സേവന മേഖലയുടെ വളർച്ച അളക്കാൻ പുതിയ സൂചിക ജൂലൈയിൽ

ന്യൂഡൽഹി, 2026 ജൂൺ 24

സേവന മേഖലയുടെ വളർച്ചയിലെ ഹ്രസ്വകാല മാറ്റങ്ങൾ അളക്കുന്നതിനായി സ്ഥിതിവിവരക്കണക്ക്, പരിപാടി നിർവഹണ മന്ത്രാലയം പുതിയ സേവന ഉൽപ്പാദന സൂചിക അവതരിപ്പിക്കുന്നു. ജൂലൈയിൽ ഇത് ആരംഭിക്കും. വ്യവസായ മേഖലയിലെ വളർച്ച അളക്കുന്ന വ്യവസായ ഉൽപ്പാദന സൂചികയ്ക്ക് സമാനമായാണ് പുതിയ സംവിധാനം. ഔപചാരിക സേവന മേഖലയെ ഉൾപ്പെടുത്തി എല്ലാ മാസവും സൂചിക പ്രസിദ്ധീകരിക്കും. മൊത്ത-ചില്ലറ വ്യാപാരം, ഗതാഗതം, ബാങ്കിങ്, ഇൻഷുറൻസ്, ടെലികോം, ഹോട്ടലുകൾ, റസ്റ്റോറന്റുകൾ, റിയൽ എസ്റ്റേറ്റ്, സാങ്കേതിക സേവനങ്ങൾ, കലാ-വിനോദ മേഖലകൾ എന്നിവ ഇതിൽ ഉൾപ്പെടും. 2025-26 വർഷത്തെയും 2026 ഏപ്രിൽ മാസത്തെയും പരീക്ഷണ സൂചികകൾ ജൂലൈ 14ന് പുറത്തിറക്കും.

സേവന മേഖലയുടെ വളർച്ച കൃത്യമായി അളക്കാനും നയരൂപീകരണത്തിന് സഹായിക്കാനുമാണ് ഈ നീക്കം. ഇതിനായി 2025 മെയ് മാസത്തിൽ സാങ്കേതിക ഉപദേശക സമിതി രൂപീകരിച്ചിരുന്നു. സമിതിയുടെ ചർച്ചകൾക്ക് പിന്നാലെ സമീപനരേഖ പൊതുജനാഭിപ്രായത്തിനായി പുറത്തിറക്കി. ഭരണപരമായ വിവരങ്ങൾ, ചരക്ക്-സേവന നികുതി വിവരങ്ങൾ, വാർഷിക സേവന മേഖല സർവേ എന്നിവയാണ് പ്രധാന വിവരസ്രോതസുകൾ. നിലവിൽ ആരോഗ്യ, വിദ്യാഭ്യാസ മേഖലകൾ പിന്നീട് ഉൾപ്പെടുത്താനാണ് തീരുമാനം. പരീക്ഷണ ഘട്ടത്തിൽ സൂചികയുടെ സ്ഥിരതയും വിശ്വാസ്യതയും വിലയിരുത്തും.

രാജ്യത്തിന്റെ മൊത്ത മൂല്യവർധനയിൽ 2013-14 മുതൽ സേവന മേഖലയുടെ പങ്ക് പകുതിയിലേറെയാണ്. എന്നാൽ സേവന മേഖലയുടെ ഹ്രസ്വകാല വളർച്ച അളക്കാൻ പ്രത്യേക സൂചിക ഇതുവരെ ഉണ്ടായിരുന്നില്ല. ആവശ്യമായ വിവരങ്ങളുടെ അഭാവവും സേവന മേഖലയിലെ വൈവിധ്യവുമാണ് പ്രധാന തടസ്സങ്ങളായിരുന്നത്. കഴിഞ്ഞ ഒരു ദശകത്തിനിടെ വിവരശേഖരണ സംവിധാനങ്ങൾ മെച്ചപ്പെട്ടതോടെയാണ് ഇത് സാധ്യമായത്. അടിസ്ഥാന വർഷമായി 2024-25 തെരഞ്ഞെടുത്തിട്ടുണ്ട്. തുടർന്ന് ഓരോ മാസവും ഏകദേശം അറുപത് ദിവസത്തെ ഇടവേളയിൽ സൂചിക പ്രസിദ്ധീകരിക്കാനാണ് പദ്ധതി.