങ്ങൾ നൽകുക, ഇന്ത്യയിലും വിദേശത്തുമുള്ള മികച്ച സിനിമകൾ തിരഞ്ഞെടുക്കുക, ഇന്ത്യയിൽ നിന്നും ലോകത്തിന്റെ വിവിധ ഭാഗങ്ങളിൽ നിന്നുമുള്ള പ്രമുഖ ചലച്ചിത്ര പ്രവർത്തകരുടെയും സർഗാത്മക പ്രതിഭകളുടെയും പങ്കാളിത്തം ഉറപ്പാക്കുക എന്നിവയുടെ പ്രാധാന്യവും അദ്ദേഹം ചൂണ്ടിക്കാട്ടി.
ലോകസിനിമയിലെ മികച്ച ചിത്രങ്ങൾ മേളയിലെത്തിക്കും
ഗോവ സർക്കാരിന്റെ ഇൻഫർമേഷൻ ആൻഡ് പബ്ലിസിറ്റി റിലേഷൻസ് വകുപ്പ് സെക്രട്ടറി സംസ്ഥാന സർക്കാർ നടത്തുന്ന ഒരുക്കങ്ങൾ കമ്മിറ്റിയെ അറിയിച്ചു. ആവശ്യമായ എല്ലാ പ്രവർത്തനങ്ങളും സമയബന്ധിതമായി പൂർത്തിയാക്കി 57-ാമത് ഐഎഫ്എഫ്ഐയുടെ സുഗമമായ നടത്തിപ്പിനുള്ള എല്ലാ ക്രമീകരണങ്ങളും ഉറപ്പാക്കുമെന്ന് അദ്ദേഹം അറിയിച്ചു.
ഐഎഫ്എഫ്ഐയുടെ അന്താരാഷ്ട്ര സ്വാധീനം കൂടുതൽ വിപുലീകരിക്കണമെന്ന് സ്റ്റിയറിങ് കമ്മിറ്റി അംഗങ്ങൾ ആവശ്യപ്പെട്ടു. ലോകത്തിന്റെ വിവിധ ഭാഗങ്ങളിൽ നിന്നുള്ള മികച്ച സിനിമകൾ തിരഞ്ഞെടുക്കുന്നതിനും വിവിധ രാജ്യങ്ങളിൽ നിന്നുള്ള പ്രമുഖ ചലച്ചിത്ര പ്രവർത്തകർ, കലാകാരന്മാർ, സർഗാത്മക മേഖലകളിലെ വിദഗ്ധർ എന്നിവരെ ക്ഷണിക്കുന്നതിനും പ്രത്യേക ശ്രദ്ധ നൽകും.
സിനിമയുടെ ആഘോഷം മാത്രമല്ല, സർഗാത്മക ആശയവിനിമയത്തിനും സഹകരണത്തിനും ഇന്ത്യയുടെ വളർന്നുവരുന്ന സർഗാത്മക സമ്പദ്വ്യവസ്ഥയുടെ പ്രചാരണത്തിനുമുള്ള പ്രധാന വേദിയായും മേളയെ മാറ്റാനാണ് ലക്ഷ്യമിടുന്നത്.
മന്ത്രാലയവും ഗോവ സർക്കാരും ഏകോപനം ശക്തമാക്കും
മേള വിജയകരമായി സംഘടിപ്പിക്കാൻ വാർത്താവിതരണ-പ്രക്ഷേപണ മന്ത്രാലയം, ദേശീയ ചലച്ചിത്ര വികസന കോർപ്പറേഷൻ, ഗോവ സർക്കാർ, ബന്ധപ്പെട്ട മറ്റ് പങ്കാളികൾ എന്നിവർ തമ്മിൽ അടുത്തതും തുടർച്ചയായതുമായ ഏകോപനം വേണമെന്ന് കമ്മിറ്റി ആവർത്തിച്ചു. സിനിമ, സർഗാത്മകത, സാംസ്കാരിക കൈമാറ്റം, ആഗോള സഹകരണം എന്നിവയ്ക്കുള്ള പ്രമുഖ അന്താരാഷ്ട്ര വേദിയെന്ന ഐഎഫ്എഫ്ഐയുടെ സ്ഥാനം 57-ാമത് പതിപ്പ് കൂടുതൽ ശക്തിപ്പെടുത്തുമെന്ന് കമ്മിറ്റി പ്രതീക്ഷ പ്രകടിപ്പിച്ചു. ഇന്ത്യൻ ചലച്ചിത്ര പ്രവർത്തകർക്കും സർഗാത്മക മേഖലയിലെ വിദഗ്ധർക്കും ലോകവുമായി കൂടുതൽ അർഥവത്തായി ബന്ധപ്പെടാനുള്ള അവസരങ്ങളും ഇതിലൂടെ വർധിക്കുമെന്നാണ് വിലയിരുത്തൽ.
യോഗത്തിൽ വാർത്താവിതരണ-പ്രക്ഷേപണ മന്ത്രാലയം സെക്രട്ടറി ചഞ്ചൽ കുമാർ, ഐഎഫ്എഫ്ഐ ഫെസ്റ്റിവൽ ഡയറക്ടർ അശുതോഷ് ഗോവാരിക്കർ, ദേശീയ ചലച്ചിത്ര വികസന കോർപ്പറേഷൻ മാനേജിങ് ഡയറക്ടർ പ്രകാശ് മഗ്ദം, ഗോവ സർക്കാർ ഇൻഫർമേഷൻ ആൻഡ് പബ്ലിസിറ്റി റിലേഷൻസ് വകുപ്പ് സെക്രട്ടറി എന്നിവരും പങ്കെടുത്തു. സ്റ്റിയറിങ് കമ്മിറ്റി അംഗങ്ങളായ ഭാവ്ന ഖേർ, രാം സമ്പത്ത്, അപർണ പുരോഹിത്, പ്രേരണ സിങ്, നമിത, സുഹാസിനി മണിരത്നം, അഭിഷേക് ജെയിൻ, സന്തോഷ് ശിവൻ, ഗൗരവ് ബാനർജി, ആദിത്യ ഭട്ട്, പ്രശാന്ത് ചോതാനി, ധരം ഗുലാട്ടി എന്നിവരും യോഗത്തിലുണ്ടായിരുന്നു.
.
