കൊൽക്കത്ത / 2026/ സെപ്റ്റംബർ 30
ആധാർ സേവനങ്ങൾ കൂടുതൽ എളുപ്പമാക്കാനും സുരക്ഷ ശക്തിപ്പെടുത്താനും അഞ്ച് പുതിയ പദ്ധതികൾ അവതരിപ്പിച്ച് യുണീക് ഐഡന്റിഫിക്കേഷൻ അതോറിറ്റി ഓഫ് ഇന്ത്യയായ യുഐഡിഎഐ. സെപ്റ്റംബർ 29ന് കൊൽക്കത്തയിൽ നടന്ന ‘ആധാർ സംവാദ്’ സമ്മേളനത്തിലാണ് പദ്ധതികൾ അവതരിപ്പിച്ചത്. പതിനേഴാമത് ആധാർ ദിനത്തോടനുബന്ധിച്ച് നടന്ന പരിപാടിയിൽ മുതിർന്ന നയരൂപകർത്താക്കൾ, വ്യവസായ പ്രമുഖർ, സാങ്കേതിക വിദഗ്ധർ, വിവിധ മേഖലകളിലെ പ്രൊഫഷണലുകൾ, പുതുമകൾ അവതരിപ്പിക്കുന്നവർ എന്നിവരടക്കം അറുനൂറിലേറെ പേർ പങ്കെടുത്തു. ആധാർ ഉപയോഗിച്ചുള്ള സേവനവിതരണം മെച്ചപ്പെടുത്താനും ജനങ്ങളുടെ സൗകര്യം കൂട്ടാനും ലക്ഷ്യമിട്ടായിരുന്നു വിവിധ പങ്കാളികളുമായി ചേർന്നുള്ള ഏകദിന സമ്മേളനം.
ഇന്ത്യയുടെ വളർച്ചയിൽ ആധാറിന് നിർണായക പങ്ക്
കേന്ദ്ര വാണിജ്യ–വ്യവസായ, ഇലക്ട്രോണിക്സ്–വിവരസാങ്കേതിക സഹമന്ത്രി ജിതിൻ പ്രസാദായിരുന്നു മുഖ്യാതിഥി. ഇന്ത്യയുടെ വിശ്വസ്ത ഡിജിറ്റൽ തിരിച്ചറിയൽ സംവിധാനമായി ആധാർ വളരുന്ന വഴിയിലെ പ്രധാന ചുവടുവയ്പായി പരിപാടി മാറി.
ആധാർ വലിയൊരു വിജയകഥയാണെന്നും ഇന്ത്യയുടെ വളർച്ചയിൽ നിർണായക പങ്കുവഹിക്കുന്ന സംവിധാനമാണെന്നും മന്ത്രി പറഞ്ഞു. ജനങ്ങളുടെ ദൈനംദിന ജീവിതം കൂടുതൽ എളുപ്പമാക്കുന്നതിൽ ആധാറിന്റെ പങ്കും അദ്ദേഹം എടുത്തുപറഞ്ഞു.
സേവനവിതരണം മെച്ചപ്പെടുത്താനും വലിയ തോതിൽ ജനങ്ങളെ സാമ്പത്തിക സേവനങ്ങളുടെ ഭാഗമാക്കാനും സർക്കാർ ആനുകൂല്യങ്ങൾ അർഹരായവരിലേക്ക് എത്തിക്കാനും ആധാർ സഹായിച്ചു. ഡിജിറ്റൽ ഭരണത്തിന്റെ അടിത്തറയായ ആധാർ സർക്കാർ സേവനങ്ങൾ ലഭിക്കുന്ന രീതിയിൽ വലിയ മാറ്റമുണ്ടാക്കി. സുതാര്യതയും കാര്യക്ഷമതയും എല്ലാവരെയും ഉൾക്കൊള്ളുന്ന സമീപനവും ഉറപ്പാക്കാൻ ഇതിലൂടെ കഴിഞ്ഞെന്നും മന്ത്രി പറഞ്ഞു.
