പാലക്കാട് : ഉപതിരഞ്ഞെടുപ്പില് തനിക്ക് ഉറച്ച വിജയപ്രതീക്ഷയെന്ന് യുഡിഎഫ് സ്ഥാനാര്ഥി രാഹുല് മാങ്കൂട്ടത്തില്.പാലക്കാട് മതേതരത്വം കാത്തുപിടിക്കുമെന്നും ജനങ്ങള് നേരത്തെ തീരുമാനമെടുത്തിട്ടുള്ളതാണെന്നും രാഹുല് പറഞ്ഞു.മണപ്പുള്ളിക്കാവ് ഭഗവതി ക്ഷേത്രത്തില് ദര്ശനം നടത്തിയ ശേഷമായിരുന്നു രാഹുലിന്റെ പ്രതികരണം.
സിപിഐഎം എന്ത് വിവാദം ഉണ്ടാക്കിയാലും ജനങ്ങള് അതൊന്നും കാര്യമായിട്ടെടുക്കില്ല
സിറാജ്, സുപ്രഭാതം പത്രത്തിലെ എല്ഡിഎഫ് പരസ്യത്തെയും രാഹുല് വിമര്ശിച്ചു. ഗൗരവതരമായ വിഷയമാണെന്നും എങ്ങനെയാണ് ഓരോ പത്രത്തില് വെവ്വേറെ പരസ്യങ്ങള് വരുന്നതെന്നും രാഹുല് ചോദിച്ചു. സിപിഐഎം എന്ത് വിവാദം ഉണ്ടാക്കിയാലും ജനങ്ങള് അതൊന്നും കാര്യമായിട്ടെടുക്കാന് പോകുന്നില്ലെന്നും, മണ്ഡലത്തില് വോട്ട് ചെയ്യാനാകാത്തതില് സ്വാഭാവികമായ ഒരു വിഷമമുണ്ടെന്നും രാഹുല് പറഞ്ഞു.
വളഞ്ഞ വഴിയിലൂടെ വോട്ട് ചേര്ക്കാന് തനിക്ക് താത്പര്യമില്ലെന്നും പൊതുപ്രവര്ത്തകര് ഇത്തരം കാര്യങ്ങളില് കുറച്ച് ധാര്മികത പുലര്ത്തണമെന്നും രാഹുല് കൂട്ടിച്ചേര്ത്തു
