കൊച്ചി, 2026 ജൂൺ 24 –

2024 ലോക്സഭാ തിരഞ്ഞെടുപ്പിൽ ആലപ്പുഴ മണ്ഡലത്തിൽ നിന്നുള്ള കോൺഗ്രസ് എംപി കെ സി വേണുഗോപാലിന്റെ വിജയം ചോദ്യം ചെയ്ത് മുൻ എംപി എ എം ആരിഫ് സമർപ്പിച്ച തിരഞ്ഞെടുപ്പ് ഹർജി കേരള ഹൈക്കോടതി തള്ളി. ജസ്റ്റിസ് ജി. ഗിരീഷ് അടങ്ങിയ ബെഞ്ചാണ് ഹർജി നിരസിച്ച് ഉത്തരവിട്ടത്.

സിവിൽ നടപടി ചട്ടപ്രകാരമാണ് ഹർജി തള്ളിയതെന്നാണ് വിവരം. ഹർജി സമർപ്പിക്കുന്നതിൽ ഉണ്ടായ ചില സാങ്കേതിക പിഴവുകൾ മൂലം കേസ് നമ്പർ ചെയ്യപ്പെടാത്ത സാഹചര്യമുണ്ടായിരുന്നുവെന്നും കോടതി നിരീക്ഷിച്ചു. വിഷയവുമായി ബന്ധപ്പെട്ട വിശദമായ ഉത്തരവ് പിന്നീട് പുറപ്പെടുവിക്കും.

സിപിഎം നേതാവും ആലപ്പുഴ മുൻ എംപിയുമായ എ എം ആരിഫ് 2024 ലോക്സഭാ തിരഞ്ഞെടുപ്പിൽ എൽഡിഎഫ് സ്ഥാനാർഥിയായാണ് മത്സരിച്ചത്. എഐസിസി ജനറൽ സെക്രട്ടറിയും കോൺഗ്രസ് നേതാവുമായ കെ സി വേണുഗോപാലിനോടായിരുന്നു അദ്ദേഹത്തിന്റെ പരാജയം. ഈ തിരഞ്ഞെടുപ്പ് ഫലം ചോദ്യം ചെയ്താണ് എ എം ആരിഫ് ഹൈക്കോടതിയെ സമീപിച്ചിരുന്നത്.