പുതിയ സാങ്കേതികവിദ്യകൾക്കൊപ്പം മുന്നേറേണ്ടതിന്റെ ആവശ്യകതയും അദ്ദേഹം ചൂണ്ടിക്കാട്ടി. പശ്ചിമ ബംഗാളിലെ ജനങ്ങൾക്കും ആധാർ പ്രയോജനപ്പെടുമെന്നും സർക്കാർ പദ്ധതികളുടെ ആനുകൂല്യങ്ങൾ അർഹരായ ഗുണഭോക്താക്കളിലേക്ക് എത്തുമെന്നും മന്ത്രി വ്യക്തമാക്കി.
ജനങ്ങളുടെ ആവശ്യങ്ങൾക്കാണ് മുൻഗണന
യുഐഡിഎഐയുടെയും ആധാർ സംവിധാനത്തിന്റെയും എല്ലാ പ്രവർത്തനങ്ങളുടെയും കേന്ദ്രത്തിൽ ജനങ്ങളാണെന്ന് യുഐഡിഎഐ ചീഫ് എക്സിക്യൂട്ടീവ് ഓഫീസർ സൗരഭ് വിജയ് പറഞ്ഞു. പതിനേഴാമത് ആധാർ ദിനത്തിൽ അവതരിപ്പിച്ച പുതിയ സംവിധാനങ്ങളും ഈ സമീപനത്തിന്റെ ഭാഗമാണെന്ന് അദ്ദേഹം വ്യക്തമാക്കി.
ആധാറിന്റെ ഉപയോഗം വിപുലീകരിക്കുക, മികച്ച ഭരണത്തിനായി തിരിച്ചറിയൽ സ്ഥിരീകരണ സംവിധാനം കൂടുതൽ ശക്തിപ്പെടുത്തുക, ആധാർ എൻറോൾമെന്റും വിവരങ്ങൾ പുതുക്കുന്ന സംവിധാനവും മെച്ചപ്പെടുത്തുക തുടങ്ങിയ വിഷയങ്ങൾ സമ്മേളനത്തിൽ ചർച്ച ചെയ്തു. പുതിയ സാങ്കേതികവിദ്യകൾ ഉയർത്തുന്ന വെല്ലുവിളികളും അവസരങ്ങളും പങ്കാളികളുമായി വിലയിരുത്തിയെന്നും സൗരഭ് വിജയ് പറഞ്ഞു.
അതിവേഗം മാറുന്ന ഡിജിറ്റൽ ഇന്ത്യയുടെ ആവശ്യങ്ങൾക്കനുസരിച്ച് ആധാറും വികസിക്കുകയാണെന്ന് സ്വാഗതപ്രസംഗത്തിൽ യുഐഡിഎഐ ഡെപ്യൂട്ടി ഡയറക്ടർ ജനറൽ വിവേക് സി. വർമ പറഞ്ഞു. പുതിയ സാങ്കേതികവിദ്യകളും സേവനവിതരണ രീതികളും ആധാറിന്റെ അടുത്ത ഘട്ടത്തെ രൂപപ്പെടുത്തുകയാണ്. സ്വകാര്യതയ്ക്കും സുരക്ഷയ്ക്കും ജനങ്ങളുടെ സൗകര്യത്തിനും കൂടുതൽ പ്രാധാന്യം നൽകുന്നുണ്ടെന്നും അദ്ദേഹം വ്യക്തമാക്കി.
ജനങ്ങൾക്ക് സേവനങ്ങൾ എളുപ്പമാക്കുക, സുരക്ഷ ശക്തിപ്പെടുത്തുക, മികച്ച ഭരണം സാധ്യമാക്കുക, ഡിജിറ്റൽ മാറ്റത്തിന്റെ അടുത്ത ഘട്ടത്തിനായി ആധാർ സംവിധാനത്തെ സജ്ജമാക്കുക എന്നിവയാണ് അഞ്ച് പുതിയ പദ്ധതികളുടെ ലക്ഷ്യം.
