രാജ്യത്തെ ജനങ്ങൾക്ക് നീതിയിലേക്കുള്ള പ്രവേശനം കൂടുതൽ എളുപ്പമാക്കാൻ കേന്ദ്ര നിയമ-നീതി മന്ത്രാലയത്തിന്റെ ദിശ 2.0പദ്ധതിക്ക് അംഗീകാരം ലഭിച്ചു. കേന്ദ്ര നിയമ-നീതി സഹമന്ത്രി അർജുൻ റാം മേഘ്വാളാണ് പദ്ധതി അംഗീകരിച്ചത്. 2026 ഏപ്രിൽ ഒന്നുമുതൽ 2031 മാർച്ച് മുപ്പത്തിയൊന്നുവരെ അഞ്ചു വർഷത്തേക്കാണ് പദ്ധതി നടപ്പാക്കുക. ഇരുനൂറ്റി അമ്പത്തഞ്ച് കോടി രൂപയാണ് പദ്ധതിക്കായി അനുവദിച്ചിരിക്കുന്നത്. എല്ലാ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും ജനങ്ങളിലേക്ക് പദ്ധതി വ്യാപിപ്പിക്കാനാണ് തീരുമാനം.

ജനങ്ങൾക്ക് സൗജന്യ നിയമോപദേശം നൽകുക, നിയമസഹായം ലഭ്യമാക്കുക, നിയമബോധവൽക്കരണം ശക്തമാക്കുക എന്നിവയാണ് പദ്ധതിയുടെ ലക്ഷ്യം. ഇതിനൊപ്പം വിദ്യി-സഞ്ജീവനി എന്ന പുതിയ ഘടകവും ഉൾപ്പെടുത്തി. കേന്ദ്രീകൃത ഡിജിറ്റൽ വേദിയും കൃത്രിമ ബുദ്ധി അടിസ്ഥാനമാക്കിയ ന്യായ സേതു സംവാദ സംവിധാനവും ഇതിന്റെ ഭാഗമാകും. ഗ്രാമപഞ്ചായത്ത് തലത്തിലുള്ള പൊതുസേവന കേന്ദ്രങ്ങൾ വഴി നിയമോപദേശം നൽകുന്നതും നിയമ വിദ്യാർത്ഥികളെയും അഭിഭാഷകരെയും ഉൾപ്പെടുത്തി സൗജന്യ നിയമസഹായം വിപുലപ്പെടുത്തുന്നതും പദ്ധതിയിൽ ഉൾപ്പെടുന്നു.

മുൻ ദിശ പദ്ധതി 2021 മുതൽ 2026 വരെയാണ് നടപ്പിലാക്കിയത്. ആ പദ്ധതിയിലൂടെ രണ്ടുകോടിയിലധികം ആളുകളിലേക്ക് സേവനങ്ങൾ എത്തിച്ചതായി നിയമ വകുപ്പ് വ്യക്തമാക്കുന്നു. പുതിയ പദ്ധതി ഭരണഘടന ഉറപ്പുനൽകുന്ന നീതിയിലേക്കുള്ള പ്രവേശനം കൂടുതൽ ശക്തിപ്പെടുത്തുകയാണ് ലക്ഷ്യമിടുന്നത്. നാല് പ്രധാന ഘടകങ്ങളിലൂടെ മൂന്ന് കോടി ഗുണഭോക്താക്കളിലേക്ക് എത്തിച്ചേരാനാണ് ദിശ രണ്ട് പോയിന്റ് പൂജ്യം പദ്ധതിയുടെ ലക്ഷ്യം.