തൃശൂർ, 2026 ജൂൺ 24 –

വാട്സ്ആപ്പിൽ സ്റ്റാറ്റസ് ഇട്ട് ആത്മഹത്യയ്ക്ക് ശ്രമിച്ച സ്ത്രീയെ വിയ്യൂർ പൊലീസ് സാഹസികമായി രക്ഷപ്പെടുത്തി. ഞായറാഴ്ച വൈകുന്നേരം ഏഴരയോടെയാണ് സംഭവം. സ്ത്രീയുടെ വാട്സ്ആപ്പ് സ്റ്റാറ്റസ് കണ്ട ഒരാൾ ലൊക്കേഷനടക്കം പൊലീസ് സ്റ്റേഷനിൽ വിവരം അറിയിക്കുകയായിരുന്നു. തുടർന്ന് പൊലീസ് സംഘം ഉടൻ സ്ഥലത്തെത്തി.

എസ്ഐ ശ്രീജിൻ, സിപിഒമാരായ ഭദ്രൻ, ടോമി, സജിത്ത് എന്നിവർ ചേർന്നാണ് രക്ഷാപ്രവർത്തനം നടത്തിയത്. വീട്ടിലേക്ക് കടക്കാൻ ശ്രമിച്ചപ്പോൾ രണ്ട് വളർത്തുനായ്ക്കൾ കുരച്ചെത്തി. നായ്ക്കളുടെ ശ്രദ്ധ തിരിക്കാൻ എസ്ഐ ഒരു ഭാഗത്തേക്ക് ഓടിയപ്പോൾ ഭദ്രൻ പിന്നിലെ മതിൽ ചാടി വീട്ടിനുള്ളിൽ കടന്നു. അകത്തുനിന്ന് പൂട്ടിയിരുന്ന വാതിൽ ചവിട്ടിത്തുറന്ന് അകത്തെത്തിയപ്പോഴാണ് കൈഞരമ്പ് മുറിച്ച് രക്തത്തിൽ കിടന്നിരുന്ന സ്ത്രീയെ കണ്ടെത്തിയത്.

സ്ത്രീയെ ഉടൻ മതിലിനരികിലേക്ക് എത്തിച്ച് മറ്റ് പൊലീസ് ഉദ്യോഗസ്ഥരുടെ സഹായത്തോടെ പുറത്തേക്കു മാറ്റി. തുടർന്ന് ആംബുലൻസിൽ സ്വകാര്യ ആശുപത്രിയിലെത്തിച്ചു. ഏറെ രക്തം വാർന്നുപോയിരുന്നെങ്കിലും അപകടനില തരണം ചെയ്തതായി ഡോക്ടർമാർ അറിയിച്ചു. മാനസിക വിഷമത്തെ തുടർന്നാണ് ആത്മഹത്യയ്ക്ക് ശ്രമിച്ചതെന്നും കൗൺസലിംഗിന് സൗകര്യങ്ങൾ ഒരുക്കുമെന്നും പൊലീസ് അറിയിച്ചു.