ഹരിദ്വാർ, 2026 ജൂൺ 27 

ജൂൺ പതിനേഴു മുതൽ ഇരുപത്തിയാറ് വരെ നടന്ന മയക്കുമരുന്ന് വിമുക്ത ഭാരത് വാരം ഒരുകോടി മുപ്പത്തിയൊന്ന് ലക്ഷത്തിലേറെ പേരുടെ പങ്കാളിത്തത്തോടെ സമാപിച്ചു. മയക്കുമരുന്ന് ദുരുപയോഗത്തിനും അനധികൃത കടത്തിനുമെതിരായ അന്താരാഷ്ട്ര ദിനത്തിന്റെ ഭാഗമായി സംഘടിപ്പിച്ച പരിപാടികളുടെ സമാപനച്ചടങ്ങ് ഉത്തരാഖണ്ഡിലെ ഹരിദ്വാറിലുള്ള ദേവ് സംസ്കൃതി വിശ്വവിദ്യാലയത്തിൽ നടന്നു. ബോധവൽക്കരണ പരിപാടികൾ, രജിസ്ട്രേഷൻ പ്രവർത്തനങ്ങൾ, സെമിനാറുകൾ, പരിശീലനങ്ങൾ, തെരുവുനാടകങ്ങൾ, മുദ്രാവാക്യ രചന, പ്രതിജ്ഞ, റാലികൾ, യോഗ, ഒപ്പുശേഖരണം, ഉപന്യാസ-ചിത്രരചന മത്സരങ്ങൾ തുടങ്ങി വിവിധ പരിപാടികളാണ് നടന്നത്.

കേന്ദ്ര സാമൂഹ്യനീതി ശാക്തീകരണ മന്ത്രി ഡോക്ടർ വീരേന്ദ്ര കുമാർ ചടങ്ങിന് നേതൃത്വം നൽകി. അദ്ദേഹത്തിന്റെ നേതൃത്വത്തിൽ നടന്ന മയക്കുമരുന്ന് വിരുദ്ധ റാലിയിൽ നാലായിരത്തോളം പേർ പങ്കെടുത്തു. മയക്കുമരുന്ന് വിരുദ്ധ പ്രതിജ്ഞയും അന്തസ്സോടെ വാർധക്യം നയിക്കാനുള്ള പ്രതിജ്ഞയും മന്ത്രി ചൊല്ലിക്കൊടുത്തു. വിദ്യാർഥികൾ, യുവാക്കൾ, സന്നദ്ധപ്രവർത്തകർ, ആത്മീയ സംഘടനകളുടെ പ്രതിനിധികൾ, ഉത്തരാഖണ്ഡ് സർക്കാർ പ്രതിനിധികൾ, വിവിധ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും പ്രതിനിധികൾ, ചികിത്സാ സ്ഥാപനങ്ങൾ, മറ്റ് പങ്കാളികൾ എന്നിവർ നേരിട്ടും ഓൺലൈനായും പങ്കെടുത്തു. സാമൂഹ്യനീതി ശാക്തീകരണ വകുപ്പും അഖില ലോക ഗായത്രി പരിവാറും തമ്മിൽ രണ്ട് ധാരണാപത്രങ്ങളിലും ഒപ്പുവെച്ചു.

മയക്കുമരുന്ന് വിമുക്ത ഭാരത് അഭിയാനും വാർധക്യ ക്ഷേമ പദ്ധതിയും കൂടുതൽ ശക്തിപ്പെടുത്തുക എന്ന ലക്ഷ്യത്തോടെയാണ് ഈ ധാരണാപത്രങ്ങൾ. ബോധവൽക്കരണം, ജനപങ്കാളിത്തം, മയക്കുമരുന്നിന്റെ ആവശ്യകത കുറയ്ക്കൽ, മുതിർന്ന പൗരന്മാരുടെ ക്ഷേമം എന്നിവയിൽ സഹകരണം വർധിപ്പിക്കാനാണ് തീരുമാനം. വിവിധ സംസ്ഥാനങ്ങൾ, കേന്ദ്രഭരണ പ്രദേശങ്ങൾ, ജില്ലകൾ, വകുപ്പുകൾ, ധനസഹായം ലഭിക്കുന്ന സ്ഥാപനങ്ങൾ, മയക്കുമരുന്ന് വിമുക്ത പ്രവർത്തകർ എന്നിവരുടെ പ്രവർത്തനങ്ങളും ചടങ്ങിൽ ആദരിച്ചു. മയക്കുമരുന്ന് വിമുക്തവും സന്തുഷ്ടവുമായ ഇന്ത്യ എന്ന ലക്ഷ്യം കൈവരിക്കാൻ എല്ലാ പൗരന്മാരും സ്ഥാപനങ്ങളും കൈകോർക്കണമെന്ന് സാമൂഹ്യനീതി ശാക്തീകരണ വകുപ്പ് ആഹ്വാനം ചെയ്തു.