തിരുവനന്തപുരം, 2026 ജൂൺ 24 –
നിയമസഭയിൽ നടത്തിയ പ്രസംഗത്തിനിടെ മുൻ സർക്കാരിനെതിരെ രൂക്ഷ വിമർശനവുമായി എ ഡി തോമസ് എംഎൽഎ. തന്നെ എംഎൽഎ ആക്കിയത് “രക്ഷാപ്രവർത്തനമാണെന്ന്” പരിഹാസരൂപേണ പറഞ്ഞ അദ്ദേഹം, മുൻ ഭരണകാലത്ത് നടന്ന രാഷ്ട്രീയ അതിക്രമങ്ങൾ ചൂണ്ടിക്കാട്ടിയാണ് വിമർശനം ഉന്നയിച്ചത്.
ആലപ്പുഴ നഗരത്തിൽ തനിക്കും അജയ് കുര്യാക്കോസിനും നേരെ നടന്ന ആക്രമണം പരാമർശിച്ച എ ഡി തോമസ്, തങ്ങളെ “പട്ടിയെ തല്ലും പോലെ തല്ലിയെന്ന്” ആരോപിച്ചു. എന്നാൽ സംഭവം നടന്നിട്ടില്ലെന്നായിരുന്നു അന്നത്തെ മുഖ്യമന്ത്രിയുടെ ആദ്യ പ്രതികരണമെന്നും പിന്നീട് അതിനെ “രക്ഷാപ്രവർത്തനം” എന്നാണ് വിശേഷിപ്പിച്ചതെന്നും അദ്ദേഹം പറഞ്ഞു. മുൻ സർക്കാരിന്റെ കാലത്ത് നിരവധി യുവാക്കൾക്ക് ആക്രമണങ്ങളിൽ പരിക്കേറ്റതായും അദ്ദേഹം ആരോപിച്ചു.
ആയിരക്കണക്കിന് അമ്മമാരുടെ കണ്ണുനീർ കേരളത്തിന്റെ തെരുവുകളിൽ വീണിട്ടുണ്ടെന്നും ആ കുടുംബങ്ങളുടെ വേദന ഉത്തരവാദികളായവരെ പിന്തുടരുമെന്നും എ ഡി തോമസ് പറഞ്ഞു. പ്രതിപക്ഷ നേതാവ് പിണറായി വിജയനെ ലക്ഷ്യമിട്ടായിരുന്നു അദ്ദേഹത്തിന്റെ പരാമർശങ്ങൾ.
