തിരുവനന്തപുരം: ആശുപത്രിയിലെ മോര്ച്ചറിയില് സൂക്ഷിച്ചിരുന്ന മൃതദേഹം അനുവാദമില്ലാതെ തുറന്ന് കാണിച്ച ജീവനക്കാരനെതിരെ നടപടി. നെടുമങ്ങാട് ജില്ലാ ആശുപത്രിയിലെ സെക്യൂരിറ്റി ജീവനക്കാരനാണ് കാരണം കാണിക്കല് നോട്ടീസ് നല്കിയത്. കഴിഞ്ഞ ഞായറാഴ്ചയായിരുന്നു സംഭവം. ആശുപത്രിയിലെ താല്കാലിക ജീവനക്കാരനായ സെക്യൂരിറ്റി സുരേഷ് കുമാറിനെതിരെയാണ് നടപടി എടുത്തിരിക്കുന്നത്.
മോര്ച്ചറിയിലെ ഫ്രീസറില് സൂക്ഷിച്ചിരുന്ന നാലുമാസം ഗര്ഭിണിയായ യുവതിയുടെ മൃതദേഹം ആശുപത്രിയില് ക്യാന്റീന് നടത്തുന്നയാള്ക്കും ബന്ധുകള്ക്കുമാണ് സുരേഷ് കാണിച്ചുകൊടുത്തത്. ഭര്തൃഗൃഹത്തിലാണ് യുവതി മരിച്ചത്.
ആര്ഡിഒ, വന്ന് ഇന്ക്വസ്റ്റ് നടത്താനിരുന്ന മൃതദേഹമാണ് സുരേഷ് ആരോടും അനുമതി വാങ്ങാതെ പുറത്തുള്ളവര്ക്ക് കാണിച്ചുകൊടുത്തത്. സുരേഷിനോട് ഒരാഴ്ച മാറിനില്ക്കാനും ആശുപത്രി സൂപ്രണ്ട് നിര്ദേശം നല്കിയിട്ടുണ്ട്.
