തിരുവനന്തപുരം: കൈറ്റ് വിക്ടേഴ്സ് ചാനലില് ജൂണ് ഏഴു മുതല് ട്രയല് അടിസ്ഥാനത്തില് ആരംഭിച്ച പ്ലസ്ടു ക്ലാസുകള് പ്ലസ് വണ് പൊതു പരീക്ഷക്ക് ഒരു മാസം മുമ്പ് നിര്ത്തും. പ്ലസ് വണ് പൊതുപരീക്ഷയ്ക്ക് ഒരു മാസം മുമ്പ് ആരംഭിക്കുന്ന റിവിഷന് ക്ലാസുകളും പരീക്ഷാ കാലയളവും കഴിഞ്ഞതിന് ശേഷം മാത്രമായിരിക്കും തുടര്ന്ന് പ്ലസ് ടു ക്ലാസുകള് സംപ്രേഷണം ചെയ്യുക.
കഴിഞ്ഞ വര്ഷം പൊതുപരീക്ഷ എഴുതിയ പത്താം ക്ലാസിലെയും പ്ലസ് ടുവിലേയും കുട്ടികള്ക്ക് നല്കിയപോലെ പ്ലസ് വണ് പൊതുപരീക്ഷയ്ക്ക് ഫോക്കസ് ഏരിയ അടിസ്ഥാനമാക്കിയുള്ള റിവിഷന് ക്ലാസുകളും സംശയ നിവാരണത്തിനുള്ള ലൈവ് ഫോണ്-ഇന്-പരിപാടികളുമായിരിക്കും ഈ കുട്ടികള്ക്കായി കൈറ്റ് വിക്ടേഴ്സില് സംപ്രേഷണം ചെയ്യുക.
ജൂണ് മാസം തന്നെ പ്ലസ് ടു ക്ലാസുകളുടെ സംപ്രേഷണം ആരംഭിച്ചത് കൂടുതല് പഠന ദിനങ്ങള് കുട്ടികള്ക്ക് ലഭിക്കാനാണ്. അതോടൊപ്പം ഈ ആഴ്ചയിലെ ട്രയലും ജൂണ് 14 മുതല് 18 വരെയുള്ള പുനഃസംപ്രേഷണവും കഴിഞ്ഞ ശേഷം കുട്ടികള്ക്ക് ക്ലാസുകള് കാണാന് അവസരം ഉണ്ട് എന്ന് ഉറപ്പ് വരുത്തിയതിന് ശേഷം മാത്രമേ തുടര് ക്ലാസുകള് സംപ്രേഷണം ചെയ്യൂ. ഇക്കാര്യങ്ങളില് കുട്ടികള് യാതൊരു ആശങ്കയും ആവശ്യമില്ലെന്ന് കൈറ്റ് സി.ഇ.ഒ അറിയിച്ചു.
