കണ്ണൂർ, 2026 ജൂൺ 22 –

കണ്ണൂർ വാണിയപ്പാറ ഇൻഫന്റ് ജീസസ് പള്ളിയിലെ കല്ലറയിൽ രണ്ട് മൃതദേഹങ്ങൾ കണ്ടെത്തിയ സംഭവത്തിൽ അന്വേഷണം ശക്തമാക്കി. കല്ലറ തുറന്ന് വിശദമായി പരിശോധിക്കണമെന്ന പള്ളി വികാരിയുടെയും ഇടവക അംഗങ്ങളുടെയും ആവശ്യത്തെ തുടർന്നാണ് ഉന്നത ഉദ്യോഗസ്ഥർ സ്ഥലത്തെത്തിയത്. സ്‌പെഷ്യൽ ബ്രാഞ്ച് ഡിവൈഎസ്‌പി, പേരാവൂർ ഡിവൈഎസ്‌പി, ഇരിട്ടി തഹസിൽദാർ എന്നിവരടങ്ങുന്ന സംഘമാണ് പരിശോധന നടത്തുന്നത്.

സംഭവവുമായി ബന്ധപ്പെട്ട് വിലങ്ങാട് സ്വദേശിയായ സിജോയുടെ തിരോധാനക്കേസും വീണ്ടും പരിശോധിക്കും. 2014 മുതൽ സിജോയെ കാണാതായതായാണ് വിവരം. കാണാതായി ഏഴ് വർഷത്തിന് ശേഷമാണ് ബന്ധുക്കൾ പൊലീസിൽ പരാതി നൽകിയത്. കടയിലേക്ക് പോകുന്നുവെന്ന് പറഞ്ഞ് വീട്ടിൽ നിന്നിറങ്ങിയ സിജോ പിന്നീട് തിരിച്ചെത്തിയില്ലെന്നായിരുന്നു ഭാര്യയുടെ മൊഴി. നിലവിലെ സംഭവങ്ങളുടെ പശ്ചാത്തലത്തിൽ വീണ്ടും പരാതി നൽകുമെന്ന് ബന്ധുക്കൾ അറിയിച്ചു.

കഴിഞ്ഞ ദിവസമാണ് സെമിത്തേരിയിൽ ഒരു മൃതദേഹം സംസ്കരിക്കാനായി കല്ലറ തുറന്നപ്പോൾ പായയിൽ പൊതിഞ്ഞ നിലയിൽ ഒരു വസ്തു കണ്ടെത്തിയത്. തുടർന്ന് മൃതദേഹമാണെന്ന സംശയം ഉയർന്നതോടെ പൊലീസിനെ വിവരം അറിയിക്കുകയായിരുന്നു. സംഭവത്തിൽ കരിക്കോട്ടക്കരി പൊലീസ് അന്വേഷണം ആരംഭിച്ചിട്ടുണ്ട്. അതേസമയം, 2006-ലും 2015-ലും ഈ കല്ലറയിൽ മൃതദേഹങ്ങൾ സംസ്കരിച്ചിട്ടുണ്ടെന്ന് കുടുംബാംഗങ്ങൾ സാക്ഷ്യപ്പെടുത്തിയിട്ടുണ്ട്. 2015-ൽ സംസ്കരിച്ച ജെയിംസിന്റെ ഭാര്യയും ബന്ധപ്പെട്ട കല്ലറ തിരിച്ചുകാണിച്ചിട്ടുണ്ട്. സംഭവത്തിന്റെ യഥാർഥ സാഹചര്യം കണ്ടെത്താനാണ് നിലവിലെ അന്വേഷണം.