അമേരിക്ക, 2026 നവംബർ 09 –

ഡേറ്റാ സെന്ററുകളുടെ വളർച്ചയും ഉയരുന്ന വൈദ്യുതിച്ചെലവും സംബന്ധിച്ച ജനരോഷം നേരിടാൻ അമേരിക്കൻ കോൺഗ്രസിൽ ഊർജബിൽ ചർച്ചയാകുന്നു. റിപ്പബ്ലിക്കൻ, ഡെമോക്രാറ്റിക് പാർട്ടികളുടെ പിന്തുണയോടെ തയ്യാറാക്കിയ ബൈപാർട്ടിസൻ അമേരിക്കൻ അഫോർഡബിലിറ്റി ആൻഡ് ജോബ്സ് ആക്ട് തിങ്കളാഴ്ച സെനറ്റിൽ ചർച്ചയ്ക്കെത്തും. പുതിയ വൈദ്യുതിനിലയങ്ങൾക്കും പ്രസരണ ലൈനുകൾക്കും അനുമതി വേഗത്തിലാക്കുന്നതിനൊപ്പം വലിയ ഡേറ്റാ സെന്ററുകൾക്കായി വൈദ്യുതി ശൃംഖല മെച്ചപ്പെടുത്തുന്നതിന്റെ ചെലവിൽ കൂടുതൽ പങ്ക് അവയുടെ നടത്തിപ്പുകാർ വഹിക്കണമെന്നാണ് നിർദേശം.

വർഷങ്ങളായി തയ്യാറാക്കിവരുന്ന ബിൽ, നിർമിതബുദ്ധി അടിസ്ഥാനസൗകര്യ വികസനത്തിന്റെ ചെലവ് നിയന്ത്രിക്കാൻ സമീപകാലത്ത് ലഭിക്കാവുന്ന മികച്ച അവസരമാണെന്ന് അനുകൂലിക്കുന്നവർ പറയുന്നു. പദ്ധതികൾ പരാജയപ്പെട്ടാൽ അവയുടെ ചെലവ് വീടുകൾക്കും വ്യാപാരസ്ഥാപനങ്ങൾക്കും മറ്റു വൈദ്യുതി ഉപഭോക്താക്കൾക്കും മേൽ ചുമത്താതിരിക്കാനുള്ള സംരക്ഷണ വ്യവസ്ഥകളും ബില്ലിലുണ്ട്. എന്നാൽ കൂടുതൽ ഡേറ്റാ സെന്ററുകളുടെ നിർമാണത്തിന് ബിൽ വഴിയൊരുക്കുമെന്ന ആശങ്ക ചില ഡെമോക്രാറ്റുകൾക്കുണ്ട്.

തിരഞ്ഞെടുപ്പ് വിജയത്തിനുശേഷം ഡെമോക്രാറ്റുകളിൽ ഭിന്നത

ഡേറ്റാ സെന്ററുകൾക്കും ഉയരുന്ന വൈദ്യുതിച്ചെലവിനുമെതിരായ പ്രതിഷേധം കഴിഞ്ഞയാഴ്ച നടന്ന തിരഞ്ഞെടുപ്പിൽ ഡെമോക്രാറ്റുകളുടെ വൻവിജയത്തിന് സഹായിച്ചിരുന്നു. അടുത്തവർഷം കോൺഗ്രസിന്റെ ഇരുസഭകളുടെയും നിയന്ത്രണം ഏറ്റെടുക്കുന്ന പാർട്ടി, നിർമിതബുദ്ധിയെയും ഡേറ്റാ സെന്റർ വികസനത്തെയും ലക്ഷ്യമിട്ട് വിവിധ ബില്ലുകൾ അവതരിപ്പിക്കുമെന്നാണ് പ്രതീക്ഷ. നിർമിതബുദ്ധി മേഖലയിലെ പരിശോധനകൾ ശക്തമാകുമെന്ന ആശങ്കയിൽ കഴിഞ്ഞയാഴ്ച സാങ്കേതിക കമ്പനികളുടെ ഓഹരികളിൽ കനത്ത വിൽപ്പനയുണ്ടായി. നിലവിലെ ഊർജബിൽ പാസാകാനുള്ള സാധ്യത തിരഞ്ഞെടുപ്പിനു മുമ്പുള്ള 40 ശതമാനത്തിൽനിന്ന് 25 ശതമാനമായി കുറഞ്ഞെന്നാണ് നിക്ഷേപസ്ഥാപനമായ ടിഡി കോവന്റെ വിലയിരുത്തൽ.

