പത്തനംതിട്ട, 2026 ജൂൺ 19 –

ഗവിയിൽ അങ്കണവാടി ജീവനക്കാരിയെ കൊലപ്പെടുത്തിയ കേസിൽ പോസ്റ്റ്മോർട്ടം റിപ്പോർട്ടിലെ നിർണായക വിവരങ്ങൾ പുറത്തുവന്നു. കഴുത്ത് ഞെരിച്ച് വെള്ളത്തിൽ മുക്കിയാണ് യുവതിയെ കൊലപ്പെടുത്തിയതെന്ന് പോസ്റ്റ്മോർട്ടത്തിൽ വ്യക്തമായി. കോട്ടയം മെഡിക്കൽ കോളേജിൽ പോസ്റ്റ്മോർട്ടം നടപടികൾ പൂർത്തിയായി. കേസിൽ കസ്റ്റഡിയിലെടുത്ത പ്രതി വിനോദ് കുമാറിനെ റാന്നി കോടതി റിമാൻഡ് ചെയ്തു.

യുവതി ബലാത്സംഗത്തിന് ഇരയായിട്ടുണ്ടോയെന്ന കാര്യത്തിൽ സംശയമുള്ളതിനാൽ കൂടുതൽ സ്ഥിരീകരണത്തിനായി രാസപരിശോധന നടത്തും. പ്രതിയുടെ ക്രിമിനൽ പശ്ചാത്തലവും കേസിൽ പൊലീസ് പരിശോധിക്കുന്നുണ്ട്. യുവതിയോട് മുൻവൈരാഗ്യമുണ്ടായിരുന്നോ എന്ന കാര്യത്തിലും അന്വേഷണം പുരോഗമിക്കുകയാണ്. പ്രതിയെ കൂടുതൽ ചോദ്യം ചെയ്യുന്നതിനായി മുഴിയാർ പൊലീസ് കോടതിയിൽ കസ്റ്റഡി അപേക്ഷ സമർപ്പിച്ചു.

ഇന്നലെയാണ് ഗവി വനമേഖലയിൽ അങ്കണവാടി ജീവനക്കാരിയെ മരിച്ച നിലയിൽ കണ്ടെത്തിയത്. രാവിലെ വീട്ടിൽ നിന്ന് അങ്കണവാടിയിലേക്ക് പോകുന്നതിനിടെയാണ് ആക്രമണം നടന്നതെന്നാണ് വിവരം. യുവതി ജോലിസ്ഥലത്ത് എത്താതിരുന്നതിനെ തുടർന്ന് നാട്ടുകാരും വനപാലകരും നടത്തിയ തിരച്ചിലിലാണ് മൃതദേഹം കണ്ടെത്തിയത്. സംഭവത്തിന് ശേഷം രക്ഷപ്പെടാൻ ശ്രമിച്ച പ്രതിയെ വള്ളക്കടവ് ചെക്ക് പോസ്റ്റിൽ വനപാലകർ കസ്റ്റഡിയിലെടുത്തു. ദൃക്‌സാക്ഷി പൊലീസിന് നൽകിയ വിവരമാണ് കേസിൽ നിർണായക വഴിത്തിരിവായത്.