റേഷൻ വാങ്ങാൻ മുഖം ഉപയോഗിച്ചും തിരിച്ചറിയൽ
ഇലക്ട്രോണിക് പൊതുവിതരണ സംവിധാനത്തിൽ മുഖം ഉപയോഗിച്ച് തിരിച്ചറിയൽ സ്ഥിരീകരിക്കുന്ന സേവനമാണ് പ്രധാന പ്രഖ്യാപനങ്ങളിലൊന്ന്. യുഐഡിഎഐ, ഭക്ഷ്യ–പൊതുവിതരണ വകുപ്പ്, നാഷണൽ ഇൻഫർമാറ്റിക്സ് സെന്റർ എന്നിവ ചേർന്നാണ് ഇത് അവതരിപ്പിച്ചത്.
ഗുണഭോക്താവിന്റെ സമ്മതത്തോടെ, സ്പർശനം ആവശ്യമില്ലാതെ തിരിച്ചറിയൽ സ്ഥിരീകരിക്കാം. വിരലടയാളം ഉപയോഗിച്ചുള്ള സ്ഥിരീകരണം ബുദ്ധിമുട്ടാകുന്ന സാഹചര്യങ്ങളിൽ ഇത് അധിക സൗകര്യമാകും. സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും അവരുടെ ഇലക്ട്രോണിക് പൊതുവിതരണ സംവിധാനത്തിൽ ഈ സേവനം ഉൾപ്പെടുത്താനാകും.
അനുമതിക്കും സേവനങ്ങൾക്കും പുതിയ സംവിധാനങ്ങൾ
ആധാർ ഉപയോഗിച്ചുള്ള മികച്ച ഭരണത്തിനായുള്ള ചട്ടക്കൂടിനു കീഴിൽ തിരിച്ചറിയൽ സ്ഥിരീകരണത്തിന് അനുമതി തേടുന്ന നടപടി ലളിതമാക്കാൻ ‘സ്വിക് പോർട്ടൽ 2.0’ അവതരിപ്പിച്ചു. യോഗ്യതയുള്ള സർക്കാരിതര സ്ഥാപനങ്ങൾക്ക് അനുവദനീയമായ ആവശ്യങ്ങൾക്കുള്ള നിർദേശങ്ങൾ പോർട്ടലിലൂടെ ബന്ധപ്പെട്ട മന്ത്രാലയത്തിനോ വകുപ്പിനോ നേരിട്ട് സമർപ്പിക്കാം. ക്രമബദ്ധവും ഏകോപിതവുമായ അനുമതി നടപടിയാണ് ഇതിലൂടെ ലക്ഷ്യമിടുന്നത്.
കുറഞ്ഞ തോതിൽ ആധാർ തിരിച്ചറിയൽ സ്ഥിരീകരണം ആവശ്യമുള്ള സർക്കാർ സ്ഥാപനങ്ങൾക്കും യോഗ്യതയുള്ള സർക്കാരിതര സ്ഥാപനങ്ങൾക്കുമായി ‘സബ് എയുഎ–സബ് കെയുഎ ലൈറ്റ്’ ചട്ടക്കൂടും അവതരിപ്പിച്ചു. ആധാർ തിരിച്ചറിയൽ സ്ഥിരീകരണവും വിവരാധിഷ്ഠിത തിരിച്ചറിയൽ പരിശോധനയും നടത്തുന്ന നിലവിലുള്ള അംഗീകൃത സ്ഥാപനങ്ങളുടെ അടിസ്ഥാന സൗകര്യം ഇവർക്ക് ഉപയോഗിക്കാം.
സ്വന്തമായി സ്ഥിരീകരണത്തിനുള്ള അടിസ്ഥാന സൗകര്യം ഒരുക്കാതെ തന്നെ ലളിതമായും വേഗത്തിലും തത്സമയം സംവിധാനത്തിന്റെ ഭാഗമാകാനാകും. യുഐഡിഎഐയുടെ സുരക്ഷ, സ്വകാര്യത, നിയന്ത്രണ വ്യവസ്ഥകൾ പാലിച്ചായിരിക്കും ഇത്.