ജീവിതച്ചെലവ് കുറയ്ക്കാനും ഡേറ്റാ സെന്ററുകളുടെ ഉത്തരവാദിത്വം ഉറപ്പാക്കാനുമുള്ള വാഗ്ദാനങ്ങളുമായാണ് ഡെമോക്രാറ്റുകൾ മത്സരിച്ച് ജയിച്ചതെന്ന് ബില്ലിന്റെ രചയിതാക്കളിലൊരാളായ സെനറ്റർ ഷെൽഡൺ വൈറ്റ്ഹൗസ് പറഞ്ഞു. ഈ രണ്ടു വാഗ്ദാനങ്ങളും ഉടൻ നടപ്പാക്കിത്തുടങ്ങാൻ ബിൽ സഹായിക്കുമെന്നും അവസരം ഉപയോഗിക്കണമെന്നും സെനറ്റിലെ പരിസ്ഥിതി സമിതിയിലെ മുതിർന്ന ഡെമോക്രാറ്റായ അദ്ദേഹം അഭിപ്രായപ്പെട്ടു. ഡേറ്റാ സെന്ററുകളെക്കുറിച്ചുള്ള വ്യവസ്ഥകൾ നല്ല ആദ്യചുവടാണെന്നും ഇരുപാർട്ടികൾക്കും യോജിപ്പുള്ള നയങ്ങളാണിവയെന്നും യാഥാസ്ഥിതിക ശുദ്ധഊർജ വാദസംഘടനയായ ക്ലിയർപാത്ത് ആക്ഷന്റെ മേധാവി ജെറമി ഹാരെൽ പറഞ്ഞു.

ട്രംപിന്റെ പിന്തുണ; പരിസ്ഥിതി സംഘടനകളുടെ എതിർപ്പ്

ബില്ലിനെ പിന്തുണച്ച പ്രസിഡന്റ് ഡൊണാൾഡ് ട്രംപ്, അതിലെ ഡേറ്റാ സെന്റർ വ്യവസ്ഥകൾ ചൂണ്ടിക്കാട്ടി ഞായറാഴ്ച സമൂഹമാധ്യമത്തിലൂടെ സെനറ്റിനോട് ബിൽ പാസാക്കാൻ ആവശ്യപ്പെട്ടു. അമേരിക്ക വേണ്ടെന്നുവെക്കുന്ന ഡേറ്റാ സെന്ററുകളെ ചൈന പണം ചെലവിട്ട് സ്വീകരിക്കുമെന്നാണ് അദ്ദേഹത്തിന്റെ വാദം. അതേസമയം വ്യവസായ സംഘടനയായ ഡേറ്റാ സെന്റർ കോയലിഷൻ ബില്ലിന് പിന്തുണ പ്രഖ്യാപിച്ചിട്ടില്ല. പ്രതികരണം തേടിയപ്പോൾ സംഘടനയുടെ പ്രതിനിധികൾ ഉടൻ മറുപടിയും നൽകിയില്ല.

പരിസ്ഥിതി പരിശോധനകൾ ദുർബലപ്പെടുത്തുകയും ഗോത്രസമൂഹങ്ങളുടെ സ്വയംഭരണാധികാരത്തെ ബാധിക്കുകയും ചെയ്യുന്നുവെന്ന് ആരോപിച്ച് പരിസ്ഥിതി, ഗോത്ര സംഘടനകൾ ബില്ലിനെ എതിർക്കുന്നു. ഡേറ്റാ സെന്ററുകളോടുള്ള എതിർപ്പ് പ്രധാന വിഷയമായ തിരഞ്ഞെടുപ്പിനുശേഷം അവയുടെ നിർമാണം എളുപ്പമാക്കുന്നതാണ് കോൺഗ്രസിന്റെ ആദ്യ നടപടിയെങ്കിൽ അത് വൈരുധ്യമാകുമെന്ന് എഴുത്തുകാരനും പരിസ്ഥിതിപ്രവർത്തകനുമായ ബിൽ മക്കിബൻ അഭിപ്രായപ്പെട്ടു. ആശങ്കകൾ പരിഹരിക്കാൻ അവതരിപ്പിക്കാനുദ്ദേശിക്കുന്ന ഭേദഗതികൾ ബില്ലിന്റെ രചയിതാക്കൾ ശനിയാഴ്ച പുറത്തുവിട്ടെങ്കിലും അവ തങ്ങളുടെ എതിർപ്പുകൾ പരിഹരിക്കുന്നില്ലെന്ന് സിയറ ക്ലബ് ഉൾപ്പെടെയുള്ള സംഘടനകൾ അറിയിച്ചു.

പുതിയ ധാരണ വേണമെന്ന് ഡെമോക്രാറ്റിക് നേതാക്കൾ

അടുത്തവർഷം സ്പീക്കറാകുമെന്ന് പ്രതീക്ഷിക്കപ്പെടുന്ന ജനപ്രതിനിധിസഭയിലെ ഡെമോക്രാറ്റിക് നേതാവ് ഹക്കീം ജെഫ്രീസും ബില്ലിൽ ആശങ്ക പ്രകടിപ്പിച്ചു. പരിസ്ഥിതി സംരക്ഷണ വ്യവസ്ഥകൾ അപര്യാപ്തമാണെന്നും ജനപ്രതിനിധിസഭയിലെ ഡെമോക്രാറ്റുകളുടെ അഭിപ്രായങ്ങൾ ഉൾപ്പെടുത്തണമെന്നും അദ്ദേഹം വെള്ളിയാഴ്ച പറഞ്ഞു. എണ്ണ, വാതക മേഖലയ്ക്ക് ബിൽ അമിതമായ ഇളവുകൾ നൽകുന്നുവെന്ന് വാദിക്കുന്നവരുടെ നിലപാടിന് ഡെമോക്രാറ്റുകളുടെ വൻവിജയം കരുത്തുപകരുമെന്ന് ടിഡി കോവൻ വിലയിരുത്തി.

