തിരുവനന്തപുരം, 2026 ജൂൺ 22 –

ഫിഫ ഫുട്‌ബോൾ മത്സരങ്ങൾ പൊതുജനങ്ങൾക്ക് സൗജന്യമായി ബിഗ് സ്ക്രീനിൽ പ്രദർശിപ്പിക്കാൻ തടസമില്ലെന്ന് കായിക മന്ത്രി ഒ.ജെ. ജനീഷ് വ്യക്തമാക്കി. ടിക്കറ്റ് ഈടാക്കി നടത്തുന്ന പ്രദർശനങ്ങൾക്കാണ് നിലവിലെ നിയന്ത്രണങ്ങൾ ബാധകമാകുന്നതെന്നും അദ്ദേഹം പറഞ്ഞു. തിരുവനന്തപുരത്ത് മാധ്യമങ്ങളോട് സംസാരിക്കവെയാണ് മന്ത്രി ഇക്കാര്യം അറിയിച്ചത്.

ലോകകപ്പ് ഫുട്‌ബോൾ മത്സരങ്ങളുടെ പ്രദർശനവുമായി ബന്ധപ്പെട്ട് ആരാധകർക്കിടയിൽ സമൂഹമാധ്യമങ്ങളിൽ ആശങ്ക ഉയർന്നിരുന്നു. ഈ വിഷയത്തിൽ സീ എന്റർടെയ്ൻമെന്റ്, സീ 5, ഈഗിൾസ് ക്ലബ് എന്നിവർ അനുകൂല നിലപാട് സ്വീകരിച്ചിട്ടുണ്ടെന്ന് മന്ത്രി പറഞ്ഞു. പ്രദർശനം സംഘടിപ്പിക്കുന്നവർ ഈഗിൾസ് ക്ലബിന്റെ വെബ്‌സൈറ്റിൽ രജിസ്റ്റർ ചെയ്യണമെന്നും നിർദേശമുണ്ട്.

ഫുട്‌ബോൾ ആരാധകർ പ്രതീക്ഷിച്ചതുപോലെ തന്നെ കാര്യങ്ങൾ മുന്നോട്ടുപോകുമെന്നും മന്ത്രി പറഞ്ഞു. കേരളത്തിൽ മാത്രമാണ് ഇത്തരമൊരു അവസരം ലഭ്യമാകുന്നതെന്നും അദ്ദേഹം കൂട്ടിച്ചേർത്തു. ഇതോടെ വിവിധ പ്രദേശങ്ങളിൽ സൗജന്യ പൊതുപ്രദർശനങ്ങൾ തുടരുന്നതിന് വ്യക്തത വന്നിരിക്കുകയാണ്.