കൊച്ചി, 2026 ജൂൺ 26 –

വീര്യം കുറഞ്ഞ മദ്യത്തിന് ഏർപ്പെടുത്തിയ നികുതി സ്ലാബുമായി ബന്ധപ്പെട്ട വിവാദങ്ങൾക്കിടെ മുതിർന്ന കോൺഗ്രസ് നേതാവ് വി. എം. സുധീരനെതിരെ പരോക്ഷ വിമർശനവുമായി മുൻ എക്സൈസ് മന്ത്രി കെ. ബാബു രംഗത്തെത്തി. യുഡിഎഫിൽ മദ്യനയം സുഗമമായി നടപ്പാക്കാൻ കഴിയില്ലെന്നും ഓരോരുത്തർക്കും ഓരോ നയമാണെന്നും കെ. ബാബു പറഞ്ഞു. യുഡിഎഫിൽ വാളെടുത്തവരെല്ലാം വെളിച്ചപ്പാടാണെന്നും, അവർ സർക്കാരിനെ സഹായിക്കുകയാണെന്നാണ് താൻ കരുതുന്നതെന്നും പ്രതികരിച്ചു. ഉമ്മൻചാണ്ടി സർക്കാരിന്റെ കാലത്തും അത്തരം പിന്തുണ ലഭിച്ചിരുന്നുവെന്നും പരിഹസിച്ചു.

വീര്യം കുറഞ്ഞ മദ്യത്തിന് സംസ്ഥാന ബജറ്റിൽ ഏർപ്പെടുത്തിയ നികുതി സ്ലാബിനെതിരെ വി. എം. സുധീരൻ നേരത്തെ അതൃപ്തി പ്രകടിപ്പിച്ചിരുന്നു. നിയമസഭയിൽ നിർദേശം അവതരിപ്പിക്കുന്നതിന് മുമ്പ് പാർട്ടി തലത്തിലും യുഡിഎഫ് തലത്തിലും വിഷയം ചർച്ച ചെയ്യേണ്ടിയിരുന്നുവെന്നും, അങ്ങനെ ചെയ്തിരുന്നെങ്കിൽ ഇപ്പോഴത്തെ വിവാദങ്ങൾ ഒഴിവാക്കാമായിരുന്നുവെന്നും അദ്ദേഹം പറഞ്ഞു. മദ്യവ്യാപനം തടയേണ്ടതിന്റെ ആവശ്യകത മുഖ്യമന്ത്രിയുടെയും എക്സൈസ് മന്ത്രിയുടെയും ശ്രദ്ധയിൽപ്പെടുത്തിയിരുന്നുവെന്നും വ്യക്തമാക്കി.

തീരുമാനങ്ങളിൽ സുതാര്യത വേണമെന്ന് വി. എം. സുധീരൻ

സർക്കാരിന്റെ വിശ്വാസ്യതയെ ബാധിക്കുന്ന തീരുമാനങ്ങൾ ഉണ്ടാകരുതെന്നും, എല്ലാ തീരുമാനങ്ങളും സുതാര്യമായി കൈക്കൊള്ളണമെന്നും വി. എം. സുധീരൻ ആവശ്യപ്പെട്ടു. മയക്കുമരുന്ന് വിഷയത്തിൽ ആഭ്യന്തര വകുപ്പ് നല്ല രീതിയിൽ പ്രവർത്തിക്കുന്നുണ്ടെന്നും പറഞ്ഞു. കരിമണൽ ഖനന നയത്തിലും അവ്യക്തത തുടരുകയാണെന്നും, ഖനനം ഉണ്ടാകില്ലെന്ന് സർക്കാർ വ്യക്തമാക്കണമെന്നും ആവശ്യപ്പെട്ടു.