പുതിയ ടോക്കൺ മാനേജ്മെന്റ് സംവിധാനവും അവതരിപ്പിച്ചു. ബാധകമായ സേവനങ്ങൾക്കായി യുഐഡിഎഐയുടെ സംസ്ഥാന, മേഖലാ ഓഫീസുകളിലെത്തുന്നവർക്ക് നടപടികൾ കൂടുതൽ എളുപ്പമാക്കുന്നതാണ് ഈ സംവിധാനം.
പുതുക്കിയ വെബ്സൈറ്റിൽ കൂടുതൽ ഭാഷകളും സൗകര്യങ്ങളും
വിവരങ്ങൾ തത്സമയം ലഭ്യമാക്കുന്ന പുതുക്കിയ യുഐഡിഎഐ വെബ്സൈറ്റ് ജിതിൻ പ്രസാദ് ഉദ്ഘാടനം ചെയ്തു. ആധാറിനെക്കുറിച്ച് മനസ്സിലാക്കുക, സേവനം ലഭ്യമാക്കുക, ആവശ്യമായ രേഖ കണ്ടെത്തുക, സഹായം തേടുക എന്നീ നാല് പ്രധാന ആവശ്യങ്ങൾക്കായാണ് ജനങ്ങൾ വെബ്സൈറ്റിലെത്തുന്നത്. ഇവ കൂടുതൽ വ്യക്തമായ ക്രമത്തിൽ കണ്ടെത്താനാകുന്ന രീതിയിലാണ് പുതിയ രൂപകൽപ്പന.
ആധാറിന്റെ ബ്രാൻഡ് മാർഗനിർദേശങ്ങൾ പാലിച്ചാണ് വെബ്സൈറ്റ് തയ്യാറാക്കിയത്. യുഐഡിഎഐ വെബ്സൈറ്റ്, മൈആധാർ പോർട്ടൽ, ആധാർ ആപ്പ് എന്നിവയ്ക്ക് ഒരേ ദൃശ്യശൈലി ഉറപ്പാക്കുന്നതാണ് രൂപകൽപ്പന.
ഭിന്നശേഷിക്കാർ ഉൾപ്പെടെ എല്ലാവർക്കും വിവരങ്ങളും സേവനങ്ങളും എളുപ്പത്തിൽ ഉപയോഗിക്കാനാകുന്ന സൗകര്യങ്ങളും ഒരുക്കിയിട്ടുണ്ട്. സ്ക്രീൻ റീഡർ ഉപയോഗിക്കാനുള്ള പിന്തുണ, അക്ഷരങ്ങളുടെ വലുപ്പം മാറ്റാനുള്ള സൗകര്യം, നിറങ്ങൾ കൂടുതൽ വ്യക്തമായി വേർതിരിച്ചറിയാനാകുന്ന രൂപകൽപ്പന, കീബോർഡ് ഉപയോഗിച്ച് വെബ്സൈറ്റ് പ്രവർത്തിപ്പിക്കാനുള്ള സൗകര്യം എന്നിവ ഇതിൽ ഉൾപ്പെടുന്നു.
ഭാഷിണി സംയോജനത്തിലൂടെ ഇംഗ്ലീഷും ഹിന്ദിയും ഉൾപ്പെടെ പതിമൂന്ന് ഭാഷകളിൽ വെബ്സൈറ്റ് ഉപയോഗിക്കാം. സമീപഭാവിയിൽ ഭാഷകളുടെ എണ്ണം ഇരുപത്തിമൂന്നാക്കാനാണ് പദ്ധതി.
പുതുക്കിയ വെബ്സൈറ്റിൽ യുഐഡിഎഐ കരിയർ പോർട്ടലും ഉൾപ്പെടുത്തിയിട്ടുണ്ട്. ഡെപ്യൂട്ടേഷൻ അവസരങ്ങളിലേക്ക് ഓൺലൈനായി അപേക്ഷിക്കാൻ ഇതിലൂടെ കഴിയും. അപേക്ഷാ നടപടികൾ കൂടുതൽ ക്രമബദ്ധവും സുതാര്യവുമാക്കുന്നതാണ് ഈ സൗകര്യം.
