ഇറക്കുമതി മരുന്നുകളുടെ ശേഷിക്കുന്ന ഉപയോഗകാല നിബന്ധനയിൽ ഭേദഗതി; പൊതുജനാഭിപ്രായം തേടി കേന്ദ്രം

ന്യൂഡൽഹി, 2026 ജൂൺ 26

ഇറക്കുമതി ചെയ്യുന്ന മരുന്നുകളുടെ ശേഷിക്കുന്ന ഉപയോഗകാലവുമായി ബന്ധപ്പെട്ട നിലവിലെ നിബന്ധനയിൽ മാറ്റം വരുത്താൻ കേന്ദ്ര ആരോഗ്യ-കുടുംബക്ഷേമ മന്ത്രാലയം കരട് വിജ്ഞാപനം പുറത്തിറക്കി. നിലവിൽ ഇറക്കുമതി സമയത്ത് മരുന്നിന് അറുപത് ശതമാനത്തിലധികം ഉപയോഗകാലം ബാക്കിയുണ്ടാകണമെന്ന വ്യവസ്ഥയ്ക്ക് പകരം, കുറഞ്ഞത് പന്ത്രണ്ട് മാസം ഉപയോഗകാലം ശേഷിച്ചാൽ മതിയെന്നതാണ് നിർദേശം. എന്നാൽ ജൈവ ഉൽപ്പന്നങ്ങൾക്കും വികിരണ ഔഷധങ്ങൾക്കും നിലവിലെ അറുപത് ശതമാനത്തിലധികം ഉപയോഗകാല നിബന്ധന തുടരും. ജൂൺ ഇരുപത്തിരണ്ടിന് പ്രസിദ്ധീകരിച്ച കരട് വിജ്ഞാപനത്തിലാണ് ഈ നിർദേശം ഉൾപ്പെടുത്തിയിരിക്കുന്നത്.

ഔഷധ വിതരണ ശൃംഖല കൂടുതൽ കാര്യക്ഷമമാക്കുകയും രോഗികൾക്ക് മതിയായ ഉപയോഗകാലമുള്ള ഗുണമേന്മയുള്ള മരുന്നുകൾ ലഭ്യമാക്കുകയും ചെയ്യുക എന്ന ലക്ഷ്യത്തോടെയാണ് ഭേദഗതി നിർദേശിച്ചിരിക്കുന്നത്. ഉപയോഗിക്കാതെ പാഴാകുന്ന മരുന്നുകളുടെ അളവ് കുറയ്ക്കാനും വിതരണ നിയന്ത്രണം മെച്ചപ്പെടുത്താനും ചെലവ് കുറയ്ക്കാനും അത്യാവശ്യ മരുന്നുകളുടെ ലഭ്യത ശക്തിപ്പെടുത്താനും ഇത് സഹായിക്കുമെന്നാണ് മന്ത്രാലയം വ്യക്തമാക്കുന്നത്. ഈ ഭേദഗതി ഇറക്കുമതി സമയത്തെ ശേഷിക്കുന്ന ഉപയോഗകാല നിബന്ധനയിൽ മാത്രമാണെന്നും, മരുന്നുകളുടെ ഗുണനിലവാരം, സുരക്ഷ, ഫലപ്രാപ്തി എന്നിവ സംബന്ധിച്ച നിലവിലെ നിയമങ്ങളിൽ മാറ്റമില്ലെന്നും മന്ത്രാലയം വ്യക്തമാക്കി.

കരട് വിജ്ഞാപനത്തെക്കുറിച്ച് എല്ലാ ബന്ധപ്പെട്ട വിഭാഗങ്ങളിൽ നിന്നുമുള്ള എതിർപ്പുകളും നിർദേശങ്ങളും മന്ത്രാലയം ക്ഷണിച്ചിട്ടുണ്ട്. നിശ്ചയിച്ചിരിക്കുന്ന സമയപരിധിക്കുള്ളിൽ അഭിപ്രായങ്ങൾ മന്ത്രാലയത്തിന് സമർപ്പിക്കാം. ലഭിക്കുന്ന നിർദേശങ്ങൾ പരിശോധിച്ച ശേഷമായിരിക്കും തുടർനടപടികൾ സ്വീകരിക്കുക.