ന്യൂഡൽഹി / 2026 / ഒക്ടോബർ 12
ഒമ്പത് ബ്രിക്സ് അംഗ, പങ്കാളി രാജ്യങ്ങളുടെ നാടകപാരമ്പര്യങ്ങൾ ഒന്നിക്കുന്ന ബ്രിക്സ് നാടകോത്സവത്തിന് ന്യൂഡൽഹിയിലെ നാഷണൽ സ്കൂൾ ഓഫ് ഡ്രാമയിൽ ഇന്ന് തുടക്കമായി. കേന്ദ്ര സാംസ്കാരിക, വിനോദസഞ്ചാര മന്ത്രി ഗജേന്ദ്ര സിങ് ഷെഖാവത്ത് ഉദ്ഘാടനച്ചടങ്ങിൽ മുഖ്യാതിഥിയായി പങ്കെടുത്തു. ഇന്ത്യയുടെ 2026ലെ ബ്രിക്സ് അധ്യക്ഷപദവിയുടെ ഭാഗമായി കേന്ദ്ര സാംസ്കാരിക മന്ത്രാലയം സംഘടിപ്പിക്കുന്ന മേള ഒക്ടോബർ 14 വരെ നടക്കും. ‘പങ്കിടുന്ന കഥകൾ, പങ്കിടുന്ന ഭാവികൾ’ എന്നതാണ് പ്രമേയം. ബ്രിക്സ് രാജ്യങ്ങളുടെ വ്യത്യസ്ത നാടകപാരമ്പര്യങ്ങളും സമകാലിക അവതരണരീതികളും പൊതുവായ സാംസ്കാരിക മൂല്യങ്ങളും ആഘോഷിക്കുന്ന മേളയിൽ നാടകപ്രവർത്തകർ, ഗവേഷകർ, വിദ്യാർഥികൾ, സാംസ്കാരിക പ്രതിനിധികൾ എന്നിവർ പങ്കെടുക്കുന്നു.
ഒമ്പത് രാജ്യങ്ങൾ; നാടകത്തിലൂടെ സാംസ്കാരിക കൈമാറ്റം
ന്യൂഡൽഹിയിൽ ബ്രിക്സ് ഉച്ചകോടി വിജയകരമായി പൂർത്തിയായതിന് പിന്നാലെയാണ് ഇന്ത്യയുടെ അധ്യക്ഷപദവിക്ക് കീഴിലുള്ള മറ്റൊരു പ്രധാന സാംസ്കാരിക പരിപാടിയായി നാടകോത്സവം നടക്കുന്നത്. ഇന്ത്യ, തായ്‌ലൻഡ്, ഇന്തോനേഷ്യ, റഷ്യ, ഇറാൻ, വിയറ്റ്നാം, ദക്ഷിണാഫ്രിക്ക, കസാഖ്‌സ്ഥാൻ, എത്യോപ്യ എന്നീ രാജ്യങ്ങളാണ് പങ്കെടുക്കുന്നത്. നാടകത്തിന്റെ പൊതുഭാഷയിലൂടെ കലാപരവും സാംസ്കാരികവുമായ കൈമാറ്റത്തിന് മേള വേദിയൊരുക്കുന്നു. ഉദ്ഘാടനച്ചടങ്ങിൽ കേന്ദ്ര സാംസ്കാരിക മന്ത്രാലയം സെക്രട്ടറി വിവേക് അഗർവാൾ, വിദേശകാര്യ മന്ത്രാലയത്തിലെ സാമ്പത്തിക ബന്ധങ്ങളുടെ ചുമതലയുള്ള സെക്രട്ടറിയും 2026ലെ ഇന്ത്യയുടെ ബ്രിക്സ് ഷെർപ്പയുമായ സുധാകർ ദലേല, നാഷണൽ സ്കൂൾ ഓഫ് ഡ്രാമ ഡയറക്ടർ ചിത്തരഞ്ജൻ ത്രിപാഠി എന്നിവർ പങ്കെടുത്തു. പങ്കെടുക്കുന്ന രാജ്യങ്ങളുടെ അംബാസഡർമാരും നയതന്ത്ര ദൗത്യങ്ങളുടെ തലവന്മാരും ചടങ്ങിൽ സന്നിഹിതരായിരുന്നു.
