രാജ്യത്തെ ആദ്യ ദേശീയ ഗ്രാമവികസന സമ്മേളനം ജൂൺ 28,29 തീയതികളിൽ ന്യൂഡൽഹിയിലെ ഭാരതരത്ന സി. സുബ്രഹ്മണ്യം ഓഡിറ്റോറിയത്തിൽ നടക്കും. കേന്ദ്ര കൃഷി-കർഷകക്ഷേമ, ഗ്രാമവികസന മന്ത്രി ശിവരാജ് സിങ് ചൗഹാൻ സമ്മേളനത്തിന് അധ്യക്ഷനാകും. എല്ലാ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും ഗ്രാമവികസന മന്ത്രിമാരും മുതിർന്ന ഉദ്യോഗസ്ഥരും വിദഗ്ധരും പങ്കെടുക്കും. ഗ്രാമവികസന പദ്ധതികളുടെ പുരോഗതി വിലയിരുത്തുകയും ഭാവി പ്രവർത്തനരേഖ തയ്യാറാക്കുകയും ചെയ്യുകയാണ് ലക്ഷ്യം.

‘വികസിത ഗ്രാമം, വികസിത ഭാരതം’ എന്ന ലക്ഷ്യം യാഥാർഥ്യമാക്കാനാണ് സമ്മേളനം സംഘടിപ്പിക്കുന്നതെന്ന് ശിവരാജ് സിങ് ചൗഹാൻ അറിയിച്ചു. ഗ്രാമപഞ്ചായത്ത് തലത്തിലെ ആസൂത്രണം ശക്തിപ്പെടുത്തൽ, വിഭവങ്ങളുടെ കാര്യക്ഷമ വിനിയോഗം, പ്രധാന ഗ്രാമവികസന പദ്ധതികളുടെ നടപ്പാക്കൽ എന്നിവ ചർച്ചയാകും. ഗ്രാമഭവന പദ്ധതി, ഗ്രാമീണ റോഡ് പദ്ധതി, ദേശീയ ഗ്രാമീണ ഉപജീവന ദൗത്യം, ഗ്രാമീണ നൈപുണ്യ വികസനം, ദേശീയ സാമൂഹിക സഹായ പദ്ധതി എന്നിവയും അവലോകനം ചെയ്യും. സംസ്ഥാനങ്ങളുടെ അനുഭവങ്ങളും പുതുമകളും വെല്ലുവിളികളും പങ്കുവെച്ച് പ്രായോഗിക നയരൂപീകരണത്തിനും വേദിയൊരുക്കും.

ഗ്രാമഭവനം, റോഡ് ബന്ധം, ഉപജീവനം, നൈപുണ്യ വികസനം, സാമൂഹിക സുരക്ഷ തുടങ്ങിയ വിഷയങ്ങളിൽ പ്രത്യേക ചർച്ചകൾ നടക്കും. സ്ത്രീകളുടെ സാമ്പത്തിക ശാക്തീകരണത്തിനായുള്ള ‘ലക്ഷപതി ദീദി’ സംരംഭം, സ്വയംസഹായ സംഘങ്ങൾ, ഗ്രാമീണ സംരംഭകത്വം, യുവാക്കൾക്കുള്ള തൊഴിൽ അവസരങ്ങൾ എന്നിവയ്ക്കും പ്രാധാന്യം നൽകും. സാങ്കേതികവിദ്യയും കൃത്രിമ ബുദ്ധിയും ഗ്രാമവികസനത്തിൽ എങ്ങനെ കൂടുതൽ ഫലപ്രദമായി ഉപയോഗിക്കാമെന്നതും ചർച്ചയാകും. രണ്ടാം ദിവസം സംസ്ഥാനങ്ങളുടെ നിർദേശങ്ങൾ പരിഗണിച്ച് ഭാവി പ്രവർത്തനപദ്ധതി തയ്യാറാക്കും. ജലസുരക്ഷ, ഗ്രാമ വികസന പദ്ധതികൾ, വനിതാ ശാക്തീകരണം, ഗ്രാമീണ ഉപജീവനം, വിജയകഥകൾ എന്നിവ ഉൾപ്പെട്ട പ്രസിദ്ധീകരണങ്ങളും സമ്മേളനത്തിൽ പുറത്തിറക്കും.