ജാർഖണ്ഡിലെ റാഞ്ചിയിലെ നാംകും സൈനിക ആശുപത്രിയിൽ ജൂൺ പതിനഞ്ച് മുതൽ പത്തൊൻപത് വരെ നടന്ന ഓപ്പറേഷൻ ദൃഷ്ടിയുടെ ഒൻപതാമത് വിപുലമായ നേത്രശസ്ത്രക്രിയാ ക്യാമ്പ് വിജയകരമായി സമാപിച്ചു. ഇന്ത്യൻ സൈന്യത്തിന്റെയും ഇന്ത്യൻ വ്യോമസേനയുടെയും പ്രത്യേക നേത്രരോഗ വിദഗ്ധസംഘമാണ് ക്യാമ്പ് നടത്തിയത്. രണ്ടായിരത്തി അഞ്ഞൂറിലധികം രോഗികളെ പരിശോധിക്കുകയും മുന്നൂറിലധികം കാഴ്ച വീണ്ടെടുക്കൽ ചികിത്സകൾ നടത്തുകയും ചെയ്തു. ഇരുനൂറ്റി അറുപതിലധികം തിമിരശസ്ത്രക്രിയകളും ഇതിൽ ഉൾപ്പെട്ടു. നൂറിലധികം പിന്നാക്ക ആദിവാസി രോഗികൾക്കും ഇതിന്റെ പ്രയോജനം ലഭിച്ചു.

ക്യാമ്പിന്റെ സമാപനച്ചടങ്ങിൽ അധ്യക്ഷത വഹിച്ച പ്രതിരോധ സഹമന്ത്രി സഞ്ജയ് സേത്ത്, ഓപ്പറേഷൻ ദൃഷ്ടി സംഘത്തിന്റെ പ്രവർത്തനത്തെ അഭിനന്ദിച്ചു. തിമിരം, ഗ്ലോക്കോമ, പ്രമേഹത്തെ തുടർന്നുള്ള നേത്രരോഗങ്ങൾ തുടങ്ങിയവയ്ക്കുള്ള ചികിത്സകളും ക്യാമ്പിൽ ലഭ്യമാക്കി. ബിഹാർ റെജിമെന്റിലെ മുൻ ഹവിൽദാറിന്റെ ഭാര്യയായ എക്ക, റാഞ്ചിയിലെ ആദിവാസി വനിത എലിസ ബെത്ത്, ജാർഖണ്ഡിലെ ആദിവാസി സ്വദേശി അശോക് ദേശ്മുഖ് എന്നിവരടക്കം നിരവധി പേർക്ക് ചികിത്സയിലൂടെ കാഴ്ച മെച്ചപ്പെടുത്താനായി. ശസ്ത്രക്രിയാ പ്രവർത്തനങ്ങൾക്ക് നേതൃത്വം നൽകിയത് ഡൽഹിയിലെ സൈനിക ആശുപത്രിയിലെ നേത്രരോഗ വിഭാഗം മേധാവി ബ്രിഗേഡിയർ സഞ്ജയ് കുമാർ മിശ്രയായിരുന്നു.

രണ്ടായിരത്തി ഇരുപത്തിനാലിലെ ഡിസംബറിൽ ഡെറാഡൂണിൽ ആരംഭിച്ച ഓപ്പറേഷൻ ദൃഷ്ടി പിന്നീട് ജയ്പൂർ, ബാഗ്ഡോഗ്ര, ഉദംപൂർ, ലക്ഷദ്വീപ്, ഭുജ്, ഗൊരഖ്പൂർ, ലേ-ലഡാക്ക് എന്നിവിടങ്ങളിലേക്ക് വ്യാപിച്ചു. റാഞ്ചി ഈ പദ്ധതിയുടെ ഒൻപതാമത്തെ കേന്ദ്രമായി മാറി. പദ്ധതി ആരംഭിച്ചതിനുശേഷം രാജ്യത്താകെ എഴുപത്തയ്യായിരത്തിലധികം രോഗികളെ പരിശോധിക്കുകയും മൂവായിരത്തിലധികം കാഴ്ച വീണ്ടെടുക്കൽ ശസ്ത്രക്രിയകൾ നടത്തുകയും ചെയ്തതായി പ്രതിരോധ സഹമന്ത്രി അറിയിച്ചു. രാജ്യത്തെ ഏറ്റവും വലിയ സൈനിക ആരോഗ്യസേവന ജനകീയ പദ്ധതികളിലൊന്നായി ഇത് വളർന്നിരിക്കുകയാണ്.

.