ദേശീയ ടെലിമെഡിസിൻ സേവനമായ ഇ സഞ്ജീവനി വഴി നടന്ന ഓൺലൈൻ ചികിത്സാ കൺസൾട്ടേഷനുകൾ 50 കോടി കടന്നു. 2026 സെപ്റ്റംബർ 15നാണ് ഈ നേട്ടത്തിലെത്തിയത്. രാജ്യത്തെ 36 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി അന്നുവരെ 50,00,92,730 കൺസൾട്ടേഷനുകളാണ് നടന്നത്. ദിവസവും ശരാശരി രണ്ടര മുതൽ മൂന്ന് ലക്ഷം വരെ കൺസൾട്ടേഷനുകൾ നടക്കുന്നുണ്ട്. ഒരു ദിവസം രേഖപ്പെടുത്തിയ ഏറ്റവും ഉയർന്ന എണ്ണം 6,30,315 ആണ്.

സ്ത്രീകൾക്കും മുതിർന്നവർക്കും ആശ്വാസം

കേന്ദ്ര ആരോഗ്യ കുടുംബക്ഷേമ മന്ത്രാലയത്തിന്റെ നേതൃത്വത്തിലുള്ള ഈ സേവനം, ഗ്രാമങ്ങളിലും വിദൂര പ്രദേശങ്ങളിലും കഴിയുന്നവർക്ക് ഡോക്ടർമാരെ ഓൺലൈനായി കാണാൻ സഹായിക്കുന്നു. സേവനത്തിന്റെ ആകെ ഉപയോഗത്തിൽ സ്ത്രീകളുടെ വിഹിതം 57.14 ശതമാനമാണ്. കൺസൾട്ടേഷനുകളിൽ 40.15 ശതമാനം 46 വയസ്സും അതിൽ കൂടുതലുമുള്ളവർക്കാണ് ലഭിച്ചത്. ആകെ കൺസൾട്ടേഷനുകളിൽ 16.25 ശതമാനം 60 വയസ്സും അതിൽ കൂടുതലുമുള്ളവർക്കാണ്. 1.42 ലക്ഷത്തിലധികം ആയുഷ്മാൻ ആരോഗ്യ മന്ദിറുകളും 19,473 മെഡിക്കൽ കേന്ദ്രങ്ങളും 901 ഓൺലൈൻ ഒപികളും ഈ സംവിധാനത്തിലുണ്ട്. രജിസ്റ്റർ ചെയ്ത ആരോഗ്യപ്രവർത്തകർ 2,41,923 പേരാണ്. പതിനഞ്ച് ഭാഷകളിൽ സേവനം ലഭ്യമാണ്. ചികിത്സാ തീരുമാനങ്ങളിൽ ഡോക്ടർമാരെ സഹായിക്കാൻ നിർമിതബുദ്ധി അധിഷ്ഠിത സംവിധാനവും ചേർത്തിട്ടുണ്ട്. അടിയന്തര സഹായത്തിനുള്ള 112 സംവിധാനവുമായും ഇ സഞ്ജീവനിയെ ബന്ധിപ്പിച്ചു.

വിദഗ്ധ ചികിത്സയും വീട്ടിലിരുന്ന്

സി ഡാക് വികസിപ്പിച്ച ഇ സഞ്ജീവനിക്ക് തുടക്കം മുതൽ സാങ്കേതിക പിന്തുണ നൽകുന്നത് മൊഹാലിയിലെ സി ഡാക് കേന്ദ്രമാണ്. പ്രാഥമിക ആരോഗ്യസേവനത്തിനപ്പുറം വിദഗ്ധ ചികിത്സയിലേക്കും സേവനം വ്യാപിപ്പിക്കുകയാണ്. ജോധ്പുർ, ജമ്മു, പട്‌ന എയിംസുകളിൽ തിരഞ്ഞെടുത്ത വിഭാഗങ്ങളിലെ വിദഗ്ധ ഡോക്ടർമാരെ രോഗികൾക്ക് വീട്ടിലിരുന്ന് ഓൺലൈനായി കാണാനുള്ള സൗകര്യം ആരംഭിച്ചു. ദീർഘദൂര യാത്രയും ആശുപത്രികളിലെ കാത്തിരിപ്പും കുറയ്ക്കുകയാണ് ലക്ഷ്യം. മറ്റ് എയിംസുകളിലേക്കും ജിപ്മറിലേക്കും ചണ്ഡീഗഢിലെ പിജിഐഎംഇആറിലേക്കും സൗകര്യം ഘട്ടംഘട്ടമായി വ്യാപിപ്പിക്കാനാണ് പദ്ധതി. ഇ സഞ്ജീവനിയിലെ നിർമിതബുദ്ധി അധിഷ്ഠിത സംവിധാനത്തിന് 2026ലെ ദേശീയ ഇ ഗവേണൻസ് പുരസ്കാരത്തിൽ സ്വർണ പുരസ്കാരവും ലഭിച്ചു.