കണ്ണൂർ, 2026 ജൂൺ 19 –
പാനൂരിൽ അധ്യാപിക ആത്മഹത്യ ചെയ്ത സംഭവത്തിൽ സുഹൃത്തിനെ പൊലീസ് പിടികൂടി. മൊകേരി വള്ളങ്ങാട് സ്വദേശിയായ ആദിത്യ മരിച്ച കേസിലാണ് അതേ പ്രദേശത്തുള്ള ശരണിനെ കസ്റ്റഡിയിലെടുത്തത്. ആണ്സുഹൃത്തിന്റെ മർദനമാണ് ആത്മഹത്യയ്ക്ക് കാരണമായതെന്ന് കുടുംബം ആരോപിച്ചിരുന്നു.
ഞായറാഴ്ച ആത്മഹത്യയ്ക്ക് ശ്രമിച്ച ആദിത്യയെ ആദ്യം തലശ്ശേരി ഇന്ദിരാഗാന്ധി സഹകരണ ആശുപത്രിയിൽ പ്രവേശിപ്പിച്ചു. ആരോഗ്യനില ഗുരുതരമായതിനെ തുടർന്ന് മിംസ് ആശുപത്രിയിലേക്ക് മാറ്റി. ചികിത്സയിലിരിക്കെ ഇന്നലെ വൈകിട്ടാണ് മരണം സംഭവിച്ചത്. സംഭവത്തിന് ശേഷം ശരണ് ഒളിവിലായിരുന്നുവെന്നാണ് വിവരം.
ജൂൺ എട്ടിന് തലശ്ശേരിയിൽ വെച്ച് മർദനമേറ്റ കാര്യം ആദിത്യ അമ്മയോടും ബന്ധുക്കളോടും പറഞ്ഞിരുന്നു. മർദനം വലിയ മാനസിക ബുദ്ധിമുട്ടുണ്ടാക്കിയെന്നും അതാണ് ആത്മഹത്യാശ്രമത്തിലേക്ക് നയിച്ചതെന്നും ചികിത്സയിലിരിക്കെ അമ്മയോട് പറഞ്ഞതായും കുടുംബം പറയുന്നു. കണ്ണൂർ സർവകലാശാലയിൽ ഗസ്റ്റ് അധ്യാപികയായിരുന്നു ആദിത്യ. സംഭവത്തിൽ പൊലീസ് അന്വേഷണം തുടരുകയാണ്.