തിരഞ്ഞെടുപ്പിനുശേഷം ലഭിച്ച രാഷ്ട്രീയ സ്വാധീനം ഉപയോഗിച്ച് വ്യത്യസ്തമായ സമീപനത്തിനായി ചർച്ച നടത്തണമെന്ന് ഒറിഗണിൽനിന്നുള്ള ഡെമോക്രാറ്റിക് സെനറ്റർ റോൺ വൈഡൻ ആവശ്യപ്പെട്ടു. രാഷ്ട്രീയ ഇടപെടലിന്റെ വലിയ അപകടസാധ്യതയില്ലാതെ എല്ലാ പുതിയ ഊർജപദ്ധതികളുടെയും അനാവശ്യ നടപടിക്രമങ്ങൾ കുറയ്ക്കുകയും അമേരിക്കക്കാരുടെ ഊർജച്ചെലവ് താഴ്ത്തുകയും ചെയ്യുന്ന ധാരണയ്ക്ക് അവസരമുണ്ടെന്നാണ് അദ്ദേഹത്തിന്റെ അഭിപ്രായം.

പുറന്തള്ളൽ കുറയാമെന്ന് പഠനം; നിയന്ത്രണനിയമത്തിന് തടസ്സങ്ങളും

ബില്ലിലെ വൈദ്യുതി പ്രസരണ, അനുമതി പരിഷ്കാരങ്ങൾ ഡേറ്റാ സെന്ററുകളുടെ ആവശ്യങ്ങൾ നിറവേറ്റാൻ കൂടുതൽ ശുദ്ധമായ വൈദ്യുതി ശൃംഖല ഉപയോഗിക്കാനുള്ള സാഹചര്യമൊരുക്കുമെന്ന് റോഡിയം ഗ്രൂപ്പ് വിലയിരുത്തി. പ്രത്യേകമായി സ്ഥാപിക്കുന്ന വാതകാധിഷ്ഠിത വൈദ്യുതിനിലയങ്ങളെ ആശ്രയിക്കുന്നതിനു പകരമുള്ള ഈ മാറ്റം, ഉപയോഗിക്കുന്ന ഊർജസ്രോതസ്സുകളുടെ അനുപാതമനുസരിച്ച് ബന്ധപ്പെട്ട ഹരിതഗൃഹ വാതക പുറന്തള്ളൽ 31 മുതൽ 90 ശതമാനംവരെ കുറച്ചേക്കുമെന്നാണ് പഠനം.

എന്നാൽ ട്രംപ് അധികാരത്തിലിരിക്കുമ്പോൾ ഡേറ്റാ സെന്റർ നിർമാണം നിയന്ത്രിക്കുന്ന സമഗ്ര ഫെഡറൽ നിയമത്തിന് സാധ്യത കുറവാണെന്ന് നിക്ഷേപബാങ്കായ ഐഎൻജി വിലയിരുത്തി. ചൈനയുമായി മത്സരിക്കാൻ ഇവ അനിവാര്യമാണെന്നാണ് ട്രംപിന്റെയും ഭരണകൂടത്തിന്റെയും നിലപാട്. സംസ്ഥാനങ്ങൾക്കും ഫെഡറൽ സർക്കാരിനും എത്രത്തോളം അധികാരം വേണമെന്നതിലും അഭിപ്രായവ്യത്യാസങ്ങളുണ്ട്. ജീവിതച്ചെലവ് നിയന്ത്രിക്കുന്നതിനും ഡേറ്റാ സെന്ററുകളുടെ വളർച്ച കൈകാര്യം ചെയ്യുന്നതിനും ബിൽ പ്രധാനമാണെന്ന് സെന്റർ ഫോർ സ്ട്രാറ്റജിക് ആൻഡ് ഇന്റർനാഷണൽ സ്റ്റഡീസിലെ ഊർജസുരക്ഷാ, കാലാവസ്ഥാ പരിപാടിയുടെ മേധാവി ജോസഫ് മജ്കുട്ട് പറഞ്ഞു. ഡേറ്റാ സെന്ററുകളുടെ ചെലവിനെക്കുറിച്ചുള്ള വ്യവസ്ഥകൾ ബിൽ പാസാകാൻ സഹായിച്ചേക്കുമെന്നാണ് അദ്ദേഹത്തിന്റെ വിലയിരുത്തൽ.