ഒറ്റപ്പാലം, 2026 ജൂൺ 24 –

പ്രവാസി വ്യവസായി മുഹമ്മദാലിയെ തോക്കുചൂണ്ടി തട്ടിക്കൊണ്ടുപോയ കേസിൽ രണ്ട് പേർ കൂടി അറസ്റ്റിലായി. പനമണ്ണ കളത്തിൽ മഹേഷ് എന്ന മാക്കു, രഞ്ജിത് എന്ന വാപ്പു എന്നിവരാണ് പിടിയിലായത്. ഇതോടെ കേസിൽ അറസ്റ്റിലായവരുടെ എണ്ണം 19 ആയി. 2025 ഡിസംബർ ആറിനാണ് മലപ്പുറം വണ്ടൂർ പൂങ്ങോട് സ്വദേശിയായ മുഹമ്മദാലിയെ ക്വട്ടേഷൻ സംഘം തട്ടിക്കൊണ്ടുപോയത്.

കുറ്റകൃത്യത്തിൽ നേരിട്ട് പങ്കെടുത്തതും മുഹമ്മദാലിയെ തടങ്കലിൽ പാർപ്പിച്ചതുമായ സംഘത്തിലെ അംഗങ്ങളാണ് അറസ്റ്റിലായതെന്ന് പൊലീസ് പറയുന്നു. ഒളിവിലായിരുന്ന ഇവരെ അന്വേഷണസംഘം കണ്ടെത്തുകയായിരുന്നു. മുഹമ്മദാലി സഞ്ചരിച്ചിരുന്ന ആഡംബര കാർ പിന്തുടർന്ന സംഘം തിരുമിറ്റക്കോട്ടിൽ വച്ചാണ് ആക്രമണം നടത്തിയത്.

തട്ടിക്കൊണ്ടുപോയ ദിവസം രാത്രി കോതകുറുശ്ശിയിലെ ഒരു വീട്ടിൽ തടവിലാക്കിയ മുഹമ്മദാലി പിന്നീട് രക്ഷപ്പെടുകയായിരുന്നു. ആക്രമണസംഘം മദ്യലഹരിയിൽ ഉറങ്ങിയ സമയത്താണ് രക്ഷപ്പെട്ടത്. പുറത്തേക്കെത്തിയ മുഹമ്മദാലിയെ നാട്ടുകാരും പൊലീസും ചേർന്ന് വാണിയംകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു. ദിവസങ്ങളോളം അവിടെ ചികിത്സയിൽ കഴിയുകയും ചെയ്തു.