അതിർത്തികൾ കടന്ന് ബന്ധങ്ങൾ തീർക്കുന്നത് സംസ്കാരം
അന്താരാഷ്ട്ര സമൂഹത്തിന് ഏറെ നിർണായകമായ സമയത്താണ് ഈ സംഗമം നടക്കുന്നതെന്ന് ഗജേന്ദ്ര സിങ് ഷെഖാവത്ത് പറഞ്ഞു. പരസ്പരം മത്സരിക്കുന്ന താൽപര്യങ്ങൾക്കിടയിലൂടെ രാജ്യങ്ങൾക്ക് മുന്നോട്ടുപോകേണ്ടിവരുന്ന സാഹചര്യത്തിൽ, പരസ്പര ധാരണയ്ക്കും ക്രിയാത്മക സംവാദത്തിനുമുള്ള ഇടങ്ങൾ മുമ്പത്തേക്കാൾ വിലപ്പെട്ടതാകുകയാണെന്നും അദ്ദേഹം പറഞ്ഞു. നയതന്ത്രം രാജ്യങ്ങളെ ചർച്ചകൾ നടത്താൻ സഹായിക്കുന്നു. സാമ്പത്തിക സഹകരണം അവയുടെ അഭിവൃദ്ധിക്ക് വഴിയൊരുക്കുന്നു. എന്നാൽ സമൂഹങ്ങൾ പരസ്പരം മനസ്സിലാക്കാൻ സഹായിക്കുന്നത് സംസ്കാരമാണെന്ന് മന്ത്രി വ്യക്തമാക്കി. രാഷ്ട്രീയ അതിർത്തികൾക്കപ്പുറമുള്ള ബന്ധങ്ങൾ സംസ്കാരം സൃഷ്ടിക്കുന്നു. ചരിത്രങ്ങളും ഭാഷകളും പാരമ്പര്യങ്ങളും വ്യത്യസ്തമായാലും ഈ വിശ്വാസമാണ് ബ്രിക്സ് നാടകോത്സവത്തിന് അവതരണകലകൾക്കപ്പുറമുള്ള പ്രാധാന്യം നൽകുന്നതെന്നും അദ്ദേഹം പറഞ്ഞു. ആദ്യദിനത്തിൽ ആസിഫ് അലി എഴുതിയ ‘സമുദ്ര മഥൻ’ അരങ്ങേറി. നാടകത്തിന്റെ രൂപകൽപ്പനയും സംവിധാനവും സംഗീതവും നിർവഹിച്ചത് ചിത്തരഞ്ജൻ ത്രിപാഠിയാണ്. നാഷണൽ സ്കൂൾ ഓഫ് ഡ്രാമയിലെ അഭിമഞ്ച് ഓഡിറ്റോറിയത്തിലായിരുന്നു അവതരണം.
വിവിധ വേദികളിൽ നാടകങ്ങൾ; ടിക്കറ്റിന് 200 രൂപ
നാഷണൽ സ്കൂൾ ഓഫ് ഡ്രാമയിലെ അഭിമഞ്ച്, സമ്മുഖ് ഓഡിറ്റോറിയങ്ങൾ, കമാനി ഓഡിറ്റോറിയം, എൽടിജി ഓഡിറ്റോറിയം, മേഘദൂത് തിയേറ്റർ എന്നിവയുൾപ്പെടെ ന്യൂഡൽഹിയിലെ വിവിധ വേദികളിലാണ് നാടകങ്ങൾ അവതരിപ്പിക്കുക. ബുക്ക് മൈ ഷോ വഴി ടിക്കറ്റുകൾ ലഭിക്കും. ഒരു ടിക്കറ്റിന് 200 രൂപയാണ് നിരക്ക്. വിവിധ രാജ്യങ്ങളിലെ നാടകങ്ങളും അവതരണകലകളും കാണാനുള്ള അവസരമാണ് ഇതിലൂടെ പ്രേക്ഷകർക്ക് ലഭിക്കുന്നത്. പങ്കെടുക്കുന്ന രാജ്യങ്ങളിലെ ദേശീയ നാടകവിദ്യാലയങ്ങളും പ്രമുഖ നാടകസ്ഥാപനങ്ങളും മേളയുടെ ഭാഗമാകും. റഷ്യയിൽനിന്ന് രണ്ട് നാടകസംഘങ്ങൾ പങ്കെടുക്കുന്നു. ഇന്ത്യ രണ്ട് നാടകങ്ങൾ അവതരിപ്പിക്കും. ഓരോ രാജ്യത്തിന്റെയും ഭാഷകൾ, സാംസ്കാരിക കാഴ്ചപ്പാടുകൾ, നാടകപാരമ്പര്യങ്ങൾ, സമകാലിക കലാവിഷ്കാരങ്ങൾ എന്നിവ പ്രതിഫലിപ്പിക്കുന്ന സൃഷ്ടികളാണ് അരങ്ങിലെത്തുക. തിരഞ്ഞെടുത്ത പരിപാടികളിൽ ക്ലാസിക്കൽ, സമകാലിക, പരീക്ഷണ നാടകങ്ങൾ ഉൾപ്പെടുന്നു.
