കൊച്ചി, 2026 ജൂൺ 24 –

കോതമംഗലം പിണ്ടിമന പഞ്ചായത്തിൽ ഒരു മാസത്തിലേറെയായി ജനവാസ മേഖലയിലിറങ്ങി ഭീതി പരത്തുന്ന കാട്ടാനയെ മയക്കുവെടി വയ്ക്കാൻ അനുമതി നൽകി. മയക്കുവെടി നടപടികൾക്കായി വനംവകുപ്പ് മന്ത്രി ഷിബു ബേബി ജോൺ ബന്ധപ്പെട്ട ഡിഎഫ്ഒയ്ക്ക് അനുമതി നൽകിയതോടെയാണ് നടപടികൾക്ക് വഴി തുറന്നത്.

നിലവിൽ വൈറ്റിലപ്പാറ ഭാഗത്തെ 14-ാം വാർഡിലാണ് കാട്ടാന നിലയുറപ്പിച്ചിരിക്കുന്നത്. കഴിഞ്ഞ ഒരു മാസമായി പ്രദേശവാസികളിൽ ആശങ്ക സൃഷ്ടിച്ചിരുന്ന ആനയെ ഉൾവനത്തിലേക്ക് തുരത്താനുള്ള ശ്രമങ്ങൾ ഫലപ്രദമായിരുന്നില്ല. ഇതിനെ തുടർന്നാണ് മയക്കുവെടി എന്ന നടപടിയിലേക്ക് വനംവകുപ്പ് നീങ്ങുന്നത്.

നേരത്തെ കാട്ടാനയെ ഉൾവനത്തിലേക്ക് തുരത്താൻ എറണാകുളം ജില്ലാ കളക്ടർ നിർദേശം നൽകിയിരുന്നെങ്കിലും അത് നടപ്പായിരുന്നില്ല. ജനവാസ മേഖലയിൽ എത്തിയ കാട്ടാന കൃഷിയിടങ്ങളിൽ വ്യാപക നാശനഷ്ടമുണ്ടാക്കുകയും വൈദ്യുതി കണക്ഷൻ കേബിളുകൾ തകർക്കുകയും ചെയ്തിരുന്നു. തുടർച്ചയായ ജനകീയ പ്രതിഷേധങ്ങളും ആശങ്കകളും ഉയർന്ന സാഹചര്യത്തിലാണ് പുതിയ തീരുമാനം.