ശിൽപ്പശാലകളും ചർച്ചകളും; തുടർ സഹകരണത്തിന് വഴിയൊരുക്കും
‘പ്രതിസന്ധികളെ അതിജീവിക്കാനുള്ള ശേഷി, പുതുമ, സഹകരണം, സുസ്ഥിരത എന്നിവയ്ക്കായി പ്രവർത്തിക്കുക’ എന്ന പ്രമേയത്തിലാണ് ഇന്ത്യ 2026ലെ ബ്രിക്സ് അധ്യക്ഷപദവി ഏറ്റെടുത്തിരിക്കുന്നത്. ജനങ്ങളെ കേന്ദ്രമാക്കി ബ്രിക്സ് രാജ്യങ്ങൾ തമ്മിലുള്ള സഹകരണം ശക്തിപ്പെടുത്തുകയാണ് സമീപനം. സാംസ്കാരിക, സർഗാത്മക വ്യവസായങ്ങളിലെ സഹകരണം, സാംസ്കാരിക പൈതൃക സംരക്ഷണം, കാലാവസ്ഥാ വെല്ലുവിളികളെ നേരിടുന്നതിലും സുസ്ഥിര വികസനത്തിലുമുള്ള സംസ്കാരത്തിന്റെ പങ്ക് എന്നിവയ്ക്കാണ് സാംസ്കാരിക വിഭാഗം മുൻഗണന നൽകുന്നത്. തത്സമയ നാടകാവതരണങ്ങളിലൂടെ കലാകൈമാറ്റവും സാംസ്കാരിക സംവാദവും ജനങ്ങൾ തമ്മിലുള്ള ബന്ധവും വളർത്തി മേള ഈ ലക്ഷ്യങ്ങൾക്ക് പിന്തുണ നൽകും. കലാപരമായ ഇടപെടലുകളും തൊഴിൽപരമായ അനുഭവകൈമാറ്റവും പ്രോത്സാഹിപ്പിക്കാൻ നാടകാവതരണങ്ങൾക്ക് ശേഷമുള്ള പ്രഭാതങ്ങളിൽ സംവേദനാത്മക ശിൽപ്പശാലകളും ചർച്ചകളും സംഘടിപ്പിക്കും. സംവിധായകർ, അഭിനേതാക്കൾ, അണിയറപ്രവർത്തകർ എന്നിവർ പങ്കെടുക്കും. കലാപരമായ കാഴ്ചപ്പാട്, അവതരണപാരമ്പര്യങ്ങൾ, അഭിനയരീതികൾ, രംഗാവതരണ സാങ്കേതികവിദ്യകൾ എന്നിവ ചർച്ച ചെയ്യും. പ്രേക്ഷകരുമായുള്ള സംവാദവും കൂട്ടായ പരിശീലനങ്ങളും ഇതിന്റെ ഭാഗമാകും. വ്യത്യസ്ത സംസ്കാരങ്ങളെക്കുറിച്ചുള്ള പഠനം, അറിവിന്റെ കൈമാറ്റം, ദീർഘകാല സഹകരണം എന്നിവയാണ് ലക്ഷ്യം. വൈവിധ്യമാർന്ന കഥകളും അവതരണപാരമ്പര്യങ്ങളും വഴി ഓരോ രാജ്യത്തിന്റെയും സാംസ്കാരിക വ്യക്തിത്വം ആഘോഷിക്കുന്നതിനൊപ്പം പരസ്പര ധാരണയും സഹകരണവും ശക്തിപ്പെടുത്താനും മേള ശ്രമിക്കുന്നു. കേന്ദ്ര സാംസ്കാരിക മന്ത്രാലയത്തിന് കീഴിലുള്ള സ്വയംഭരണ സ്ഥാപനമായ നാഷണൽ സ്കൂൾ ഓഫ് ഡ്രാമയാണ് സംഘാടനത്തിന്റെ ഏകോപനച്ചുമതല വഹിക്കുന്നത്. വിവിധ രാജ്യങ്ങളിലെ നാടകസ്ഥാപനങ്ങളെയും പ്രവർത്തകരെയും ഒരുമിപ്പിച്ച് കലാകൈമാറ്റവും അന്താരാഷ്ട്ര സാംസ്കാരിക ബന്ധങ്ങളും ശക്തിപ്പെടുത്തുകയാണ് സ്ഥാപനത്തിന്റെ പങ്ക്. നാടകമികവ് പ്രദർശിപ്പിക്കുന്നതിനൊപ്പം സാംസ്കാരിക സംവാദത്തിനും തൊഴിൽപരമായ അനുഭവകൈമാറ്റത്തിനും ജനങ്ങൾ തമ്മിലുള്ള ബന്ധത്തിനും മേള വേദിയാകും. ബ്രിക്സ് സഹകരണത്തിന്റെ വിശാലമായ ലക്ഷ്യങ്ങൾക്ക് അനുസൃതമായി, അതിർത്തികൾക്കപ്പുറമുള്ള കഥകളെയും കലാകാരന്മാരെയും പ്രേക്ഷകരെയും ഒന്നിപ്പിച്ച് തുടർ സഹകരണത്തിനുള്ള അവസരങ്ങളും ഒരുക്കും.
